LEXO PA REKLAMA!

SHKARKO APP

KLP thellon skandalin/ Censurë dhe presion mediave me rregullore

11 Tetor 2022, 11:43, Editorial CNA

KLP thellon skandalin/ Censurë dhe presion mediave me rregullore

Këshilli i Lartë i Prokurorisë ka miratuar sot një rregullore që sipas tyre rregullon marrëdhënien me mediat.

Në fakt rregullorja në fjalë nuk rregullon marrëdhënien me median, por e cenon atë.

Po me të njëjtën rregullore, KLP ka bërë tentativa për të “grabitur” punën e kryeredaktorëve dhe redaktorëve, duke vendosur atë se çfarë përbën lajm dhe se si bëhet ky lajm dhe se kur ka interes një mbledhje apo një aktivitet.

Këshilli i Lartë i Prokurorisë është një institucion që paguhet me taksat e qytetarëve, të cilët kanë të drejtë të informohen edhe për prapaskenat që ndodhin brenda mureve të KLP-së.

Derisa të zbatohet Ligji, KLP nuk ka pse të ketë frikë dhe të fusë censurimin me rregullore të tilla.

Për më tepër kur në rregullore guxojnë dhe shkruajnë se mund të kërkojnë edhe medias largimin e një gazetari të akredituar.

Në këtë pjesë janë kujdesur që të shtojnë, nëse gazetari bën shkelje qartësisht të dallueshme të objektivitetit dhe profesionalizmit, Kushtetutës.

Por, nuk saktësojnë se cilat janë këto shkelje, si qenka shkelja e profesionalizmit dhe objektivit, kur iu zbardhen skandalet, kur iu thuhet e vërteta, apo kur nuk bëhet lajmi sipas dëshirës së tyre.

Që kur “kryeredaktorët” e KLP-së, vlerësojnë profesionalizmin dhe objektivitetin e një gazetari?

“Çdo kërkesë për informacion duhet t’i drejtohet Koordinatorit për të Drejtën e Informimit, i cili është përgjegjës edhe për koordinimin e sigurimit të informacionit brenda institucionit. Koordinatori për të Drejtën e Informimit, me miratimin e anëtarit të caktuar të Këshillit, ka të drejtë të kërkojë nga drejtuesi përkatës i medias së akredituar zëvendësimin e një gazetari, nëse rezultojnë shkelje qartësisht të dallueshme të objektivitetit dhe profesionalizmit, si dhe për shkelje të Kushtetutës, ligjit, dhe të parimeve të kësaj rregulloreje.

Në rastin kur shkelja është publike, e rëndë, apo flagrante, anëtari i caktuar nga Këshilli merr vendim për heqjen e akreditimit të gazetarit që kryen shkeljen. Vendimi i komunikohet drejtuesit të medias përkatëse, nëpërmjet Koordinatorit për të Drejtën e Informimit. Në këtë rast, anëtari i caktuar njofton Këshillin në mbledhjen e radhës”, thuhet në nenin 8 të rregullores skandaloze./CNA.al

Lajmet e fundit nga