Prindërit e nxënësve të kopshtit "Zubeyde Hanim", në protestë/ "Morët shpërblime për të mbyllur shkollën"

12 Nëntor 2022, 18:14, Aktualitet CNA

Prindërit e nxënësve të kopshtit "Zubeyde Hanim",

Prindërit e fëmijëve të kopshtit "Zubeyde Hanim", i janë bashkuar protestës së Partisë Demokratike, ku janë shprehur se mbyllja e shkollës rriti pakënaqësinë dhe dyshimet rreth këtij vendimi, vuri në provë drejtësisë "e pavarur".

Bealba Meta, një nga prindërit e këtyre nxënësve, u ka bërë thirrje ministres së Arsimit Evis Kushi dhe kryeministrit Edi Rama, që t'u japin një shpjegim fëmijëve të tyre për këtë padrejtësi.

Në fjalën e saj ajo u shpreh se qeveritarët kanë marrë shpërblime për mbylljen e kopshtit.

Bealba Mata:

Të nderuar liderë të opozitës,
Të dashur vëllezër e motra,

Unë jam Bealba, nëna e një djali 5-vjeçar, kopshti i të cilit u mbyll në mënyrën më të dyshimtë që njeh ndonjëherë historia e vendeve demokratike.
Kopshti "Zubeyde Hanim" u mbyll pas një periudhe të gjatë inspektimesh e kontrolle të shtuara, si nga Drejtoria e Përgjithshme ashtu dhe ajo Rajonale e Arsimit Parauniversitar.
Zvarritjet proceduriale, ishin përgjigjet e vazhdueshme që mori kopshti në çdo veprim, me qëllim përmbushjen e rekomandimeve të lëna nga zyrat arsimore. Duke kulmuar kështu, me mbylljen përfundimtare të kopshtit në fillim të vitit arsimor 2022-2023.
Gojëdhënat thonë, se në mbylljen e kopshtit, u investuan liderë të mëdhenj botërorë. Thonë madje, se mbyllja u kërkua si kusht i një marrëdhënieje të ngushtë e të mirë midis popujsh. A thua se kjo e fundit qe cenuar nga kënga e gëzimi i fëmijëve 3-6 vjeç?
Por Qeveria i mëshoi, sipas saj, parregullsive që u evidentuan. Parregullsi, të cilat, përveç ne prindërve "të verbuar", i madh e i vogël që hyri në atë kopsht, nuk i pa, veç lupës së kontrollorëve të Ministrisë, të cilët kurrë nuk u dukën vetë në ambientet e kopshtit.

Kjo shfaqje e shëmtuar përveçse na rriti pakënaqësinë dhe dyshimet rreth këtij vendimi, vuri në provë drejtësisë e "pavarur".
Ndërkohë që fëmijët tanë presin, por pa harruar të protestojnë çdo ditë në shtëpitë e tyre, tanimë me zë të lodhur e të mekur kërkojnë: "dua kopshtin tim".
Dil z. Kryeministër dhe na thuaj si t'u përgjigjem lutjeve të tim biri kur thotë: dua të shkoj në kopshtin tim!
Dil znj.Kushi, na shih në sy e na trego si ta bindim djalin tim të mendojë ndryshe, kur ai këmbëngul ta çoj në kopsht për të parë sa e madhe dhe e bukur është klasa e tij!
Çfarë ngushëllimi të gjej kur pas çdo fjale e të bërtiture atij i rrjedhin lot? Dhe unë ndihem kaq e pafuqishme.
Dilni ju zyrtarë të Ministrisë, që krekoseni me detyrat e reja që morët si shpërblim i mbylljes, a thua se shpëtuat fatet e Shqipërisë në greminë!
Dilni sot, ose heshti përgjithmonë!
Heshtjen sot drejtësia juaj mund t'jua falë, por të bindur jini, se fëmijët tuaj dhe historia nuk do ta bëjnë.

Faleminderit!