Pompeo zbulon detaje të reja nga vrasja e ish-komandantit iranian

19 Qershor 2022, 21:50, Kosova & Bota CNA

Ish-komandanti i lartë ushtarak i Iranit, Qassem Soleimani, u vra për të ndaluar një komplot kundër 500 amerikanëve, sipas ish-Sekretarit amerikan të Shtetit, Mike Pompeo.

“Gjenerali Soleimani ishte i angazhuar në një komplot për të vrarë 500 amerikanë të tjerë. Ne patëm mundësinë ta rrëzonim atë komplot dhe e bëmë”, theksoi Pompeo.

Lajmi u bë i ditur nga "Al Arabiya", duke cituar intervistën me ish-zyrtarin amerikan. I pyetur për rrethanat pas vrasjes së Soleimanit pavarësisht paralajmërimeve, ai shtoi se kishte disa paralajmërime.

“Shumë paralajmërime thanë se nëse dëshironi të tërhiqeni nga JCPOA (Plani i Përbashkët Gjithëpërfshirës i Veprimit – marrëveshja bërthamore me Iranin) do të ketë luftë, dhe shumë paralajmërime që thoshin nëse Shtetet e Bashkuara zhvendosin ambasadën e tyre nga Tel Avivi në Jerusalem, do të ketë luftë, kishte paralajmërime që thoshin nëse godisni gjeneralin Soleimani, do të ketë luftë”, deklaroi për "Al Arabiya" – Pompeo.

Ish-sekretari amerikan ravijëzoi se autoritetet amerikane i bënë të tria gjërat për të cilat morën paralajmërime dhe nuk pati luftë.

“Ne bëmë secilën nga ato tri gjëra dhe nuk pati luftë”, nënvizoi Pompeo.

Ish-zyrtari amerikan zbuloi se autoritetet sakaq kishin punuar “për të mbrojtur pasuritë tona në Irak, njerëzit tanë në Siri dhe në fakt, amerikanët në të gjithë botën për një kohë jashtëzakonisht të gjatë”.

“Ne kishim parë se çfarë po bënin Forcat Quds-e”, vijoi ai. “Dhe në këtë drejtim, ishte një projekt mbi të cilin ne ishim angazhuar vazhdimisht dhe më pas patëm këtë mundësi për të ndaluar atë që ishte një sulm i menjëhershëm ndaj burimeve, aseteve, njerëzve të SHBA-ve dhe… presidenti mori vendimin për ta bërë atë”, deklaroi në përmbyllje Pompeo.

Vrasja e Soleimanit

Viti 2020 nisi me lajmin e vrasjes së një gjenerali të lartë iranian, Qasem Soleimanit.

Kjo ngjarje shënoi një pikë kulminante të konfliktit SHBA-Iran.

Trump nuk ngurroi ta quante një fitore të madhe vrasjen e tij, pasi ishte një ndër “antiamerikanët më të egër”.

Nga Shtëpia e Bardhë u bë me dije se planet e Soleimanit ishin “të hidhte në erë Ambasadën e SHBA-së në Bagdad”.

Sanksionet e reja ndaj Iranit

Pas dy muaj replikash në distancë, SHBA-ja vendosi sanksione të reja ndaj Iranit.

Kryesisht, synimi ishte të ndalnin rritjen ekonomike të Iranit. Industria e naftës dhe ajo kimike u goditën më rëndë. U kërkua gjithashtu një izolim diplomatik i Iranit.

Një seri sanksionesh të tjera kishin në shënjestër ministrin e Brendshëm dhe zyrtarët e lartë të zbatimit të ligjit.

Arsyetimi ishte se kishin dhunuar të drejtat e njeriut në mënyrë të rëndë.

Kundërpërgjigjja e Iranit

Më 29 qershor 2020, Irani lëshoi një urdhër-arresti për ish-presidentin Trump. Ata i kërkuan madje Interpolit ndihmë për ta arrestuar.

Së bashku me të kërkojnë dhe arrestimin e dhjetëra të tjerëve.

Ky hap i qeverisë iraniane erdhi si akuzë se Trump dhe bashkëpunëtorët e tij kanë urdhëruar vrasjen e gjeneral Soleimanit.