Shpërdoruesit nuk kanë cipë

26 Shkurt 2023, 14:21, Kulturë Aurel Plasari

Shpërdoruesi i radhës shfaqet nga Shkodra. Quhet Agron Luka:

“Në një dalje publike dhe me rastin e një botimi libri të ri, prof. dr. Aurel Plasari në shoqërimin e kryeministrit Edi Rama, deklaruan me një lloj sigurie "m'të vërtetuar me dokumente' se: 'heroi kombëtar i gjithë shqiptarëve, nuk e ka ndërruar kurrë fenë kristiane'!”

Dhe, pas pikëçuditjes (!) vijon të tjerrë historinë e vet. Nuk bën keq ta tjerrë historinë e vet, si të dojë dhe sa të dojë, por vepron keq nëse shpërdoron fjalët e të tjerëve dhe tjerr mbi çfarë ka kurdisur vetë.

Regjistrimi i bisedës sime me nxënësit e shkollave të mesme për Gjergj Kastriotin, Skënderbeun, është publik dhe mund të dëgjohet bukur mirë se si kam përmendur faktin që Noli, në një ligjëratë të tij të fundit për historinë e Skënderbeut, ka ndërruar mendim dhe ka pohuar se nuk rezulton që Gjergj Kastrioti të ketë ndërruar fenë, të jetë konvertuar. Ja fjalët e mia para nxënësve:

“... një vjet a dy vite para vdekjes Noli ka mbajtur përsëri një konferencë, të cilën unë e kuptoj shumë mirë: ka shkruar tri veprat [për Skënderbeun] dhe mban një konferencë anglisht mbi disa probleme të historisë së Skënderbeut dhe korrigjon, me argumente, edhe librat e vet; jep argumentet se përse është përrallë tregimi që i ndërruan fenë, nuk ia kanë ndërruar, dhe jep argumentet e veta. Edhe për çështje të tjera...”

Kaq. Dhe këtë e kam thënë unë, kurse intriga që Aurel Plasari dhe kryeministri “deklaruan” (në shumës) dëshmon hallin e shpërdoruesit, sado i hollë t’i duket atij ky shpërdorim fort i trashë.

Këtë ndërrim mendimi të Nolit e kam trajtuar edhe në librin tim, që është i vitit 2010, d.m.th. i këtu e 22 viteve të shkuara, nuk përbën pra ndonjë gjë të re. Por, me sa shihet, shpërdoruesit parapëlqejnë të informohen për debate të historisë duke u futur në bisedat e autorëve me nxënësit e shkollave të mesme: zgjedhje e tyre.

Dhe as ndonjë farë “sigurie” a pasigurie nga ana ime në këtë mes nuk ka pasur aspak, sepse që Fan Noli ka ndërruar mendim, ky është fakt. Ja edhe konkretisht çfarë ka thënë Noli, afërmendsh për ata që duan ta lexojnë:

“Nga këto dokumente del: së pari, se Gjon Kastrioti dërgonte herë pas here një nga djemtë bashkë me ushtarët shqiptarë për të ndihmuar Sulltan Muratin e Dytë dhe që ky djalë kthehej në shtëpi në fund të çdo ekspedite; së dyti, që vetëm Konstandini, njëri nga djemtë e Gjon Kastriotit, u vra në një nga këto ekspedita turke përpara vitit 1443; së treti, që Skënderbeu u dha peng kur ishte 30 vjeç, dhe jo 9 vjeç siç na thotë Barleti dhe kjo ndodhi vetëm mbas disfatës që pësoi Gjon Kastrioti më 1430; së katërti, që djali i Gjon Kastriotit që përmendet në dokumentet e vitit 1410 dhe 1428 si peng i Sulltanit, mund të ketë qenë Stanisha, djali më i madh dhe i ati i Hamza Kastriotit.

Versioni që Skënderbeu dhe i ati i tij u konvertuan në islamizëm ka mundësi të jetë një tjetër mit i papranueshëm. Ka katër dokumente të viteve 1920, 1926, 1938 dhe 1949 ku Skënderbeu përmendet si i krishterë Gjergj. Është e vërtetë që në disa vepra letrare përmendet si mysliman, por nuk ka asnjë dokument arkivor të provojë që Skënderbeu u konvertua në fenë islame”.

Fan S. Noli, Probleme mbi letërsinë biografike për Skënderbeun, në “Dielli”, 14 dhjetor 1960.

E di që as duhet shpresuar prej shpërdoruesve të kërkojnë ndjesë: nuk duket ta njohin atë mekanizëm./ CNA.al