web counter
LEXO PA REKLAMA!

SHKARKO APP

App Store
Google Play

E fundit!

x

Dhuna ndaj Mëngjesit/ Avokatët në bojkot, pezullohen rreth 200 seanca gjyqësore në Korçë

5 Qershor 2024, 11:02, Aktualitet CNA
Dhuna ndaj Mëngjesit/ Avokatët në bojkot, pezullohen rreth 200
Nevzat Tarelli

Rreth 200 seanca gjyqësore në Korçë do të shtyhen nga bojkoti tre ditor që filloi prej ditës së sotme në të gjitha rrethet e Shqipërisë.

Rasti i dhunimit të avokatit Sokol Mëngjesi është arsyeja kryesore që u vendos ky bojkot, ndërsa avokatia po përballet me një situatë të rënduar.

Sipas kryetarit të Dhomës së Avokatisë Korçë, avokat Nevzat Tarelli,ky vendim erdhi për shkak të sitatuatës me avokatin Mëngjesi. 

"Në emër të Dhomës së Avokatisë Korçë, doja t'i përcillja opinionit të gjerë publik për vendimmarrjen e Këshillit Drejtues të Dhomës së Avokatëve të Shqipërisë, së ditës së djeshme për bojkotim të të gjithë proceseve gjyqësore për një periudhë 3 ditore, duke filluar nga sot, deri të premten. Arsyet e kësaj vendimmarrje vijnë me solidarizimin e rastit të kolegut tonë Sokol Mëngjesi, të cilit gjej rastin para medias për ti uruar shërim të shpejtë. Ky bojkot sot lidhet kryesisht me këtë rast, por jo vetëm. Vendimmarja e Këshillit Drejtues, bazuar në këtë rast, lidhet kryesisht me problematikën që has në jetën reale avokatia sidomos në periudhën e zbatimit të reformës në drejtësi dhe hartës së re gjyqësore. Problematikë që veç shtimit të situatës së rënduar për gjithë popullatën që ka procese gjyqësore, ka sjellë shtim të rënduar të veprimtarisë së avokatëve, që nëpërmjet sa legjislacionit aq edhe qasjes së institucioneve ka suprimuar ndjeshëm rolin e avokatit në proceset gjyqësore. Ka shumë gjëra që kanë të bëjnë me ligjin, që në vlerësimin tonë ka pësuar regres, kryesisht në realizimin e shumë proceseve gjyqësore në dhoma këshillimi pa prezencë të palëve që vetëm procese gjyqësore s'mund të konsiderohen. Kjo ka sjellë vendimmarrjen e këshillit drejtues të dhomës së avokatëve, me një qasje tjetër duke ngritur një grup pune për evidentimin e problematikës dhe adresimin më pas në institucionet përkatëse që janë KLP, KLGJ, Ministria e Drejtësisë, dhe me Komisionin e Ligjeve për të ndërmarrë atë që është më e rëndësishme në pozicionin e avokatit, nismën për krijimin e statusit special të avokatit, që në shumë vende të tjera ky status ju është dhënë avokatëve dhe do të thotë më shumë mbrojtje me ligj për avokatët.

Tarelli shprehet se dhuna fizike dhe psikologjike ndaj avokatëve është bërë një fenomen shqetësues, ndërsa rikujton rastin e avokates Entela Dvorani. Avokatët janë të prekur nga dhuna psikologjike që bëhet nga klientët, për arsye të kohëzgjatjes së proceseve gjyqësore, zvarritjen e seancave por edhe mospranimit në masen 90% të ankimeve.

"Rastet e evidentimit të dhunës mbi avokatët, rasti final ishte ai i Sokol Mëngjesit, por janë evidentuar raste të tjera të dhunës fizike dhe psikologjike në disa avokatë, pra është bërë një fenomen shqetësues. Në Korçë ka qenë vetëm 1 rast i njohur, ai i avokates Entela Dvorani, i cili është zgjidhur edhe me vetë vullnetin e avokates brenda asaj zyre. Rastet e evidentimit të avokatit si përgjegjës për mosfunksionimin e sistemit gjyqësor janë të shumta, pra pala problematikën e adreson tek avokati që lidhet me kohëzgjatjen e proceseve, zbardhjen e vendimeve, ankimet, por edhe në raport me instutucionet ku ata janë të detyruar të çojnë vendime të formës së prerë. Dhunë psikologjike padiskutim që ekziston tek avokatët, që vjen edhe nga klientët që lodhen me kohëzgjatjen e procesit gjyqësor me mosarsyetimin në kohë të vendimeve, zvarritjen e seancave gjyqësore, funksionimin e hallkave të tjera kryesisht në Gjykatën e Apelit dhe Gjykatën e Lartë, sidomos kjo problematikë lidhet me trajtimin që gjykatat e niveleve të larta i bëjnë ankimeve në dhoma këshillimi që në 90% të rasteve janë mospranim i ankimeve", u shpreh ao. 

Avokatët e dhomës së avokatisë Korçë, por edhe ata të rretheve të tjera, ndodhen përballë një situate të vështirë, ndaj Tarelli bën apel drejt instancave për marrjen e masave.

Pas këtij bojkoti 3 ditor që do të përfundojë ditën e premte, do të shihet në vazhdimësi situata, duke u zhvilluar sërish mbledhje për të diskutuar më tej qëndrimin që do të mbajnë avokatët./CNA 





Lajmet e fundit nga