E fundit!

22:21 Aktualitet

Reagimi i Shqipërisë ndaj deklaratës së ministres serbe/ Sveçla: Duhet të jetë më konkret

Ministri i Brendshëm i Kosovës, Xhelal Sveçla ka folur mbr...

"Veliaj iku, por jo modeli i tij 5D", Këlliçi: Banda e Ben Malokut mori atë që meritonte

9 Dhjetor 2025, 22:37, Politikë CNA

"Veliaj iku, por jo modeli i tij 5D", Këlliçi: Banda e Ben

Deputeti i PD-së, Belind Këlliçi ka reaguar lidhur me kërkesën e Prokurorisë për të caktuar masa sigurie për 5 zyrtarë të bashkisë Tiranë dhe 3 përfaqësues subjektesh.

Në postimin e tij, Këlliçi shprehet se drejtorët hajdutë në bashkinë Tiranë vijojnë të ndjekin modelin sipas tij të ngritur nga kryebashkiaku Erion Veliaj.

Deputeti shton më tej se ngjarja e Kombinatit është rasti kur çdo tragjedi kthehet në një mundësi për të zhvatur qytetarët. Këlliçi shprehet se ajo të cilën ai e quan “banda e Ben Malokut” mori atë që meritonte.

Postimi i plotë:

Veliaj iku, por jo edhe modeli i tij 5D!

Lukunia e drejtorëve hajdutë në Bashkinë Tiranë duket se nuk ka fund. Nën modelin e ngritur nga Erion Veliaj dhe shefi i tij Edi Rama, çdo tragjedi njerëzore kthehet në mundësi për të zhvatur qytetarët.

I tillë është rasti në Kombinat, ku me justifikimin e dëmeve nga tërmeti u ngrit në këmbë një sistem i tërë hajdut për të vlerësuar pallatet si të pabanueshëm dhe për t’i hapur rrugë lejeve të ndërtimit drejt klientëve të tyre.

Sigurisht, e gjithë kjo mbi kurrizin e banorëve të cilët e gjenin veten në dhunën e shtetit, zhvendosjen dhe shpronësimin e padrejtë.

Gjej rastin të përgëzoj qytetarët e Kombinatit dhe Grupin për Mbrojtjen e Kombinatit (GMK) të cilët e kundërshtuan me forcë diktimin arbitrar dhe futjen brutale të duarve qeveritare në xhepat e tyre, në shtëpitë e tyre.

Qëndresa juaj është shembull se si pushtetit të korruptuar i duhen prerë duart, para se të shkelë çdo të drejtë njerëzore e kushtetuese.

Sa për bandën e sotme, Ben Maloku, një prej yjeve të ekipit hajdut të Bashkisë Tiranë dhe i denoncuar prej meje në mënyrë permanente për më shumë se dy vite, mori atë që meritonte. Vjedhja e votave qytetarëve të Zall Herrit dhe jo vetëm, është një krim që nuk do të amnistohet kurrë.

Ditën e sotme, Prokuroria e Tiranës ka kërkuar masa sigurie për 5 zyrtarë të Bashkisë Tiranë dhe tre përfaqësues subjektesh. Ndaj tyre rëndojnë akuzat për falsifikim dokumentesh dhe shpërdorim detyre në lidhje me procesin e shembjes së pallateve në zonën e Kombinatit pas tërmetit të vitit 2019.

Emrat e zyrtarëve për të cilët Prokuroria e Tiranës ka kërkuar masa arresti janë: Aurel Boriçi, Eleana Guçe, Aurel Çuko, Rexhina Rakipi dhe Sokol Qehajaj.

Ndërsa tre përfaqësuesit e subjekteve për të cilët është kërkuar masë sigurie janë: Aleksandra Mahmutllari, Shyqyri Maloku dhe Fatmir Firi. /CNA