Agron Shehaj "kalon" ylberin: Mbështesim Florjan Binajn, do të fitojë betejën

7 Tetor 2025, 22:45, Politikë CNA

Agron Shehaj "kalon" ylberin: Mbështesim Florjan Binajn, do

Kreu i Partisë, "Mundësia" Agron Shehaj i ftuar në emisionin Opinion e ka dredhur dhe ka kaluar ylberin në lidhje me kandidaturën e Florjan Binajt për Bashkinë e Tiranës.

Brenda pak më shumë se një dite që nga shpallja e Florjan Binajt si kandidat për Tiranën përballë Manastirliut, Agron Shehaj doli me disa reagime dhe qëndrime.

Në fillim tha se nuk e mbështeste kandidaturën e Florjan Binajt, më pas doli me tezën e sondazheve, ndërsa tani në emisionin Opinion deklaroi se e mbështet kandidaturën e Florjan Binajt duke u shprehur i bindur se, mund ta fitojë këtë betejë dhe se është kandidati që plotëson të gjitha kushtet.

“Fatkeqësisht ky proces që nuk kishte ndodhur në 35 vite, u mbyll në mënyrën më të keqe të mundshme. U premë në besë, ishim në bisedime. Është hera e parë që diskutojnë partitë opozitare për të shkuar përtej partisë.

PD na preu në besë dhe na tha se propozimi ynë ishte i mirë e pranojmë, hajde bisedojmë pastaj dolën dhe thanë ky është kandidati.

Ne do mbështesim kandidatin jopolitik siç kemi premtuar. Do mbështesim Binajn sikur ta kemi propozuar ne.

Ne jemi koherent. Duam një kandidat jashtë politikës. Kandidati Binaj i plotëson të gjithë kushtet. Pavarësisht problemeve me PD qëllimi ynë është t’i japim Tiranës një kandidat jo të korruptuar. Do e mbështesim si të ishte i yni.

Mbështetja për Binajn është në të gjitha format që ai e sheh të arsyeshme dhe të nevojshme. Partia Mundësia do e çojë deri në fund propozimin e vet. Do e mbështesim sikur të kishte qenë kandidati ynë. Do ta ndihmojmë dhe do ta mbështesim. Kjo është në dorë të kandidatit. Që nesër jemi të gatshëm të na thotë si mendon ta bëjë fushatën. Të mos bëjë fushatë tradicionale, por me qytetarët. Është në dorën e tij të thotë: Ju dua, s’ju dua. Jam i bindur se formula që kemi zgjedhur është fituese dhe ky kandidat mund të fitojë. Jam 100% i bindur që mund të fitojmë. Ky emër në veçanti ka mundësi.Njerëzve u ka ardhur në majë të hundës. Pushteti në duart e një njeriu është në rrezik dhe duhet të jetë në duart e gjithë qytetarëve.

Mendoj se Binaj është për këtë betejë. Siç e tha Ermali është e pamohueshme që ka sjellë një entuziasëm që mungonte në opozitë”, deklaroi Agron Shehaj.

CNA përmes disa shkrimeve, nxori zbuluar skemën e Agron Shehajt për të sabotuar kandidatin e opozitës, lojë e cila më së shumti do t'i shërbente Ramës./ CNA