E fundit!

13:44 Aktualitet

“Në emër të protestës”/ Tallje me flamurin shqiptar, anarkistët e zëvendësojnë me flamingon

Një grup me pikëpamje neomarksiste dhe anarkiste ka shkuar...

Posti i Avokatit të Popullit/ Ndregjoni: PS e PD, lojë të turpshme

9 Dhjetor 2025, 12:18, Politikë CNA

Posti i Avokatit të Popullit/ Ndregjoni: PS e PD, lojë të

Besim Ndregjoni, një prej emrave të propozuar nga Partia Demokratike për postin e Avokatit të Popullit, ka akuzuar dy forcat e mëdha politike, PD dhe PS, se po zhvillojnë një “lojë të turpshme” në prapaskenë.

Drejtuesi i Unionit të Ish-të Përndjekurve Politikë i bëri thirrje kreut të PD-së, Sali Berisha, të vendosë hapur “nëse është me antikomunistët apo jo”.

“Si përfaqësues i 40% të popullit shqiptar, i drejtohem PD-së dhe PS-së: t’ju vijë turp, sepse po bëni një lojë të turpshme për Avokatin e Popullit. Pas 30 vitesh del kandidat një antikomunist dhe ju bëni lojën e Kim Filmit të viteve '50, kur dënoheshin shqiptarët antikomunistë nga agjentura antishqiptare. Historia po përsëritet. Dy partitë kryesore kanë urrejtje për antikomunizmin dhe duan që Avokatin e Popullit mos ta kenë antikomunistët, por ‘shërbëtorët, langaraqët, lapangjozët’ e ideologjisë komuniste. Ne nuk kërkojmë poste e tituj; titujt i kemi larë me gjak. I bëj thirrje doktor Berishës: sot është dita të vendosësh a je me antikomunizmin apo me komunizmin. Koha është të tregoni veten”, tha Ndregjoni.

Ndregjoni akuzon se PD dhe PS po punojnë fshehurazi për të çuar drejt zgjedhjes kandidaturën e Endri Shabanit si Avokat i Popullit.

“Që nga muaji shkurt i vitit 2025 deri në mbylljen e sesionit në korrik, PD ka unifikuar emrin tim si kandidat për Avokat të Popullit. Nga informacionet që kemi, rezulton se është përcaktuar kështu. PD ka të drejtë të çojë vetëm një kandidat, sepse ka 50 deputetë – jo dy emra, që kërkojnë 56 firma. Nga burime të sigurta marrim vesh se PD dhe mazhoranca po bëjnë një lojë. Kanë pranuar që gjashtë kandidaturat e firmosura nga deputetët e PD-së, mes tyre edhe atë të Endri Shabanit, kryetar i Partisë Komuniste, të kalojnë për votim. Ky është turp, shkelje ligji. Ne, antikomunistët, nuk kërkojmë lëmoshë; përfaqësojmë 40% të popullsisë. Parlamenti në korrik 2025 më hoqi të drejtën për t’u zgjedhur, si në ‘lojën e Kim Filmit’ kundër kandidatit antikomunist. I plotësoj të gjitha kriteret dhe nuk kam shkelur asnjë ligj. Avokati i Popullit ka status Presidenti, jo të Gjykatës së Lartë, dhe mosha nuk përmendet askund në Kushtetutë”, deklaroi ai.

Ai iu drejtua sërish me një thirrje PD-së:

“Berisha duhet të qëndrojë siç qëndroi në korrik. Nëse jo, PD e ka shitur kandidaturën e Avokatit të Popullit dhe po tradhton shtresën që e voton prej 35 vitesh. PD duhet të çojë vetëm një emër. Mazhoranca kërkon të diktojë se kë do të propozojë PD – ky është turp kombëtar. Në vitin 2011, kur u zgjodh Igli Totozani, PS e propozoi dhe PD e votoi pa rezervë. Sot PS kërkon marrëveshje që të zgjedhë Avokatin e Popullit vetëm sipas dëshirës së saj. Këto janë skandale të ligjvënësve që nuk turpërohen.”

Ndregjoni shtoi se ai përfaqëson “gjakun e 6 mijë të zhdukurve, 37 mijë të burgosurve dhe 300 fëmijëve të Tepelenës që humbën jetën”, ndërsa theksoi se Shqipëria është “i vetmi vend në botë që nuk ka dënuar me ligj krimet e komunizmit, nuk ka bërë ligj të drejtë për pronarët dhe nuk ka garantuar të drejtat e atyre që s’kanë mundësi të përfaqësohen.”

Deklaratat Ndregjoni i dha nga Malësia e Madhe, gjatë një aktiviteti me ish-të përndjekurit politikë, në prag të seancës parlamentare ku pritet të vendosen kandidaturat për Avokat të Popullit./ CNA