E fundit!

15:57 Aktualitet

VIDEO-Vrasja në Maliq, Lamallari “zbarkon” në Policinë e Korçës

Ministri i Brendshëm, Besfort Lamallari, ka zbarkuar në Dr...

“Kopshtet e pavarura të lumturisë”/ Premiera e tragjikomedisë në Teatrin “Migjeni”

11 Tetor 2025, 16:06, Kulturë CNA

“Kopshtet e pavarura të lumturisë”/ Premiera e

“Kopshtet e pavarura të lumturisë”, një tragjikomedi me autor Albri Brahushën, i ndarë nga jeta një vit më parë, u vu në skenë nga regjisori Hervin Çuli. Premiera u dha në skenën e Teatrit “Migjeni” në Shkodër.

Publiku ishte vendosur në të njëjtën platformë me aktorët, çka e bëri shfaqjen më të afërt, duke krijuar një përjetim emocional të veçantë. Për aktorët, kjo vepër përcjell mesazhe të forta dhe aktuale për shoqërinë shqiptare në tërësi.

“Emocione të forta, sidomos për lidhjen shpirtërore me Albrin edhe pse nuk kam pasur fatin ta njoh personalisht. Ishin emocione të bukura dhe mendoj se ia dolëm. Kur aktori është njësh me spektatorin, gjithçka bëhet më e lehtë dhe është një kënaqësi e madhe. Është një vepër e fuqishme me mesazhe të forta. Uroj që të përcillen mesazhet e dashurisë dhe të ketë më pak urrejtje. Shoqëria shqiptare ka nevojë për më shumë frymëzim”,-tha aktori Besmir Bitraku.

“Në fakt doja ta nisja me një ndjesi tjetër. Jam ndjerë shumë mirë, si në shtëpinë time. Jam tifoz i veprave shqiptare dhe gjithmonë i mbështes ato. Ne po humbasim njerëzinë, dita-ditës, duke u kthyer në robotë. Kjo na shndërron në qenie jo-humane. Albri ka bërë një gjetje interesante në këtë vepër, ku në një bankë nuk investohen para, por ëndrrat dhe shpirti”,-tha aktori Xhuliano Brisku.

Kjo premierë shënon edhe fillimin e drejtimit të ri në Teatrin “Migjeni”, nën drejtimin e Gerti Palalit. Ai bëri thirrje që shkrimtarët t’i afrohen më shumë teatrit.

“Jam i lumtur që sollëm një vepër shkodrane në këtë godinë madhështore. Albri Brahusha nuk është më mes nesh, por ishte emocionuese edhe për familjen e tij. Dramaturgjia është më afër publikut, dhe është e rëndësishme që shkrimtarët të krijojnë më shumë dhe të afrohen me teatrin”,-tha Palali.

Shfaqja sjell në vëmendje fenomenin e materializimit të jetës, duke vënë theksin në një “bankë” ku nuk depozitohen para, por ëndrra dhe ndjesi shpirtërore. Kjo krijon një kontrast të fortë mes asaj që jetojmë dhe asaj që kemi humbur si shoqëri.

Vepra do të vijojë të shfaqet për publikun shkodran edhe më 11 dhe 12 tetor, në orën 19:00, në sallën e Teatrit “Migjeni”./CNA