web counter
LEXO PA REKLAMA!

SHKARKO APP

App Store
Google Play

E fundit!

x

Kur turizmi është në rregull, çfarë pati Rama me vlonjatët dhe me çmimet në jug?

2 Gusht 2024, 10:30, Aktualitet CNA
Kur turizmi është në rregull, çfarë pati Rama me
Fotomontazh, kryeministri Edi Rama

Kryeministri Edi Rama doli sot sërish dhe tha se shifrat e turizmit janë mbresëlënëse, ka më shumë pasagjerë se një vit më parë në aeroportin e Rinasit dhe gojët e liga që flasin për rënie të turizmit, janë të qëllimshme.(lexo këtu)

Në fakt, ky është një nga ato stilet e propagandës komuniste, bjeri, t'i biem. Blendi Fevziu nxori një video dy ditë më parë në Gramë, por dikush pretendon se më vonë filmoi një grup turistësh, pra Gramën me më shumë njerëz. Patjetër që kështu do të ndodhë, por që Gramën ta shikosh bosh është e dhimshme dhe Blendi Fevziu nuk kishte ansjë arsye për të gënjyer.

E vërtet sa turistë ka Grama, këtë mjafton të pyesësh ata që ofrojnë shërbimet atje dhe të thonë se sot gjendja është gjysmë për gjysmë me 1 vit më parë. 

Kur turizmi është në rregull, çfarë pati Rama me
Gjiri i Gramës bosh

E njëjta situatë është në Sarandë, e njëjta situatë është në Ksamil, në brigjet e jugut. Ka një problematikë të madhe me turizmin që ka ndodhur për shkak të rritjes së çmimeve dhe këtë na e tha edhe kryeministri në një dalje të tij mediatike disa javë më parë, kur u bënte apel për uljen e çmimeve, apel për çmimet që ne si CNA dhe si biznesmeni Gjergj Luca e kanë bërë me parë, duke thënë se nuk duhet të rriten çmimet se turistët do të ikin. Nuk do të shkojnë të pushojnë në jug. (lexo këtu)

Shifrat flasin vetë, të ardhurat, bizneset janë shumë në ulje. I ngritën çmimet dhe morën një përgjigje nga konsumatorët. Abuzuan edhe një vit më parë dhe kjo nuk duhet mohuar. Fakti është se ka një rënie të shifrave, por kryeministri ynë na i krahason me ardhjet në Rinas. Jo të gjithë që vijnë në Rinas shkojnë për turizëm, apo për të qëndruar në jug të Shqipërisë, në Sarandë, Himarë, Vlorë dhe për të thënë se shpërtheu turizmi. (lexo këtu)

Sivjet ka një ndryshim shumë thelbësor, vijnë turistë nga jashtë për disa arsye, vijnë për të parë familjarët, ndoshta qëndrojnë në vende me kosto më të ulëta, ka një turizëm të theksuar dentar në Shqipëri. (lexo këtu)

Pra, ka me mijëra dhe qindra persona që vijnë dhe qëndrojnë në Tiranë apo në qytete të ndryshme për turizëm dentar. Ka një turizëm estetik. Tashmë ky është fakt për Shqipërinë, ndaj dhe shifrat në Rinas mund të jenë të mëdha, por plazhet në korrik kanë pasur një ulje nga një 1 vit më parë dhe ky është një fakt i padiskutueshëm.

Çfarë pritet të ndodhë me gushtin do ta shohim, por që plazhet kanë problematika, këtë na e ka theksuar edhe vetë kryeministri në daljet e tij, ku ka shprehur pakënaqësinë se ka pasur abuzime me çmimet dhe rritje të tyre dhe nga ana tjetër thotë se turizmi është në rregull. (lexo këtu)

Të dyja me njëra-tjetrën ato nuk shkojnë. Faktet flasin që korriku ka pasur më pak pushues sesa një vit më parë. Kjo është e padiskutueshme. Hyrjet në Rinas mund të jenë të mëdha, por në jug kanë shkuar më pak njerëz.

Këtu kryeministri nuk ka pse kompleksohet, shifrat e hyrjeve në Rinas janë njëri aspekt, por aspekti tjetër është që plazhet kanë pasur problematika dhe vetë operatorët që ofrojnë shërbimet theksojnë se rënia është shumë e madhe në krahasim me një vit më parë. Kjo deri në fund të muajit korrik. Çfarë do të ndodhë me gushtin, duhet parë në vazhdim./CNA 





Lajmet e fundit nga