Policia rri e vështron/ Zhurmëmëdhenjtë e rrugës “tmerrojnë” qytetarët

4 Qershor 2024, 15:35, Aktualitet Xhovan Shyti

Policia rri e vështron/ Zhurmëmëdhenjtë e rrugës

Foto ilustruese

Ndërkohë që në delirin e saj qeveria numëron turistët që vijnë në Tiranë e jo vetëm, ardhja e sezonit Pranverë – Verë ka “shpërthyer” skapamentot e motoçikletave.

E kemi fjalën për fenomenin që prej vitesh është prezent si një armë tmerruese për qetësinë publike të qytetarëve. Dalja e motoçikletave zhurmëmëdha u bashkëngjitet makinave “bisha” me xhama të zinj e skapamento që të çajnë daullen e veshëve dhe acarojnë në maksimum psikikën.

Sikurse xhamat e zinj edhe skapamentot e mëdha janë elementë të sajuar nëpër serviset shqiptare që e ofrojnë këtë shërbim, i cili do të vlerësohej normal nëse nuk do të sillte shqetësim publik masiv. Por që pikërisht për këtë arsye të fundit e bën të ndëshkueshëm ligjërisht, sikurse ndodh në vendet perëndimore.

Ankesat lidhur me zhurmën tmerruese të motoçikletave e automjeteve, që e ndesh nga mëngjesi deri në orët e vonta të natës, janë të shumta e askush nuk vepron. As Policia e Shtetit, që, ndërsa e vlerëson të drejtë shqetësimin e shprehet e gatshme të veprojë, thotë se nuk ka një ligji specifik për të mbështetur aksionet e saj antiskapamento gjëmuese.

“Ndalimin e xhamave të zinj mbi normë e mbështesim në ligjin e 31 tetorit 2019, për zhurmat mbi normë nuk ka asnjë akt specifik”, sqaron një drejtues i Policisë Rrugore, pa dashur të identifikohet.

Nëse do të gërmosh lidhur me përdoruesit e këtyre teknikave torturuese për qytetarët, do të shohësh se, sikurse dhe xhamat e zinj, skapamentot zhurmëmëdha i përdorin “cubat” e rrugës, apo “të fortët”, sikurse i etiketon drejtuesi i policisë.

“Në përgjithësi ata që i përdorin këto skapamento janë kontigjent policie, 'të fortët', siç thoni ju të medias. Ka dhe fëmijë biznesmenësh, politikanësh, qeveritarësh që duan të bien në sy. Për ne s’janë problem t’i bllokojmë, ata prishin qetësinë publike, mjaft të na urdhërojnë që të veprojmë. Mjafton ligji për qetësinë publike”, arsyeton oficeri i Policisë së Shtetit, institucionit që rri e vështron zhurmëmëdhenjtë e rrugës, prishës të qetësisë publike.

Dhe, ndërsa vërtetë nuk ka një ligj specifik që të adresojë përfshirjen e policisë në goditjen e poseduesve të automjeteve zhurmuese, do të mjaftonte Ligji me Nr. 9774/ dt.12.07.2007: “Për vlerësimin dhe administrimin e zhurmës në mjedis”, për të nxitur aksionin bllokues. Në Nenin 1 të këtij Ligji citohet se: “Ka për qëllim mbrojtjen e shëndetit dhe të mjedisit nga zhurmat, duke përcaktuar mënyrën e shmangies dhe masat për parandalimin, reduktimin dhe zhdukjen e efekteve të dëmshme të ekspozimit ndaj tyre, përfshirë bezdinë nga zhurma”.

“Ligji zbatohet për zhurmën, ndaj së cilës njerëzit ekspozohen në mjedisin ku ndodhen, në zona të banuara, në mjedise, në institucione publike, në parqe publike dhe hapësira të tjera, të qeta, çlodhëse, në zona të qeta në natyrë, në institucionet për fëmijë, shëndetësore, arsimore, kulturore, të kultit dhe në mjedise të tjera të ngjashme me to”, dikton pika 1 e Nenit 2 të Ligjit Nr. 9774, ndërkohë që pika 2 përcakton si “rrezikshmëri për shëndetin dhe mjedisin çdo zhurmë, që tejkalon nivelin kufi”. Domethënë nivelin e rrjedhur nga modifikimi i marmitave jo prej fabrikave prodhuese, por prej mjeshtrave të serviseve shqiptare./ CNA