LEXO PA REKLAMA!

SHKARKO APP

E fundit!

x

Esi Danbar, gruaja që jetoi edhe 40 vjet pasi u varros gabimisht e gjallë

19 Shtator 2022, 10:30, Blog CNA

Esi Danbar, gruaja që jetoi edhe 40 vjet pasi u varros gabimisht e

Gjëja më e vlefshme që kemi ne si njerëz është jeta jonë dhe e atyre që na rrethojnë. Normat shoqërore dhe prioritetet e tjera, mund të na bëjnë që ta harrojmë këtë fakt të thjeshtë, por vendimtar. Dhe në këto kushte, disa nga gabimet më të thjeshta mund të përfundojnë duke marrë një jetë njeriu edhe pa qenë të ndërgjegjshëm për këtë.

E njëjta gjë vlen edhe për Esi Danbar, që mund të konsiderohet si një nga njerëzit më me fat që ka jetuar. Në vitin 1915, Danbar, që në atë kohë ishte 30 vjeç, pësoi një atak epilepsie. Në atë moment të gjithë menduan se ajo kishte ndërruar jetë.

Doktor Brigs nga Blekvill, Karolina e Jugut, që e kontrolloi i pari, arriti në përfundimin se gruaja afro-amerikane kishte vdekur, pasi ai nuk gjeti shenja jete (as frymëmarrje, dhe as puls). Kufoma e saj u vendos në një arkivol druri, dhe funerali u caktua për në orën 11 të paradites së nesërme.

Në atë kohë, funeralet ndodhnin shumë shpejt pasi nuk kishte nevojë për shumë përgatitje. Motra e Danbar jetonte në qytetin fqinj, dhe ajo u informua shumë vonë për funeralin dhe për vdekjen e papritur të motrës së saj. Ceremonia ishte shumë më e gjatë sesa zakonisht pasi jo një, por 3 klerikë predikuan një e nga një para arkëmortit.

Më pas arkivoli u fut në gropën 2 metra të thellë dhe përsipër iu hodh dhe. Pak minuta më vonë mbërriti me nxisim motra e Danbar. Ajo iu lut predikuesve që të gërmonin dhe nxirrnin arkivolin për pak çaste në mënyrë që të mund ta shihte motrën e saj për herë të fundit.

Pas një diskutimi të shkurtër mes tyre, pastorët ranë dakord që ta nxirrnin arkivolin. Kur u hap kapaku i arkivolit të gjithë të pranishmit u tronditën kur panë Esi Danbar, teksa po e shihte motrën e saj me një buzëqeshje në fytyrë.

Gruaja ishte në fakt gjallë, dhe po të mos kishte qenë për motrën e saj, ajo do të ishte varrosur e gjallë. Të 3 klerikët u tmerruan nga ajo që panë. Ata u zmbrapsën instiktivisht duke u rrëzuar që të tre në gropën e hapur.

Më i shkurtri prej tyre pësoi tri brinjë të thyera, ndërsa dy të tjerët e shkelën në përpjekjet e tyre të dëshpëruara për të dalë me shpejtësi nga varri i hapur. Kur Danbar u ngrit dhe doli nga arkivoli, të gjithë vrapuan ku të mundnin, duke menduar se ajo ishte një fantazmë.

Që nga ajo ditë, të gjithë në Blekvile e shihnin me dyshim Esi Danbar, duke menduar se ajo ishte një lloj zombie. Nuk ka një rrëfim specifik nga ajo periudhë, apo ndonjë histori tjetër të botuar për këtë ngjarje. Por një artikull gazete i vitit viti 1955, i botuar në “Augusta Chronicle” (25 gusht 1955), përmend dr.Brigs, dhe faktin se si ai shpalli gabimisht të vdekur një nga pacientet e tij, Esi Danbar, në vitin 1915.

Ndërkohë, ekziston një tjetër rrëfim nga një mjek vendas, që kuroi një nga pastorët e lënduar nga ajo që pa në funeral. Sipas rrëfimit të botuar ne gazetë: “Esi Danbar, 70 vjeçe, i mbijetoi mjekut që e shpalli të vdekur 40 vjet më parë. Afro-amerikania nga Blekvil ishte duke mbledhur pambuk, kur ndërroi jetë papritur. Ajo u varros sot, edhe pse arkivoli i saj u vulos gati gjysmë shekulli më parë”.

Që nga ajo kohë, kjo histori është shkruar dhe rishkruar nga revista dhe agjenci të ndryshme lajmesh në mbarë botën. Një nga rrëfimet më interesante është ai i Jan Bondeson, që shkroi librin me titull “Të varrosesh i gjallë: Historia rrëqethëse e frikës sonë më të madhe” .

Brenda librit, ai përmend edhe historinë e pazakontë të Esi Danbar. Aty jepet një përshkrim më i detajuar i ngjarjeve të vitit 1915. Brenda librit përmenden edhe burime parësore si të moshuarit e asaj kohe nga Karolina e Jugut që kanë dëgjuar mbi të, apo edhe nga ata që ishin të pranishëm në funeral.

Bondeson nënvizon gjithashtu se Danbar u bë një figurë mjaft e njohur brenda komunitetit të zonës, dhe se të gjithë e dinin historinë e varrosjes për së gjalli. Esi Danbar vdiq në vitin 1955 në moshën 70-vjeçare nga shkaqe natyrore.

Përkthyer dhe përshtatur nga CNA.al

Lajmet e fundit nga