“Acromax” censuron CNA-në/ Kompania e Aldor Ninit, i shërben Veliajt

12 Qershor 2024, 14:29, Acromax / Aldor Nini CNA

Censurë ndaj fjalës së lirë dhe informimit publik. Është pikërisht kjo se çfarë nuk duhet të bëjë “Acromax”-i, i drejtuar nga Aldor Nini. Por në fakt po ndodh e kundërta, të paktën me CNA-në, e cila po përballet me sulm të orkestruar në rrjetet sociale dhe në kanalin “YouTube” CNA HD, ku “Acromax” pretendon se po shkelim të drejtën e autorit, qoftë edhe në lajme të përcjella nga vetë institucionet shtetërore. (Lexo këtu)

Si funksionon “Acromax”? A ndikohet nga pushteti vendor dhe ai lokal? A është vetë “Acromax” shkelës i ligjit? Nëse po, pse një organ i tillë duhet të vijojë punën në shkelje të disa ligjeve, e t'u kërkojë medieve të zbatojë disa ligje të tjera?

“Acromax” censuron CNA-në/ Kompania e Aldor Ninit, i

Aldor Nini në sallën e gjyqit, burimi CNA

Avokatja Adriana Kalaja, në një intervistë për CNA TV, u dha përgjigje disa nga pyetjeve të mësipërme, ku edhe denoncoi shërbimin e “Acromax” ndaj Erion Veliajt.

"Kam hulumtuar ligjin për të drejtën e autorit, ka edhe një agjenci të akredituar në Shqipëri lidhur me këtë pjesë, nga ana tjetër ka edhe një marrëveshje të fshehtë, që është publike në mënyrë jozyrtare, marrëveshje që është lidhur personalisht nga kryetari i Bashkisë Tiranë me kompaninë ‘Acromax’. Nga informacionet që ne kemi është lidhur në emër të Endri Fugës, por që përfaqëson në këtë rast Kryeministrinë. Objekti i kësaj marrëveshjeje shitet sikur është një marrëveshje për të censuruar lajme, të cilat janë e drejta e autorit dhe nuk mund të publikohen pa autorizimin e autorit. Por në fakt kam konstatuar që ata censurojnë lajme të cilat kanë në fokus kritikat, denoncimet dhe dhënien e fakteve të vërteta për mënyrën se si funksion drejtimi i Bashkisë Tiranë, apo drejtimi i Kryeministrisë”.

Avokatja Adriana Kalaja, burimi CNA

Kalaja, ndër të tjera, tha se në bodrumet e Kryeministrisë ka një grup pune që punon për censurimin e lajmeve.

“Vetëm në bodrumet e Kryeministrisë është një staf shumë i madh, të cilët janë në kontrata të zeza dhe i shërbejnë kësaj veprimtarie të paligjshme në këndvështrimin tim dhe ky staf që punon në kundërshtim me ligjin në fuqi drejtohet nga bashkëshortja e ish-nënkryetarit të bashkisë, Arbjan Mazniku”, deklaroi avokatja./ CNA