web counter
LEXO PA REKLAMA!

SHKARKO APP

App Store
Google Play

E fundit!

x

Protestë kundër rritjes së qirasë të banesave sociale/ Qytetarët në Korçë: Nuk kemi mundësi ta paguajmë

5 Qershor 2024, 11:10, Aktualitet CNA

Protestë kundër rritjes së qirasë të banesave sociale/

Mëngjesin e sotëm, banorët e Korçës të cilët kanë përfituar banesa sociale nga bashkia, kanë dalë në një protestë përballë këtij institucioni. Rritja e bonusit të qirasë është bërë shkaku i kësaj proteste, ku rreth 100 familje preken nga ky vendim i miratuar disa ditë më parë në Këshillin Bashkiak. Banorët shprehen se ata janë njohur me këtë vendim kur kanë shkuar për të paguar bonusin e qerasë.

"Është bërë indeksimi i qirasë bazuar në indeksin e rritjes së çmimeve, një shifër që ne e marrim nga Instat. Ky indeks i referohet vitit 2018-2023 dhe reflektohet tek qiraja aktuale e vitit 2024. Ne i paraqitëm këshillit bashkiak gjithë materialin bazuar në argumenta objektivë me arsyet pse nuk ishte bërë rritja ndër këto vite. Për arsye se kaloi situata e pandemisë, e cila zgjati goxha. Ne nuk mund ta toleronim më këtë detyrim ligjor. Banorët me këtë indeksim të qirasë janë të njohur sepse e kanë në kontratën e tyre të cilën e rinovojnë çdo vit dhe është në pikën 3 të kontratës, në një paragraf i nenit 3, ku thuhet që niveli i qirasë ndryshon çdo vit me indeksin e korrigjimit të çmimeve që miratohet nga këshilli bashkiak. S'mund të them që preken familje për sa kohë niveli i kësaj qiraje është nën nivelin e qirasë mesatare”, tha Mirela Balli.

Sipas banorëve, ata e kanë të pamundur të paguajnë edhe këtë rritje të qirasë pasi janë me të ardhura minimale nga pensionet ose kempet. Bashkia i ka premtuar privatizimin e banesës në kohën që ata janë strehuar, ndërsa situata vijon të jetë e njëjtë.

"Këto pallate janë ndërtuar nga shtete europiane për të ndihmuar të pastrehët. Ato duhet të ishin falas, kurse ne na i dhane me qira dhe i pranuam. Tani po e ngrejnë qiranë, atje janë të gjithë pensionista të vetëm dhe ata që janë me kemp e skanë mundësi të paguajnë më shumë. Këta po e shtojnë akoma, ku do vejë kjo puna jonë? Garsioneret paguajnë 40 mijë lek, dhomë e kuzhinë 68 mijë lek, 2 dhoma e një kuzhinë 90 e ca mijë. Nuk i përballojmë dot, më shumë i konsumojmë ato 5 lek që marrim për ilaçe."

Në mbledhjen e Këshillit Bashkiak nga këshilltarët e majtë u vendos me shumicë votash rritja e çmimit të bonuseve të qirave të cilat do të jenë 700 lek për garsionieret, 1300 lek për apartamentet 1+1 dhe 1600 lek për apartamentet 2+1. Sqarimi vjen nga shefja e zyrës së strehimit, Mirela Balli, e cila thotë se rritja e qirasë është parashikuar në kontrata ndërsa rritja ka ardhur për shkak të rritjes së indeksit të çmimit të banesave nga instat”, janë shprehur banorët.

Banorët kanë vendosur që të mos paguajnë, duke paralajmëruar edhe grevë. Ndër të tjera, ata janë të vendosur që edhe nëse policia shkon për ti nxjerrë nga banesat, ata nuk do të dalin.

"Jemi atje në ato pallate, jemi me kemp, jemi me pension, dhe nuk kemi, fëmijët i kemi pa punë. Këtu në bashki futen ata që kanë njerëzit, kushërinjtë, nipërit mbesat që kanë. Unë marr 170 mijë lek të vjetra bashkë me burrin. 90 mijë pension dhe 90 mijë ai merr kempin. Tani unë si do bëj? Kam dhomë e kuzhinë, paguaj 68 mijë, tani më thanë 77 mijë, që fillojnë në shkurt, e na shkojnë 150 mijë. Unë nuk kam, po të kisha nuk vija e të qaja këtu. Pse nuk i privatizojnë? Se marrin lekun”, thanë banorët.

"Kur kemi marrë autorizimet për banesat na kanë thënë që 10 vite do qëndrojmë me qira e më pas do privatizohen. Nuk e mbajtën farë fjalën. I kemi bërë 3 herë kartat, i kemi dërguar dhe në Tiranë, hiç asgjë. Nusja vajti dje dhe i kishin thënë që do paguani 73-74 mijë”, deklarojnë më tej.

"Po na bëjnë padrejtësira, pa na venë në dijeni dhe në ç'bazë bazohen këta që i ngrejnë pa lajmëruar gjithë këtë komunitet. Po bëhen shumë pisllëqe në kurrizin tonë, sepse kur ka ardhur vjet kryetari i bashkisë na ka thënë që 10 vite dhe do u privatizohen banesat. Ku është llafi i kryetarit të bashkisë? Po i mashtron gjithë këta njerëz. Kemi aplikuar për privatizim, në fund i kemi bërë parlamentit dhe kryeministrit. E mora përgjigjen dje që është marrë në shqyrtim, po presim. Kërkesën e kam bërë dhe në këshill bashkiak dhe nuk është marrë parasysh, por përgjigjia kthehet në mënyrë abuzive. Asgjë nuk do paguajmë. Atje do rrimë, kush të dojë le të vijë, ne nuk dalim që atje. Presim privatizimin", janë shprehur banorët./ CNA





Lajmet e fundit nga