LEXO PA REKLAMA!

SHKARKO APP

E fundit!

x

Ambasadorët e emëruar marrin kritika për anësinë politike për mungesë të karrierës diplomatike

10 Qershor 2023, 09:13, Politikë CNA

Kandidatët e qeverisë për ambasadorë, të zgjedhur mes radhëve të ish-deputetëve të Partisë Socialiste, janë kritikuar nga deputetët e opozitës gjatë seancës dëgjimore në Komisionin e Politikës së Jashtme, për politizim të diplomacisë së vendit dhe mungesë eksperience në diplomaci.

Komisioni i Politikës së Jashtme në Kuvend nisi të premten seancat dëgjimore me kandidatët për ambasadorë të propozuar nga qeveria, ku spikasin emrat e ish-deputetëve të partisë socialiste dhe kandidatë pa karrierë diplomatike.

Sipas propozimeve të dërguara në parlament nga ministrja e jashtme Olta Xhaçka, komisioni dëgjoi fillimisht Meri Kumben, aktualisht zëvendësministre e Kulturës, kandidate për ambasadore në Izrael, juristja Zhaklina Peto për kandidate për në Malin e Zi, ish-deputetët socialistë, Ervin Bushati, për ambasador në Shtetet e Bashkuara të Amerikës dhe Vasilika Hysi për drejtimin e zyrës diplomatike pranë Kombeve të Bashkuara dhe organizatave të tjera ndërkombëtare në Gjenevë.

Përzgjedhja e emrave u prit me kritika nga opozita, por veçanërisht dy kandidatët që vini  nga radhët e PS-së, për shkak të politizimit të tyre dhe mungesës së përvojës në fushën e diplomacisë.

 

“Do të doja kandidatë që vijnë nga administrata e Ministrisë së Jashtme, që kanë ndërtuar një karrierë në diplomaci”- tha Dritan Shehi.

Ndërsa, Tomorr Alizoti vuri në dyshim paanshmërinë politike në kryerjen e detyrës së përfaqësuesit diplomatik dhe i cilësoi “qoka” politike të kryeministrit Rama emërimet e reja. “Politika e jashtme nuk i përket PS-së”- iu drejtua ai Bushatit.

Nënkryetari i komisionit, Agron Gjekmarkaj, vuri në dyshim dhe integritetin e emërimeve të reja. “Në diplomaci pa hequr ndonjë emër cilësor, ka shumë mediokritet”- tha ai duke in kujtuar Bushatit se ai kishte qenë publikisht aktiv në mbrojtje të qeverisë dhe nuk ofronte garanci për paanshmëri politike si ambasador.

Bushati u përgjigj se detyrën e ambasadorit e shikonte si një mision patriotik. “Kam mësuar që çështjet patriotike kryesore të Shqipërisë, jashtë dyerve të politikës na bëjnë gjithmonë bashkë”- tha ai.

Gjatë seancës me Vasilika Hysin, deputetët e opozitës vlerësuan karrierën e saj jashtë politikës si mbrojtëse e të drejtave të njeriut, që sipas tyre ishte më e dobishme për vendin se sa emërimi si ambasadore.

“Meqë kur ka qenë PD në pushtet keni kërkuar të drejtat e njeriut do t'u bënte dhe më të moralshme tani që është PS në pushtet, të vini në detyrë të drejtat e njeriut”- i tha Alizoti.

Hysi tha se emërimi si ambasadore nuk do ta zbehë rolin e saj për forcimin e të drejtave të njeriut, pasi puna që do të bëjë lidhet me organizatat dhe misionet ndërkombëtare që vëzhgojnë zbatimin e të drejtave të njeriut.

Në listën e kandidatëve të rinj është dhe Fatmir Velaj, ish-deputet dhe këshilltar i kryeministrit Rama, për të drejtuar misionin diplomatik në Austri, gazetari Mustafa Nano, si dhe lëvizje paralele të konsujve apo ambasadorëve aktualë në përfaqësi të tjera diplomatike./Reporter.al

Lajmet e fundit nga