Skandali me zjarrin në QSUT/ Alimehmeti: Pacientët të rrezikuar, spitali nuk është kolauduar

23 Prill 2024, 15:23, Aktualitet CNA

Skandali me zjarrin në QSUT/ Alimehmeti: Pacientët të rrezikuar,

Ilir Alimehmeti

Teksa kanë kaluar më shumë se dy muaj nga zjarri i rënë në Qendrën Spitalore Universitare "Nënë Tereza", pacientët vijojnë të sorollaten, ndërsa masat e marra për rikthimin në normalitet të shërbimeve janë të vonuara. Në një prononcim për CNA me gazetaren Fabjona Pasho, mjeku Ilir Alimehmeti ka komentuar neglizhencën institucionale.

"Askush nuk kishte një plan emergjence, siç duhet. Aq më tepër ku shkojnë këta pacientë për të marrë shërbimin. Nuk kishte një plan gati, një plan të qëndrueshëm, afatgjatë.

Ju merr ambulanca, ju çon diku dhe thonë, sot nuk e ka ditën ky spital, por ai spitali tjetër. Ne nuk e dimë se ku është urgjenca kirurgjikale sot. Unë jam mjek dhe nuk e di këtë, nuk e kam këtë informacion, nuk e gjej dot. Nga ana tjetër ke edhe një përgjegjësi se ai është i mbushur me personel dhe të sëmurë. Çfarë do të ndodhte nëse kjo do kishte qenë e një përmase më të madhe?

Pati në Tetovë një djegie të një spitali modular, humbën jetën 14 persona dhe u plagosën 50 e ca të tjerë. Fatmirësisht, te ne nuk patëm direkt humbje jete nga zjarri, në atë moment. Por mosdhënia e shërbimit në nivelin më të lartë të mundshëm, mund të ketë shkaktuar dëme në jetë dhe shëndet në vijim, nëpërmjet mosofrimit të shërbimit."

Alimehmeti thekson se spitali u hap pa u bërë koalidimi, ndërsa pasojat mund të kishin qenë fatale.

"Mesa duket, investimi që ata thonin ishte investim në tulla dhe llaç, pra mendojnë se vetëm ndërtesa e bën një spital, dhe jo njerëzit dhe funksionaliteti. Janë mësuar të ngrenë kulla dhe mendojnë se është e njëjta gjë. Unë nuk mbaj mend spitale të tjera të kenë marrë zjarr në këtë lloj mënyre dhe të kenë mbetur jashtë përdorimit në këtë lloj mënyre, me sa kam unë dijeni.

Këtu ka kushte teknike serioze që nuk janë zbatuar, dhe ky spital është vënë në punë pa u koaliduar, ndodhi shumë shpejt defekti."

Por përveç QSUT, Alimehmeti u shpreh se edhe spitali Memorial i Fierit vlon nga skandalet.

"Në maj bëhen 3 vite nga krijimi i Spitalit Memorial Fier dhe bëhet objekt i Kontrollit të Lartë të Shtetit. Po shkoi atje KLSH do keni pafund raporte negative. Drejtoresha e këtij spitali është nën hetim, por nuk pezullohet. Kemi një qeveri fasadë."

Pavarësisht se ministrja e Shëndetësisë, Albana Koçiu, raportoi dy javë më parë në Komisionin e Shëndetësisë dhe Çështjeve Sociale, se puna për rikthimin në normalitet të urgjencës së QSUT kishte filluar, këtë të martë ajo nëpërmjet një videoje në rrjetet sociale, njoftoi se puna ka nisur, ndërsa duket se është ende larg përfundimit, një kosto kjo që bie mbi qytetarët, të cilët kanë nevojë për shërbim urgjent shëndetësor./ CNA