E fundit!

08:02 Politikë

“Berisha nuk do njeri”/ Spaho degjeneron Mulin: Arrogant, nepotist, filli na ndau nga përplasja fizike

Ish-nënkryetari dhe ish-deputeti i Partisë Demokratike, Ed...

Izraeli: Mbi 250.000 banorë janë larguar nga Qyteti i Gazës

13 Shtator 2025, 14:58, Kosova & Bota CNA

Ushtria izraelite tha se më shumë se 250.000 persona janë larguar nga Qyteti i Gazës për në pjesë të tjera të territorit palestinez në javët e fundit, që kur Izraeli intensifikoi sulmet e tij ndaj qendrës më të madhe urbane të Gazës.

“Sipas vlerësimeve të ushtrisë izraelite, më shumë se çerek milion banorë të qytetit të Gazës janë larguar nga qyteti për sigurinë e tyre”, tha në "X" zëdhënësi i ushtrisë izraelite, Avichay Adraee.

Kombet e Bashkuara vlerësojnë se afër 1 milion palestinezë jetojnë në dhe përreth Qytetit të Gazës.

Më 13 shtator, ushtria izraelite lëshoi pamflete nga ajri duke u bërë thirrje banorëve të qarqeve perëndimore që të evakuohen, teksa agjencia për mbrojtje civile e Gazës raportoi për sulme të vazhdueshme.

“Ushtria izraelite po operon me forcë shumë intensive në zonën tuaj dhe është e përkushtuar që ta shkatërrojë dhe mposhtë Hamasin [grupin palestinez të shpallur organizatë terroriste nga Shtetet e Bashkuara dhe Bashkimi Evropian]”, thuhet në pamflet.

Izraeli, që ka paralajmëruar një operacion për marrjen e kontrollit të plotë të qytetit të Gazës, po përballet me presion ndërkombëtar që të mos vazhdojë me planin. Por, shteti thotë se është i vendosur që të shkatërrojë Hamasin dhe thotë se qyteti i Gazës është një prej bastioneve të fundit të grupit palestinez.

Javët e fundit, ushtria ka sulmuar ndërtesat shumëkatëshe, duke thënë se ato përdoren nga Hamasi.

OKB-ja dhe komuniteti ndërkombëtar kanë paralajmëruar se ofensiva e ushtrisë izraelite do të përkeqësojë situatën veçse katastrofike humanitare në Qytetin e Gazës, ku OKB-ja ka shpallur gjendje të urisë.

Sipas agjencisë për mbrojtje civile në Gazë, nga mëngjesi i së shtunës të paktën pesë persona janë vrarë nga sulmet izraelite.

Një ditë më parë, të paktën 50 persona u vranë në mbarë Rripin e Gazës, sipas kësaj agjencie.

Lufta në Gazë nisi pasi Hamasi më 7 tetor sulmoi jugun e Izraelit, duke vrarë afër 1.200 persona dhe duke rrëmbyer 251 të tjerë. Si pasojë e ofensivës hakmarrëse izraelite, në Gazë janë vrarë më shumë se 64.000 palestinezë, sipas Ministrisë së Shëndetësisë në Gazë – shifra që konsiderohen të besueshme nga OKB-ja./ Rel