E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Nga Iris Beqiri/ Vazhda e konstituimit në Kosovë

21 Korrik 2025, 15:40, Opinione Iris Beqiri

Nga Iris BEQIRI

9 shkurti i këtij viti nuk ishte vetëm dita e mbajtjes së zgjedhjeve parlamentare në Kosovë, por edhe pikënisja e një vazhde të gjatë përpjekjesh pa sukses për të përmbushur detyrimin e parë pas shpalljes së rezultateve. Dështimi i 50 tentativave për konstituimin e Kuvendit në Kosovë nuk është gjë tjetër veçse një zvarritje e një vote sa procedurale, aq edhe me rëndësi për të ardhmen e vendit.

Gjithçka që ka ndodhur në këto 5 muajt e fundit është zhvillimi i një sërë seancash të dështuara me pjesëmarrjen e deputetëve, që çdo dy ditë, që nga 15 prilli, votojnë e rivotojnë për të njëjtën arsye. Mosdakordësia për mënyrën e votimit dhe një kandidati alternativ janë dy arsyet kryesore të gjendjes aktuale.

Problemi i mungesës së konstituimit të Kuvendit të Kosovës nuk është vetëm një çështje emri apo votimi, por në thelb të një këmbënguljeje që tejzgjat pasigurinë dhe destabilitetin politik të vendit.

Ndërkohë që palët dhe drejtuesit më të lartë në vend zhvillojnë pjesëmarrje nëpër ceremoni e aktivitete të ndryshme brenda e jashtë vendit, do të kishte qenë më e vlefshme që fokusi të shkonte në një diskutim konstruktiv për këtë problematikë, për të arritur në një rezultat të frytshëm për Kosovën.

Kostoja politike e mungesës së konstituimit të një parlamenti është e pamatshme, pasi krijon një ngërç, i cili pamundëson që vendi të ketë institucione, çon në shpërbërje të parlamentit dhe derisa të rimbahen zgjedhje e të rinisë sërish i njëjti proces, kalon një kohë e gjatë, brenda së cilës mund të merren vendime të rëndësishme për nisma të reja ligjore apo ndryshime të nevojshme në fusha të caktuara.

Mbetet të shihen zhvillimet e ditëve në vijim, teksa Gjykata më e Lartë e vendit ka kushtëzuar procesin duke vendosur datën 26 korrik si përpjekjen e fundit për konstituimin. E nëse edhe kjo datë tejkalohet, nuk do të jetë një përmbyllje e dëshiruar e së gjithës.

Politikëbërja në Kosovë nuk duhet të jetë peng i një emri apo i një shumice, që mund të pretendojë se përmes një vote të dhënë ose të munguar ka në dorë të ardhmen e vendit.

Në politikën e Kosovës nevojitet një qasje që tejkalon vështirësitë politike të momentit dhe mbi të gjitha ngjarjet e së kaluarës.

Qytetarët e Kosovës meritojnë një institucion përfaqësues, të përgjegjshëm dhe efektiv, që u shërben interesave më të larta të tyre, me të zgjedhur nga populli që angazhohen ndaj çdo problematike të vendit përtej ndasive politike, kundërshtrimeve të çastit apo betejave të brendshme mes tyre.