Qori: Fushata jonë do të bëhet me urbanë dhe biçikleta, do t'i kërkoj votën çdo qytetari

7 Tetor 2025, 22:30, Politikë CNA

Qori: Fushata jonë do të bëhet me urbanë dhe

Kandidati i Lëvizjes Bashkë për bashkinë e Tiranës, Arlind Qori ka folur mbrëmjen e sotme edhe për zhvillimin e fushatës së tij elektorale.

Qori u shpreh se në zonat brenda Tiranës, fushata do të bëhet me urbane, në këmbë dhe me biçikleta, ndërsa në zonat më larg do të përdoren edhe automjetet. Ai u shpreh se do t'i bie derës së çdo qytetari për të kërkuar votën pavarësisht preferencës së tyre partiake.

"Unë kurrë nuk do të jap një rezultat sa do të marr. Kjo më duket ofenduese për qytetarët. Brenda Tiranës, fushata jonë do bëhet në autobusë, urbane, në këmbë, më biçikletë. Në zonat më larg do përdorim dhe makinën. Unë e njoh qytetin tim pëllëmbë më pëllëmbë. Unë e njoh qytetin sepse e bëj vetë i pari fushatën. Do t’ju biem dyerve dhe do krijojmë edhe kontaktin njerëzor. Ne jemi e vetmja parti që i ftojmë qytetarët të na njohin sa më shumë. Sepse nuk kemi gjë për të fshehur. Do shfrytëzoj cdo rast në media dhe në terren të më njohin më shumë. Ne do të kërkojmë votën e çdo qytetari pavarësisht preferencës partiake.", u shpreh kreu i Lëvizjes Bashkë.

Qori tha më tej se nëse fiton zgjedhjet në Tiranë, nuk do të bëjë asnjë ndryshim në stafin e bashkisë dhe shtoi se nuk i ka premtuar askujt një vend pune në këmbim të votës.

"Në Shqipëri duhet marrë fund praktika që kush vjen nga puna sjell stafin që do vetë dhe shkarkon të tjerë. Nesë punojnë më ndershmëri, të gjithë do të qëndrojnë në punë. Kemi dy vite që bëjmë fushata dhe asnjë mbështetësi nuk i kam premtuar vende pune.", tha ai

Gjithashtu ka bërë me dije se Lëvizja Bashkë do të kandidojë vetëm në bashkinë e Tiranës dhe të gjitha forcat e tyre do të përqendrohen në kryeqytet.

"Duke qenë zgjedhje vetëm për kryetar bashkie do të mbledhim forcat vetëm për bashkinë e Tiranës. Në këtë luftë të parabartë me PD dhe PS të gjithë forcat tona do t’i mbledhim në Tiranë. Për arsye strategjike, ideja jonë ka qenë e qartë do të kandidojmë vetëm në Tiranë.", u shpreh Qori./CNA