E thotë shkenca/ Këto janë 10 makthet më të zakonshme të njerëzve

19 Shtator 2023, 19:03, Blog CNA

E thotë shkenca/ Këto janë 10 makthet më të zakonshme

Je duke vrapuar por pa mbërritur askund. Sheh veten duke u rrëzuar nga lartësia por nuk prek asnjëherë tokën. Je duke parë vdekjen e njeriun tënd të zemrës, por s’mund të bësh asgjë për ta parandaluar. Nëse ashtu si shumica e njerëzve zgjoheni nga gjumi i mbuluar nga djersët e ftohta, keni qenë duke përjetuar një makth.

Edhe pse ëndrrat tona janë shumë personale, dhe shpesh bazohen në atë që na ka ndodhur gjatë jetës apo një dite më parë, ekzistojnë disa tematika që na bashkojnë të gjithëve. “Këto lloj ëndrrash janë të lidhura me çështje që çdo person ka në jetën e tij kur është zgjuar”- thotë Mikael Shredl, kreu i laboratorit të gjumit në Institutin Qendror të Shëndetit Mendor në Mannhaim, Gjermani. Në një studim të vitit 2018, Shredl dhe kolegu i tij analizuan mbi 1200 makthe, duke u kërkuar pjesëmarrësve të kujtonin ëndrrën e tyre më të fundit që i kishte
shqetësuar. Më pas ata i kategorizuan në tema të përbashkëta. Ja cilat janë sipas tyre 10 tematikat kryesore të maktheve që përjetojnë njerëzit në gjumë:

10. Infektimi

Nëse është simbolike dhe jo reale, një infektim mund të përfaqësojë një frikë nga sëmundjet
ose papastërtitë, ose çdo gjë tjetër që ju personalisht e lidhni me minjtë dhe buburrecat. Por
Shredl thotë se ky makth mund të jetë një shembull i ndjenjës së pasigurisë në shtëpinë tuaj.

9. Prania e një shpirti djallëzor

Në këtë rast personi tmerrohet nga dyshimi se mund të ketë pranë një fantazmë, demon apo
alien. Këto lloj halucinacionesh u ndodhin njerëzve që përjetojnë dukurinë e paralizës së
gjumit. Ky çrregullim i gjumit ndodh kur komunikojnë keq pjesët e trurit, ato që ju mbajnë të
qetë gjatë gjumit dhe pjesët që ju bëjnë të flini.

8. Katastrofat

Zjarret, përmbytjet, shpërthimet bërthamore, janë temë e zakonshme e ëndrrave të shumë njerëzve. Ato mund të ngatërrohet me fundin e botës. Këto lloj makthesh mund të sinjalizojnë një shqetësim të përgjithshëm për të ardhmen, si një mënyrë që përdor truri tuaj
për të përsiatur mbi diçka që ju shqetëson se mund të ndodhë.

7. Të ndjerit i shqetësuar

A e ke përjetuar ndonjëherë ndjesinë sikur je i sigurt se ke harruar diçka të rëndësishme, por nuk je i sigurt se çfarë është? Shumë njerëz e përjetojnë këtë gjë në ëndrra. Në studimin e Shredl, jo pak njerëz raportuan se ndjeheshin sikur e dinin se diçka nuk shkonte, por nuk e dinin se çfarë ishte, dhe kjo i bëri të ndiheshin në siklet

6. Mosmarrëveshjet

Në këtë rast, personi në ëndërr ose protagonisti është dëshmitar i një përleshjeje jo fizike. Këto ëndrra mund të jenë shenjë e një farë ankthi social që keni për një marrëdhënie personale. Pra ju mund të keni frikë nga një bisedë që duhet ta bëni me dikë apo të analizoni një konflikt që tashmë ka ndodhur.

5. Sëmundja dhe vdekja

Në këto lloj makthi, njerëzit pohuan se panë në ëndërr veten apo një familjarin e tyrë të sëmurë. Ai vuante nga një sëmundje ose vdiste prej saj. Këto lloj ëndrrash janë komplekse, dhe mund të përfaqësojnë shumë gjëra në varësi të asaj që jeni duke kaluar në jetën personale. Mund të jenë simbole të një frike të përgjithshme nga sëmundja dhe vdekja, por edhe një mënyrë sesi ta përballoni pikëllimin nga një ngjarje tragjike.

4. Përndjekja

Në këto ëndrra, mund të jeni duke u ndjekur nga një njeri, një shpirt djallëzor apo diçka që as nuk mund ta shihni. Shredl thotë se kjo është një sjellje shmangëse. Pra në përgjithësi, ëndrrat të tilla nënkuptojnë zakonisht se jeni në ankth për diçka që mund ta shmangni.

3. Aksidentet

Kjo kategori e gjerë ëndrrash përfshin tema si rrëzimi nga lartësitë, përplasja me makinë, mbytja në ujë etj. Shredl e gjeti këtë temë në 15 për qind të raportimeve. Por kur ndaheshin sipas gjinisë, meshkujt raportuan dukshëm më shumë sesa femrat ëndrra sikur po rrëzoheshin
nga një lartësi. Eksperti thotë se ëndrra të tilla mund të përfaqësojnë ndjenjën e daljes së situatës jashtë kontrollit, frikën nga vdekja apo ndjenjën e pafuqisë.

2. Sulmi fizik

Në këto skenarë, njeriu sheh në ëndërr sikur sulmohet, merr pjesë në një përleshje fizike ose sheh të tjerët që zihen. Ky lloj makthi mund të pasqyrojë ankthin social, një frikë të mirëfilltë nga dhuna apo shqetësimin për të qenit i pambrojtur ndaj kritikave të njerëzve të tjerë.

1. Dështimi

Në këtë lloj makthi përfshihet gjithçka, nga dështimi për të arritur një qëllim, tek të qenit vonë për diku, humbja e orientimit, paaftësia për të folur, humbja ose harrimi i diçkaje apo bërja e një gabimi. Ëndrrat me dështimin në një provim, mund të nënkuptojnë se jeni të pasigurt për aftësinë tuaj në punë ose në shtëpi, apo të risjellin në kujtesë ngjarje të caktuara shqetësuese thotë Shredl./ CNA