web counter
LEXO PA REKLAMA!

SHKARKO APP

App Store
Google Play

E fundit!

x

Sindroma e “motrës së madhe”/ Çfarë është dhe si ta kapërceni

16 Shtator 2023, 20:08, Blog CNA

Sindroma e “motrës së madhe”/ Çfarë

Kohët e fundit, “sindroma e motrës së madhe” është bërë objekt diskutimi në rrjetet sociale, sidomos në Tik Tok dhe Twitter. Ajo prek më shumë gratë se sa burrat dhe kjo për një arsye kulturore, e cila i sheh gratë si më të ngarkuara me presion, detyra dhe përgjegjësi brenda
familjes.

Kur rriten, kjo ngarkesë mund të marrë aspekte të ndryshme dhe ndonjëherë është e vështirë për t’u njohur. Ata që vuajnë nga një sindromë e tillë, janë njerëzit që ndjejnë se kanë një barrë të tepruar përgjegjësie ndaj të tjerëve. Ndonjëherë përgjegjësitë e “motrës së madhe” nuk janë reale, por atyre u duket sikur është pikërisht kështu.

Pra, ka një perceptim shpeshherë të pasaktë brenda dinamikës së marrëdhënieve, i cili mund të rrezikojë vetë cilësinë e marrëdhënieve që personi në fjalë ka jo vetëm në familje, por edhe me miqtë apo në marrëdhënie dashurie. Këta njerëz duken shumë të pjekur, të fiksuar pas perfeksionit, shumë kritikë ndaj vetes, mirëkuptues ndaj të tjerëve dhe mospërfillës ndaj vetes. Shpesh ata priren t’i vënë në plan të parë nevojat dhe dëshirat e të tjerëve në vend të atyre vetjake.

Shkaqet e “sindromës së motrës së madhe”

Ato që vuajnë nga kjo sindromë janë mbi të gjitha ato gra, të cilat në fëmijërinë e tyre janë kujdesur për vëllezërit apo motrat e tyre më të vegjël. Të rritesh më shpejt se të tjerët mund të çojë në mangësi dhe boshllëqe të konsiderueshme emocionale dhe afektive. Sepse kur rriten,
këta njerëz mendojnë gjithmonë se të tjerët meritojnë më shumë vëmendje, kujdes dhe dashuri sesa ata vetë.

Ata që gjatë rrugëtimit të tyre evolucionar, nuk e ndjejnë nevojën për t’u rebeluar kundër këtij roli që i ka rrënjët brenda vetes, rrezikojnë jo rrallë të përjetojnë një ndjenjë të papërshtatshmërisë së vazhdueshme, të pakënaqësisë emocionale dhe zhgënjimit, e cila nëse është kronike, mund të çojë në një formë të vërtetë depresioni.

Si të shpëtoni nga kjo sindromë

Nuk është e lehtë ta heqësh qafe këtë sindromë. Ka shumë “motra të mëdha” të cilat në fusha
të ndryshme të jetës së tyre, e kanë të vështirë për ta kuptuar se duhet ta përqendrojnë
vëmendjen jo vetëm tek nevojat e të tjerëve, por edhe tek vetja.

Hapi i parë për të dalë nga kjo sindromë, është të mësoni të thoni “jo”, duke deleguar tek të tjerët disa detyra ose përgjegjësi, duke u përpjekur të ndërgjegjësoheni mbi faktin se edhe të tjerët mund të jenë gjithashtu të aftë të kujdesen për veten, por edhe për nevojat që kanë.
Pranimi i vetvetes ashtu siç jeni, nuk varet nga ajo që bëni për të tjerët.

Sipas psikologëve, këta njerëz duhet të kuptojnë se vlera e tyre nuk varet nga miratimi i të tjerëve. Për ta çliruar veten nga ky rol i rëndë që nuk të lejon të evoluosh, duhet të punoni shumë me veten. Është thelbësore të mësoni ta doni veten për atë që jeni, dhe jo për kujdesin
dhe dashurinë që u jepni të tjerëve. Në shumë raste është e këshillueshme që të ndërmerret një kurs psikoterapie që ju lejon të punoni mbi vetëvlerësimin, menaxhimin e stresit dhe vetë konceptin në përgjithësi./ Përshtatur nga CNA





Lajmet e fundit nga