Rekomandimi i pavend i kryeministrit

22 Prill 2025, 11:00, Opinione Luan Rama

“…SHKRUANI EDI RAMA NUDO…”

Pa asnjë shkak dhe pa asnjë arsye, Kryeministri e ka risjellë në ligjërimin e vet publik atë ngjarje të shëmtuar.
Unë e kisha harruar. Ma do mendja edhe të tjerët. Besoj edhe ata që e përdorën. Sepse në fakt nuk është ndonjë gjë që t’ia vlente për t’u mbajtur mend.
Po bëhen gati njëzet vjet që kur dikush prej njerëzve të lidhur me pushtetin në atë kohë, u përkujdes që të publikoheshin disa foto nudo të kryetarit të Partisë Socialiste.
I gjithi ai veprim qe një ligësi e shëmtuar. Edhe i dënueshëm, të paktën në aspektin etik, moral dhe profesional. Në njëfarë mënyre, qe një perversitet banal dhe ordiner. Dhe i tillë mbetet.
Mirëpo, ja që vetë personazhi i atyre fotove, pra kryetari i Partisë Socialiste, e ka marrë atë ngjarje prej skutave të hatllave të kujtesës së vet, dhe nuk e di se për çfarë arsye apo motivi, e ka ndarë nën shoqërinë e zonjës kryetare të Kuvendit dhe të zotit Pandeli Majko, me një grup adoleshentësh të mbledhur në një fshat diku në anë të detit, kinse për një veprimtari në kuadër të fushatës zgjedhore.
Çfarë lidhje ka ajo ngjarje me programin e Partisë Socialiste, me Shqipërinë Europiane të pasviteve 2030 apo me ëndrrat e të rinjve të mbledhur në anë të detit për të dëgjuar Kryeministrin?!
Nuk gjej asnjë motiv, asnjë arsye apo shkak që ta përligjë. Qoftë edhe për të treguar shkallën e ligësisë së kundërshtarëve politikë, nuk mendoj se justifikohet ai rrëfim i Kryeministrit.
E thashë, ka qenë një ngjarje e shëmtuar.
Por, ndërsa nuk e di se përse Kryeministri e risolli atë ngjarje, rekomandimi i pamenduar më e pakta, teksa iu tha adoleshentëve që me gjasë duhej të ishin nxënës të shkollës së mesme se “… i keni në gugëll (Google) po ishit kurioz, shkruani Edi Rama nudo, del aty!”, është kryekëput një lajthitje. Një lajthitje që nuk mund të të bëjë të qeshësh siç qeshën disa gra të mbledhura në Peshkopi kur Kryeministri tha se gjysmat e burrave të tyre janë çyrykë (domethënë të metë a të gjymtuar!).
Kush dhe përse duhet të jetë dikush kurioz për të parë fotot e Kryeministrit nudo apo lakuriq (domethënë cullak!)?!
Dhe me sa mend, me ç’logjikë vetë Kryeministri e rekomandon këtë publikisht?! (Citoj fjalë për fjalë:
“… i keni në gugëll (Google) po ishit kurioz, shkruani Edi Rama nudo, del aty!”)
Është e gërditshme!
Sepse nuk ka vetëm gjellë të gërditshme. Ka edhe sjellje të gërditshme. Ka gjuhë të gërditshme.
Ka edhe njerëz të gërditshëm.
Edhe ata që qeshin, ata që dëgjojnë e heshtin janë të tillë…