web counter
LEXO PA REKLAMA!

SHKARKO APP

App Store
Google Play

E fundit!

x

E drejta e humbur, përkrahësit e Lulit ulin kokën 'në emër të elektoratit'

18 Tetor 2022, 20:31, Editorial Ermal Mulosmani
E drejta e humbur, përkrahësit e Lulit ulin kokën 'në
Ermal Mulosmani

Kurrë mos e shaj një njeri aq fort sa të vijë turp kur të pajtohesh, kurrë mos e lavdëro aq shumë sa të të vijë zor kur të ndahesh me të. Kjo quhet vetëpërmbajtje. Kur e humb vetëpërmbajtjen ke humbur të drejtën për të kërkuar mirëkuptimin e atyre që e kanë.

Ja, kjo më erdhi në mendje nga bashkimi i dy grupimeve të PD-së. Është bashkim interesash, padyshim. Që po shitet si parimor. Morali në politikë mund të mos ketë vlerë, por përbuzja e moralit në këtë farë feje, "në emër të interesave madhore të elektoratit" të bën të përbuzësh përbuzësit.

Unë isha kundër largimit të Berishës nga Grupi Parlamentar dhe mbetjes së Bashës Kryetar. Ata rrinin ose binin bashkë. Në rast se do të rrinin bashkë (varianti 1)  do të kishin luftën e USA-së, por nuk do të çanin elektoratin. Firo do të kishte, por askush nuk e di se si do të shkonte me kohën. I sigurt jam se do të ishin më mirë se ç'janë sot.

Rruga e dytë ishte që Basha të shpallte dorëheqjen e parevokueshme dhe pa të drejtë rikandidimi nga PD-ja më 9 shtator. Ashtu do të dilte kurajoz, i besueshëm dhe konstruktiv përpara elektoratit të PD-së. Kjo do t'i hiqte Berishës alibinë e besëprerjes dhe tradhtarit dhe do ta kthente lëvizjen e tij në një donkishotizëm. Nëse Berisha do ta merrte atë lëvizje.

Nuk po them që Berisha duhej të linte PD-në në hallin e saj dhe vetë të merrej me të vetin. Kjo quhet heroizëm dhe unë nuk e kam fort atë ndjenjë. Të isha në vend të Berishës do të bëja fiks atë që bëri ai. Fundja ai e mendonte se halli i tij ishte edhe halli i PD-së, pasi ai ishte PD-ja. Edhe unë ashtu do bëja. Ai nuk mund t'i linte elektoratin e vet Bashës apo një Bashe tjetër dhe të priste i braktisur se kur do të vinin ta arrestonin... Koha tregoi që elektorati i PD-së është i Berishës.

Fundja, çdo lëvizje e Bashës ka qenë e dështuar, që nga dita e parë. Tani përkrahësit e tij ulin kokën në emër të elektoratit. "Ja, sa të mbarojmë zgjedhjet se ia tregojmë ne atij apo këtij"...

Bashkim është ky?!

Kur nuk ke kurajo të vazhdosh i vetëm, më e pakta që mund të bësh është të frenosh gojën.





Lajmet e fundit nga