Dorian Alia merr përsipër sulmin i vetëm: Sokol Mëngjesin e dhunova se m'u prek sedra

4 Qershor 2024, 13:44, Aktualitet CNA

32-vjeçari Dorian Alia, një nga autorët e dhunimit të avokatit Sokol Mëngjesi, është shfaqur i penduar në Gjykatën e Tiranës.

“Kërkoj ndjesë për veprimin e pakontrolluar dhe impulsiv ndaj avokatit Sokol Mëngjesi. I kërkoj ndjesë familjes së tij, në veçanti fëmijëve të tij, por edhe opinionit dhe shoqërisë që u prek shumë nga ngjarja. Askujt mos i ndodhtë një situatë e tillë”, mësohet të jetë shprehur Dorian Aliaj.

Në seancën e mbajtur më 1 qershor, i riu nga Tropoja i ka qëndruar versionit se asgjë nuk ka qenë e qëllimshme, e përllogaritur, por gjithçka ndodhi nga gjaknxehtësia dhe se u prek sedra.

Ai ka treguar edhe bisedën mes vjehrrit të tij, Dritan Nanos dhe avokatit Mëngjesi, para se të ndodhte ngjarja e rëndë.

“Qëndrova në distancë dhe ndoqa bisedën me tone jo të përshtatshme nga ana e avokatit për pretendimet e ngritura për pagesat mbi përfaqësimin e kryer. Euforia e moshës, sedra e prekur dhe gjaknxehtësia, më çuan në reagimin e papërmbajtshëm dhe aspak të hijshëm dhe në momentin kur e kuptova situatën u vetëdorëzova në polici”, mësohet të jetë shprehur Dorian Alia.

Dhunimi i avokatit:

Avokati Mëngjesi ndodhet në gjendje të rëndë shëndetësore dhe një ditë më parë u njoftua se do të dërgohej drejt Athinës, për një ndihmë mjekësore më të specializuar.

Mëngjesi, prej 7 ditësh ka qenë në gjendje kome dhe po merr mjekim në Spitalin e Traumës në Tiranë.

Kujtojmë se avokati u sulmua nga disa persona mëngjesin e 29 majit, në kopshtin në zonën e ish-Bllokut. 3 ishin autorët që e dhunuan barbarisht, ndërsa një tjetër person ndihmoi në largimin e tyre nga vendngjarja.

Në pranga janë vendosur porositësi i sulmit, Dritan Nano, si dhe njëri nga agresorët, Dorian Alia. Autorët e tjerë, Romarjo Tabaku, Drivald Alia dhe Elton Kasaj, ndodhen në arrati.

Ngjarja ndodhi pas një konflikti për një çështje prone. Avokati përfaqësoi në gjyq pronarët dhe fitoi çështjen, por më pas ata kanë refuzuar të paguajnë Mëngjesin.

Pasi nuk kanë mundur të bien në dakord, ata kanë kryer sulmin e rëndë ndaj avokatit./ CNA