web counter
LEXO PA REKLAMA!

SHKARKO APP

App Store
Google Play

Avokati i Popullit, si mazhoranca po lë pa fund në detyrë shoqen e ngushtë të Klotilda Bushkës

9 Dhjetor 2025, 13:30, Politikë CNA
Avokati i Popullit, si mazhoranca po lë pa fund në detyrë shoqen
Erinda Ballanca dhe Klotilda Bushka, foto ilustruese

Mazhoranca duket e painteresuar të zgjedhë Avokatin e Popullit. Erinda Ballanca qëndron prej 8 vjetësh në detyrë nga të cilat 3 vjet i ka siguruar me shtesa në pritje të zëvendësimit.

Procedurat e zëvendësimit formalisht janë hapur e rihapur plot 3 herë, por mazhoranca në të gjitha rastet ka qenë më e interesuar të djegë nga brenda kandidatët e preferuar të Ramës sesa të zëvendësojë Ballancën.

Në vitin 2022 kur nisën për herë të parë procedurat e zgjedhjes së avokatit të ri, Klotilda Bushka ishte kryetare e Komisionit të Ligjeve.

Përgjimet për çështjen Veliaj nxorën në dritë edhe përdorimin që Bushka i bënte pa teklif zyrës së Ballancës. Qëndrimi në atë zyrë i shoqes ishte më i rëndësishëm për Bushkën sesa procesi parlamentar.

Grupi Parlamentar u distancua me urdhër nga dhënia e mbështetjes me nënshkrime, gjasme në emër të një negociate që nuk dihej se ku, si, në emër të kujt dhe për cilin bëhej.

Në një lojë mes copave të PD-së, mazhoranca bënte sehir mbi detyrimin kushtetues të Kuvendit të ripërtëritjes me votë të Avokatit të Popullit.

Mes papërgjegjshmërisë totale, të vetmet që fitonim ishin shoqet Bushka-Balanca.

Këmbë përmbi këmbë, Bushka siguronte Ballancën se sa të ishte ajo, Balanca mund të rrinte edhe 10 vjet të tjera në atë zyrë.

E ndërsa Ballanca i gëzohej miqësisë së vërtetë, kandidatët talleshin live në gjasme seanca dëgjimore që nuk pasoheshin nga vijimi i procesit parlamentar.

Në fund Edi Rama rrëzoi me votë kandidatin e negociuar prej 6 muajsh mes Ballës dhe Alibeajt. Asnjërit nuk i erdhi keq për kurbanin që bënë.

Kuvendi priti ca kohë dhe rihapi prapë procedurat për gjasme zëvendësimin e Ballancës, ndërsa shoqe Bushka i kishte prapë “copy-paste” gjërat.

Tashmë Gazi edhe zyrtarisht ishte bërë i Berishës dhe ishte më i motivuar se kurrë që të shfaqej si kalorës i berishizmit.

Kurse Berisha insistonte publikisht të shfaqej si mbështetës i Besim Ndregjonit, i vetmi kandidat për të cilin mazhoranca kishte shprehur refuzim.

Shoqet ishin të qeta. Asgjë nuk mund të ndodhte.

Sot jemi përpara së njëjtës komedi!

Mazhoranca bën sikur pret propozimet e opozitës dhe deklaron që nuk mbështet me firma asnjë kandidat.

Një strategji e çuditshme që nuk shpjegon minimumi se pse i refuzon firmën dikujt që je i gatshëm t'i japësh votën!

Dhe pastaj pse mbush veshët e dëgjuesve të zyrës me emrin e të preferuarit të Ramës, kur i refuzon firmat mbështetëse të paktën atij?

Në këtë taktikë as ligjore, as politike, askush nuk kupton dot as se cili është kriteri që mazhoranca ka në parapëlqim. Si e do mazhoranca Avokatin e Popullit? E do si Ballanca apo do thjesht Ballancën?

Mbështetja me firma mund t'i nxirrte më të nderuar sesa Berisha që nënshkruan për zyrtarin e arrestuar të hipotekës.

Kaq gjë duhet të na e dëshmonin me cilësinë e kandidatit që mbështesnin me firma. Për më tej s'kishin pse shqetësoheshin e as të kompleksoheshin.

Mund të merrnin shembull nga Berisha.

Deri tani në këto 3 fillime të procedurave për zgjedhjen e Avokatit të Popullit, Berisha i ka lënë të lira firmat e grupit të vet.

Me ato firma janë gëzuar deri tani mbi 25 kandidatë, përfshirë Endri Shabanin që sot e pëshpërisin vetë si të preferuarin e Ramës.

Por asnjëri nuk është gëzuar dot me votë./ CNA





Lajmet e fundit nga