E fundit!

11:39 Aktualitet

Rama ka ndërhyrë për Ballukun?/ Braho-opozitës: Paraqitini provat në SPAK

Deputetja Elda Hoti në Komisionin për Nismat Qytetare ka d...

Sot nis muaji i shenjtë i Ramazanit/ Kreu i KMSH-së: Jini më solidarë, t’i shtrijmë dorën njëri-tjetrit

23 Mars 2023, 07:37, Aktualitet CNA

Sot nis muaji i shenjtë i Ramazanit/ Kreu i KMSH-së: Jini më

Foto ilustruese

Sot nis muaji i shenjtë i Ramazanit, ku besimtarët muslimanë agjërojnë. Muaji i Ramazanit përfundon më 20 prill, ndërsa nata e Kadrit këtë vit është në datën 17 prill. Falja e Bajramit do të jetë në datë 21 prill.

Muaji i Ramazanit konsiderohet si periudha ku trupi dhe shpirti pastrohen. Çdo vit për Ramazan, myslimanë në të gjithë botën agjërojnë për 30 ditë.

Kryetari i Komunitetit Mysliman të Shqipërisë, Bujar Spahiu, ka ftuar të gjithë besimtarët që të jenë më solidarë me familjet në nevojë, t’i shtrijnë dorën njëri-tjetrit në punë të mira gjatë këtij muaji të bekuar.

Në fund ai u ka uruar të gjithëve një agjërim të lehtë, pranim të lutjeve dhe mbi të gjitha shëndet për të gjithë shqiptarët.

“Gëzuar muajin e bekuar të Ramazanit të gjithë shqiptarëve kudo që janë! Të dashur qytetarë, motra dhe vëllezër, nesër është dita e parë e muajit të bekuar të Ramazanit.

Me rastin e fillimit të muajit të Ramazanit, ju përcjell urimet më të sinqerta që ky Ramazan të jetë muaji i faljes, muaji i begatisë, muaji mirëkuptimit të ndërsjelltë me njëri-tjetrin, muaji i ngritjes morale dhe shpirtërore, për përballimin me sukses të çdo vështirësie që kemi.

Gjatë Ramazanit ju ftojmë të jeni më solidarë me familjet në nevojë, t’i shtrijmë dorën njëri-tjetrit në punë të mira.

Të nderuar besimtarë, çdo gjë gjatë këtij muaji ka vlerë shumëfish më të madhe, prandaj njerëzit përmes sakrificave të shumanshme personale, synojnë të lartësohen shpirtërisht dhe të afrohen më shumë me Zotin.

Gjithashtu ky muaj, është muaji i veprave të bamirësisë që impaktojnë në të gjithë shoqërinë. T'i lëmë anash mospajtimet, mëritë e egoizmin.

Të synojmë të arrijmë vetëm kënaqësinë e Zotit dhe harmoninë me njerëzit, me të cilët rrethohemi. Uroj që ky të jetë muaji i faljes për ne.

Duke ju uruar muajin e Ramazanit më lejoni t'ju dëshiroj një agjërim të lehtë, pranim të lutjeve tuaja, shëndet të mirë, lumturi e prosperitet për ju dhe familjet tuaja”, ka qenë mesazhi i kreut të KMSH-së, Bujar Spahiu.