"Sistemet u bënë copë"/ Ferdinad Xhaferaj zbulon dy sektorët më të rrezikuar nga hakërimet iraniane

9 Tetor 2022, 14:42, Aktualitet CNA

Zv.kryetari i Komisioni të Sigurisë, Ferdinand Xhaferaj, pjesë e grupit parlamentar të Partisë Demokratike, në një intervistë për CNA.al me gazetaren Xheni Lekaj ka deklaruar se Komisioni i Sigurisë u ka bërë thirrje titullarëve të institucioneve përgjegjëse. Ai thekson se Komisioni i Sigurisë kishte caktuar një takim me kreun e Shërbimit Informativ Helidon Bendo, ku pritej edhe pjesëmarrja e drejtoreshës së AKSH-it, znj. Mirlinda Karçanaj, por takimi është shtyrë për një moment të dytë.

Pjesë nga intervista:

Gazetarja: A duhet të kishte një “lëvizje” të Komisionit të Sigurisë lidhur me këtë situatë?

Ferdinand Xhaferaj: Ne kemi pritur gjithë skuadrën tonë përgjegjëse, këtë javë kishim kreun e Shërbimit Informativ Shtetëror, mendohej që duhet të vinte edhe titullari i AKSH-it, lidhur me hakërimet iraniane, e kanë shtyrë takimin dhe nuk kanë ardhur. Por nga informacionet e dhëna deri tani, dihet që hakerat iranianë, ndërhynë në të gjitha institucionet që ishin në varësi të qeverisë. Nuk kanë arritur të depërtojnë vetëm në ministrinë e mbrojtjes dhe në shërbimin informative shtetëror, sepse këto institucione kanë sistem mbrojtjeje të dubluar sepse asistohen dhe nga partnerët. Ndërsa të gjitha institucionet e tjera, që janë në varësi të kryeministrit Rama, më fal që ta them në këtë mënyrë, por “u bënë copë”. Kjo është e vërteta.

Gazetarja: Por përse atëherë informacionet që qarkulluan u tha se ishin të "MEMEX", kishte një “keqtitullim” nga ana e hakerave, për të shkaktuar panik?

Ferdinad Xhaferaj: Nuk jam në gjendje t’iu jap përgjigje për këtë, por mund të përgjigjem vetëm për ato gjëra që dihen deri tani.

Sa i takon sigurisë se sistemeve kibernetike, zv.kryetari Ferdinad Xhaferaj ka deklaruar se sistemet nuk ecin paralel sa i takon koordinimit dhe shpejtësisë se sistemeve kibernetike në sektorë të ndryshëm të mbrojtjes, duke cilësuar si sektorët më të rrezikuar nga hakërimi, atë të detarisë dhe ujësjellësve, të cilat sipas tij janë sulmuar dhe që aty është marrë informacion i konsiderueshëm.

Gazetarja: Ju si komision keni ndërmarrë ndonjë veprim, përveç dëgjasave publike?

Ferdinand Xhaferaj: Ne u kemi kërkuar të gjithë titullarëve të institucioneve, të vijnë dhe të raportojnë, kuptohet që ne kemi një strategji të sigurisë kibernetike. Strategjia është hartuar vite më parë, e cila nga mënyra se si është konceptuar, në disa sektorë është e konceptuar drejtë, ndërsa në disa sektorë të tjerë, nuk përcakton një shpejtësi uniforme të të gjithë sektorëve. Nëse strategjia e sigurisë kibernetike, për shmebull në sektorin e energjisë e mbulon le të themi në mënyrë të saktë, në sektorë të tjerë siç është sektori i detarisë, apo mbrojtja e ujësjellësve, shikohet që ecet me shpejtësi shumë më të vogël, pra nuk janë në sinkron të gjithë sektorët. Duke mos qenë në shpejtësi të njëjtë, garantimi i mbrojtjes kibernetike kuptohet se këto janë sektorë që mund të hakërohen fare lehtë dhe mendoj se kjo ka ndodhur./CNA.al