“Skena dhe prapaskena”/ Lufter Xhuveli zbërthen kujtimet dhe të panjohurat e politikës në një libër

5 Nëntor 2025, 13:59, Kulturë CNA

“Skena dhe prapaskena”/ Lufter Xhuveli zbërthen kujtimet dhe

“Skena dhe prapaskena, nga Enver Hoxha e Mehmet Shehu te Ramiz Alia, Fatos Nano e Sali Berisha” është libri më i fundit nga Lufter Xhuveli, që u promovua në qytetin e Shkodrës. Përmes kujtimeve dhe reflektimeve të tij, Xhuveli sjell dëshmi të rralla mbi marrëdhëniet e brendshme të pushtetit shqiptar nga periudha komuniste deri në vitet e tranzicionit.

“Skena dhe prapaskena”/ Lufter Xhuveli zbërthen kujtimet dhe

Libri ndalet te figura të rëndësishme politike të pesë dekadave të fundit, duke përshkruar prapaskenat, vendimmarrjet dhe zhvillimet që kanë ndikuar në historinë e Shqipërisë.

“Është një libër, në të cilin përmes ngjarjeve të jetës sime, jam përpjekur që të shpjegoj dhe të qartësoj shumë gjëra, të cilat në pamje të parë nuk dihen dhe nuk njihen e as nuk duken. Edhe titulli vetë i librit është 'Skena dhe Prapaskena'. Në politikë është si në teatër, ke skenën, ke dhe prapaskenën. Shumica e gjërave luhen në prapaskenë, diskutohen, mendohen dhe vendosen atje më në fund dhe meqenëse unë kam pasur rastin dhe mundësinë që në të dyja epokat, si para vitit '90, ashtu dhe pas vitit '90, të jem afër këtyre ngjarjeve dhe zhvillimeve dhe pas vitit '90 të jem edhe pjesë e qeverisjes në Shqipëri. Kam mundur që t'i shikoj dhe janë refleksionet e mia.

Janë mendimet e mia ku jepet se si ka evoluuar, si ka ndryshuar psikologjia, ndërgjegjja e shoqërisë shqiptare duke dhënë veten time. Askush nuk është i pandryshueshëm. Ndryshojnë kushtet, ndryshojnë situatat, ndryshon shkalla e njohjes, ndryshon dhe ndërgjegjja e njeriut, si edhe qëndrimi ndaj dukurive të ndryshme. Këtë kam dashur që t'jua jap aty. Së dyti, kam dashur që të jap një mesazh. Ne jemi mësuar, sidomos para viteve '90, por edhe tani inercia vazhdon, është gati-gati e njëjtë, që t'i shikojmë gjërat bardhë e zi. Gjërat nuk janë bardhë e zi. Në mënyrë të veçantë kur është fjala për njerëzit, për qeniet humane. O do thuash që janë të mirë, o do thuash që janë të këqij. Jo, s'është kështu.

Çdo njeri ka në vetvete edhe virtytet, aftësitë, talentet, të mirat, atje, ashtu siç ka edhe të metat, siç mund të ketë edhe prapësi dhe ligësi dhe duke qenë se unë kam pasur rastin që t'i njoh pothuajse të gjithë udhëheqësit e Shqipërisë së pasçlirimit e deri më sot e kësaj dite, jam përpjekur që t'i portretizoj nga ky këndvështrim si qenie humane, që nuk janë vetëm të mirë, por kanë edhe të meta dhe që nuk janë vetëm të këqij, por kanë edhe anët e tyre të mira”,-tha Xhuveli.

Lufter Xhuveli mbetet një prej intelektualëve të shquar të botës akademike shqiptare. Ai ka mbajtur poste të rëndësishme shtetërore, si ministër i Bujqësisë, deputet i Kuvendit të Shqipërisë, zëvendëspresident i Konventës së Barcelonës, si dhe rektor i Universitetit Bujqësor të Tiranës./CNA