E fundit!

13:47 Live Updates

Karburantet në Shqipëri/ Një krizë besimi mes çmimeve dhe transparencës

Çmimet e karburantit sot dhe roli i sh...

SPAK zbardh skandalin/ Si u rrit tarifa për mbetjet në inceneratorin e Tiranës

2 Gusht 2024, 18:23, Aktualitet CNA

SPAK zbardh skandalin/ Si u rrit tarifa për mbetjet në inceneratorin e

Inceneratori i Tiranës, burimi: CNA

SPAK ka zbardhur detaje nga dosja e parë e inceneratorit të Tiranës, një aferë që shkon në 130 milionë euro.

Inceneratori i Tiranës merr 29 euro/ton mbetje, një shifër kjo e fryrë, pasi inceneratori I Fierit merr vetëm 12 euro/ton mbetje.

SPAK ka zbuluar se si u rrit kjo tarifë në inceneratorin e Tiranës.

Dokumentet e koncesionit i bëri Zoto/ Zyrtarët, “në rresht për një” firmosën pro inceneratorit të Tiranës
2 Gusht, 18:06

Në njoftimin e Prokurorisë së Posaçme thuhet se anëtarët e komisionit të dhënies së koncesionit i morën kostot të gatshme nga studimi i fizibilitetit të kompanisë koncesionare “Integrated Energy BV”, pa kryer asnjë verifikim në lidhje me vërtetësinë e tyre.

Sipas SPAK-ut, rezultojnë të dhëna fiktive të vendosura në studimin e fizibilitetit, të cilët kanë rritur fiktivisht tarifën e depozitimit të mbetjeve nga Njësitë e Qeverisjeve Vendore, 29 euro/ton.

Duke mos marrë në konsideratë të gjitha të ardhurat reale, anëtarët e komisionit vendosën tarifën e caktuar nga “Integrated Energy BV”, pas së cilës SPAK ka theksuar se qëndrojnë Klodian Zoto dhe Mirel Mërtiri.

Fotomontazh - Klodian Zoto dhe Mirel Mërtiri

Në njoftim nënvizohet fakti nëse do të ishin përllogaritur mirë kostos, tarifa për mbetjet do të ishte më e ulët.

“Në lidhje me studimin e fizibilitetit, anëtarët e komisionit të dhënies së koncesionit, Valbona Ballgjini, Pëllumb Abeshi, Erjon Murataj, Sidita Kopliku, Etleva Kondi, Taulant Tusha, Namik Simixhiu, kanë vepruar në kundërshtim me ligjin nr. 125/2013, “Për koncesionet dhe partneritetin publik privat”, si dhe në kundërshtim me VKM nr. 575, datë 10.07.2013, “Për miratimin e rregullave për vlerësimin dhe dhënien me koncesion/partneritet publik privat”, i ndryshuar, përsa i përket përllogaritjeve të kostove në studimin e fizibilitetit, duke i marrë kostot nga studimi i fizibilitetit të shoqërisë propozuese “Integrated Energy BV”, pa kryer asnjë verifikim në lidhje me vërtetësinë e tyre.

Nga aktet e administruara rezultojnë të dhëna fiktive të vendosura në studimin e fizibilitetit, të cilët kanë rritur fiktivisht tarifën e depozitimit të mbetjeve nga Njësitë e Qeverisjeve Vendore, 29 Euro/ton.

Në studimin e fizibilitetit të përgatitur nga Komisioni i Dhënies së Koncesionit, nuk janë marrë në konsideratë të gjitha të ardhurat reale që do të përfitonte shoqëria koncesionare. Këto të ardhura, të cilat nuk janë përfshirë, ndikojnë negativisht në buxhetin e shtetit, pasi nëse do të ishin përllogaritur, atëherë vlera e tarifës që do të duhej të paguanin Njësitë e Qeverisjes Vendore, do të ishte më e ulët. Komisioni i Dhënies së Koncesionit nuk ka përfshirë të ardhurat që do të përfitonte shoqëria koncesionare nga palët e treta për depozitimin e mbetjeve inerte, duke i shkaktuar dëm buxhetit të shtetit. Nëse do të ishin përllogaritur të ardhurat që shoqëria koncesionare do të përfitonte nga palët e treta, si zë të ardhurash në studimin e fizibilitetit, atëherë do të ishte ulur pjesa e mbulimit që do të kryhej nga shteti”, thuhet në njoftimin e SPAK-ut./ CNA