E fundit!

18:34 Aktualitet

"The Albanian Files"/ Zhupa: Libri i premtimeve të Ramës për ndërtuesit e vet, ka brenda 523 vepra penale

Deputetja e PD-së, Ina Zhupa, ka folur ditën e sotme lidhu...

“Tekstet e historisë janë paçavure”/ Artan Fuga, mesazh të fortë: Mos bëni shaka me ëndrrën e lashtë shqiptare

27 Qershor 2022, 09:37, Aktualitet CNA

“Tekstet e historisë janë paçavure”/ Artan Fuga,

Profesor Artan Fuga

Profesor Artan Fuga ka drejtuar një mesazh të fortë sot, ndërsa shkruan se Europa e bashkuar, është ëndrra e lashtë shqiptare, sepse historia jonë është pjesë e saj, është gjeneruese e vlerës së përbashkët europiane që brezave të rinj nuk ua thonë.

Në një postim në rrjetet sociale, Fuga shkruan se tekstet e historisë janë paçavure, ndërsa shton se shqiptarët, të rinjtë, duhet të mësojnë historinë e Europës.

Ai thekson se për atë Europë të bashkuar sa shqiptarë kanë lënë kockat në kufi duke shkuar në ëndrren e tyre të madhe, sa janë mbytur në detra, sa kanë provuar përvoja të hidhura, por monumentale.

“Toto thuajua!

Dashuria jonë : Evropa e bashkuar! 30 vjet më parë sheshet e Tiranës, pallatet e sportit, stadiumet buçisnin me Toton e madh, për yllin ndriçues, shpëtimtaren e kombit, qiellin e përbashkët Evropian!

Ata që janë 40 vjeçarë e poshtë nuk e kanë kujtesën e kësaj, prandaj kujtesa kombëtare është zbehur dhe mbi këtë zbehje lodrojnë sharjet, ofendimet, cinizmi, ndaj Evropës së qytetarëve! Sepse nuk e dinë si funksionon ajo! Atje në fund fjalën e kanë popujt, jo ndonjë kastë që i merr vendimet sikur të ishim në kohën e telegrafit me fjali të shkurtra si mitroloz!

Popujt e mënçur nuk nxitohen kurrë! Kështu është ndërtuar Evropa. Kush nuk e di historinë të shkojë ta mësojë se në tekstet e shkollës sonë nuk e gjen këtë të vërtetë. Janë paçavure! Luftra njëqindvjeçare, paqe qindra vjeçare!

Histori e matur, e qendrueshme, e rrënjosur në ndërgjegjen evropiane. Shihni sa të durueshëm janë! Askush nuk na përgjigjet! Na merr për dore dhe përpiqet të mos e humbim rrugën si harrakatër pa orientim që harrojmë derën e shtëpisë!

Për atë Evropë të bashkuar sa shqiptarë kanë lënë kockat në kufi duke shkuar në ëndrren e tyre të madhe, sa janë mbytur në detra, sa kanë provuar përvoja të hidhura por monumentale.

Janë miliona shqiptarë që kanë filluar jetën e tyre atje. Në ato lagjet dhe qytetet fantastike evropiane, me kulturën dhe memorjen qindravjeçare, kanë kulturuar fëmijët, kanë ndërtuar jetën dhe kanë sjellë miliarda në atdheun e tyre të parë, Shqipërinë!

Mos bëjmë shakara me ëndrrën e lashtë shqiptare për të qenë e pandarë nga Evropa sepse historia jonë është pjesë e saj, është gjeneruese e vlerës së përbashkët evropiane që brezave të rinj nuk ua thonë.

Toto thuajua!

Ka ardhur koha që në shkolla bashkë me hymnin kombëtar, të këndohet bashkë me Toton : insiemeeeeeeee! Cdo mëngjes!

Përpara sesa të bëhet një këngë e ndaluar!”-shkruan profesor Artan Fuga.