Video - Ikona e letërsisë dhe mjeshtri i artit bëhen bashkë/ Timo Flloko emocionon me interpretimin e poezisë së Kadaresë

19 Shkurt 2023, 09:56, Kulturë CNA

Video - Ikona e letërsisë dhe mjeshtri i artit bëhen bashkë/

Ismail Kadare dhe Timo Flloko

Aktori dhe poeti shqiptar, Timo Flloko, është bërë bashkë me mjeshtrin e penës, ikonën e letërsisë shqiptare, Ismail Kadare.

Botuesi i Ismail Kadaresë, Bujar Hudhri, ka publikuar një video nga takimi i Fllokos me Ismail Kadarenë.

Aktori ka emocionuar me interpretimin e poezisë “Mall” të shkrimtarit shqiptar, në prezencë të vetë gjeniut të letrave.

Ai ka recituar vargjet e poezisë, e cila njihet ndërkombëtarisht, me një interpretim prekës.

Takimi kokë më kokë mes mjeshtrit të madh të penës dhe aktorit shumë të dashur nga shqiptarët është zhvilluar dy ditë më parë.

E në fakt ky është një nga ato takimet mes mjeshtrash që mbahet mend, ku nuk flitet me gjuhë të zakonshme, por me gjuhën e artit.

Video - Ikona e letërsisë dhe mjeshtri i artit bëhen bashkë/

Dhe një gjë të tillë e kanë bërë ikona e letërsisë shqiptare dhe një nga aktorët më të mirë të të gjitha kohërave.

Takime të tilla prodhojnë vetëm perla, njësoj si superinterpretimi i Timo Fllokos me “Ca pika shiu ranë mbi qelq”.

Kjo është një nga shumë poezitë e të madhit Kadare që është interpretuar nga shumë e shumë persona, por çdo recitim është sjellë ndryshe e me emocione të veçanta.

E këto emocione na i dhurojnë vetëm veprat plot ndjenjë të gjeniut të letrave, që është përkthyer në 37 gjuhë të botës, që ka marrë shumë çmime ndërkombëtare dhe që është nominuar disa herë për çmimin “Nobel” si kandidati i vetëm shqiptar në letërsi.

Me qindra botime dhe vepra të zgjedhura, Kadare ia doli që në kohën e diktaturës që veprat e tij të shkonin përtej Adriatikut.

Video - Ikona e letërsisë dhe mjeshtri i artit bëhen bashkë/

Kadare ka marrë shumë çmime prestigjioze botërore si “Man Booker International Prize”, në vitin 2005, Çmimi "Neustadt International" për Letërsi në vitin 2019, "Princi i Asturias" në Letërsi në vitin 2009, Çmimi "Jeruzalem" në vitin 2015, Çmimi Botëror "Cino Del Duca", në vitin 1992, ndërsa Franca i ka akorduar Çmimin më të lartë gjeniut shqiptar, atë të Komandantit të Legjionit të Nderit, në vitin 2016 dhe në Shqipëri është shpallur “Nderi i Kombit”.

Nga ana tjetër, ylli i kinematografisë shqiptare, Timo Flloko, është nga të paktët aktorë shqiptarë, të cilët ia kanë kushtuar karrierën e tyre ekskluzivisht filmit.

Ndonëse karrierën e ka shtrirë edhe në Holliwood, ku ka interpretuar në disa filma, aktori nuk e ka harruar asnjëherë Shqipërinë, por e ka ndarë jetën mes atdheut dhe Amerikës.

E tashmë, dy nga personazhet që i kanë dhënë kontribut të pashlyeshëm në artin e kulturën shqiptare vijnë bashkë për të dhuruar emocione të jashtëzakonshme./ B.A. – CNA.al