web counter
LEXO PA REKLAMA!

SHKARKO APP

App Store
Google Play

E fundit!

x

“Peza shkarkon masivisht gazetarët”, Zhupa: Do ta bëjë RTSH-në kazermë

15 Gusht 2023, 11:58, Aktualitet CNA

“Peza shkarkon masivisht gazetarët”, Zhupa: Do ta

Deputetja e Partisë Demokratike, Ina Zhupa, në një deklaratë për mediat, tha se drejtori i RTSH-së, Alfred Peza, po shkarkon gazetarët dhe stafin për ta kthyer atë në një kazermë që u bindet urdhrave absurde të tij.

Zhupa thotë se klima e krijuar në RTSH me pushimet masive, punësimin e njerëzve që kanë punuar si vartës të Pezës në "Alpenews" apo në "Ora", njerëz me lidhje familjare dhe shoqërore me të, e bëjnë edhe më dramatike situatën.

Shqipëria po vjen me rënie sa i përket indeksit të lirisë së medias dhe këto ngjarje vetëm e përkeqësojnë situatën, sipas Zhupës.

Deklarata e plotë:

"Që nga zgjedhja e paligjshme në krye të RTSH-së, në emër të Partisë Demokratike, kam denoncuar të gjitha shkeljet ligjore për caktimin me porosi të Alfred Pezës si drejtor i RTSH-së. Qendrimin e tij si drejtor i paligjshëm, po e shoqëron edhe me vendime të paligjshme për shkarkimin e gazetarëve dhe stafit pa asnjë arsye, vetëm e vetëm për ta kthyer atë në një kazermë që u bindet urdhrave absurde të tij.

Unioni i Gazetarëve Shqiptarë vendime të tilla ekstreme i konsideron arbitrare dhe që përbëjnë një klimë tensioni, presioni dhe ndëshkimesh ndaj gazetarëve, aq më tepër në kushtet kur në këtë institucion nuk ekzistojnë përfaqësime sindikale dhe struktura dialoguese mes administratorëve dhe entiteteve profesionale apo punonjësve që largohen. 

Ricardo Gutierrez, Sekretari i Përgjithshëm i Federatës Evropiane të Gazetarëve, EFJ, shkroi në "Twitter" se nga këto shkarkime ishin “të alarmuar” për shkarkimet “arbitrare”.

Shqetësimi që kanë ngritur BIRN, Safe Journalist, shoqatat e gazetarëve, vetë gazetarët e prekur kanë gjithë mbështetjen tonë.

Klima e krijuar në RTSH me pushimet masive, punësimin e njerëzve që kanë punuar si vartës të Pezës në "Alpenews" apo në "Ora", njerëz me lidhje familjare dhe shoqërore me të, e bëjnë edhe më dramatike situatën. Një televizion që mbahet me taksat e shqiptarëve, po kthehet në një televizion privat për qokat e Pezës, duke cenuar gazetarinë dhe profesionalizmin. 

Drejtori që merret nga karriget, te skaleta e lajmeve, te festivali dhe te koshat e plehrave, që vendos kamera përgjimi dhe numëron gotat e ujit, nuk është modeli i drejtorit profesonist që u përgjigjet nevojave për ta kthyer RTSH-në në një televizion të shikueshëm.

Në emër të Partisë Demokratike dhe opozitës i bëj thirrje Këshillit Drejtues, si organ që monitorohet nga Kuvendi, të rikthejë ligjshmërinë brenda RTSH-së, të ndalë shkarkimet e padrejta dhe të rihapë garën për drejtor të RTSH-së.

Gjithashtu, i bashkohemi thirrjes së Unionit të Gazetareve që OSBE të monitorojë situatën.

Shqipëria po vjen me rënie sa i përket indeksit të lirisë së medias dhe këto ngjarje vetëm e përkeqësojnë situatën dhe tregojnë qartë vullnetin politik për të shkatërruar median dhe për të kontrolluar çdo gjë politikisht."/ CNA

 





Lajmet e fundit nga