web counter
LEXO PA REKLAMA!

SHKARKO APP

App Store
Google Play

Të shtëna me armë në një lokal në Himarë/ Policia jep detaje, arrestohen 2 persona

30 Korrik 2023, 09:50, Kronika CNA

Të shtëna me armë në një lokal në Himarë/

Ditën e djeshme, në një lokal në plazhin e Bunecit, në Himarë, disa persona janë konfliktuar fizikisht dhe kanë qëlluar me armë zjarri në ajër.

Dyshohet se për motive të dobëta dy kushërinjtë me iniciale E. V. dhe A. V. janë përplasur fizikisht me dy vëllezërit N. L. dhe A. L., dhe më pas i kanë kanosur këta të fundit, duke qëlluar me armë zjarri në ajër.

Ngjarja ka ndodhur në ambientet e lokalit të shtetasit N. L., i cili sipas policisë ka tentuar ta fshehë ngjarjen.

Sapo janë njoftuar, blutë kanë shkuar menjëherë në vendngjarje dhe kanë arrestuar shtetasit:

-E. V., 42 vjeç, banues në Himarë, për veprat penale “Armëmbajtja pa leje”, “Kanosja” dhe “Plagosje e lehtë me dashje” (aktualisht ndodhet në spital, në ruajtje nga shërbimet e Policisë, pasi ka pësuar dëmtime fizike gjatë konfliktit);

-N. L., 44 vjeç, banues në Himarë, për veprat penale “Veprime që pengojnë zbulimin e së vërtetës” dhe “Mbajtja pa leje e armëve të gjahut”.

Gjithashtu janë shpallur në kërkim shtetasi A. V., 46 vjeç, për veprat penale “Armëmbajtja pa leje”, “Kanosja” dhe “Plagosja e lehtë me dashje” dhe po punohet për kapjen e tij.

Gjithashtu, ka nisur procedimi penal në gjendje të lirë për veprën penale “Plagosje e lehtë me dashje”, për shtetasit N. L., 40 vjeç, dhe A. L., 38 vjeç, të dy banues në Himarë.

Gjatë kontrollit në banesën e shtetasit N. L. janë gjetur dhe janë sekuestruar 2 armë gjahu, ndërsa në banesën e shtetasit E. V., shërbimet e Policisë gjetën dhe sekuestruan 1 krehër arme zjarri pistoletë, 1 shënjestër optike për snajper. Gjithashtu, në lidhje me këtë ngjarje janë sekuestruar 1 automjet tip “Audi” dhe 1 aparat celular.

Ndërkohë, materialet iu referuan Prokurorisë, për veprime të mëtejshme./ CNA.al





Lajmet e fundit nga