web counter
LEXO PA REKLAMA!

SHKARKO APP

App Store
Google Play

E fundit!

x

Lëmshi i Sokol Sadushit me mandatet e kupolës së sistemit të drejtësisë

9 Nëntor 2025, 12:46, Aktualitet CNA

Lëmshi i Sokol Sadushit me mandatet e kupolës së sistemit të

Në maj të vitit 2020, Sokol Sadushi do emërohej anëtar i Gjykatës së Lartë. Me një mandat 9 vjeçar, Sadushi, prej tetorit 2023 mban edhe postin e Kryetarit të Gjykatës së Lartë.

Sokol Sadushi sot është 63 vjeç, por që tani po mendon për atë që do bëjë kur të mbushë 67 vjeç. Pra në ditën që mandati i tij si Anëtar i Gjykatës së Lartë mbaron, Sokol Sadushi do të jetë 67 vjeç. Në atë moshë ka edhe 3 vjet për të mbushur moshën e pensionit.

Ka shumë hipoteza, sipas së cilave, Sadushi po synon mandat në Gjykatën Kushtetuese.

Që kjo të ndodhë, kriteret ligjore duhet të heqin kushtin e moshën së daljes në pension në moshën 70 vjeçare për Sadushin. Ky kusht është i njëjtë si për anëtarin e Gjykatës Kushtetuese, ashtu edhe për atë të Gjykatës së Lartë.

Dhe Sadushi, në emër të Gjykatës së Lartë, ka propozuar edhe heqjen e kufirit 70 vjeç në këto 2 gjykata.

A po e shantazhon Sadushi kryeministrin Rama me nevojën e vet të pavdekësisë në karriket e drejtësisë ose jo, kjo i mbetet Ramës ta vendosë në peshore.

Por sulmi ndaj Gjykatës Kushtetuese për “pushtimin” e karrigeve të asaj gjykate nga zëdhënës ose lajkatarë të Sadushit, ka në çdo rast pamjen e interesave private të Sokol Sadushit të lidhura me sistemin dhe jo të nevojave të njerëzve për drejtësi.

Për nevoja private të Sadushit, që lidhen me ndikimin e tij në sistem, ai stisi një dorëheqje të një anëtareje, mandati i të cilës nuk përfundonte  në 2025. Por njëjtë me të ishte mandati i Holta Zaçes dhe Sonila Bejtës ama!

Me justifikimin e një dispozite që e kishte shuar vetë kur kishte ndryshuar me gabime Kushtetutën, Sadushi stisi vakancën e krijuar me dorëheqjen e një vasaleje për të arritur tek justifikimi i nevojës për ripërtëritje të Gjykatës.

6 muaj pas dorëheqjes së "Elsaaaa", Sokol Sadushi nisi sulmin kundra mandatit të Holta Zaçes. Gjykata Kushtetuese u detyrua të mblidhej dhe t'i ndërpriste mandatin Holta Zaçes.

Pastaj Sadushi priti 3 muaj që të niste gërmimet për mandatin e Sonila Bejtës.

Por në këtë pikë hasi në mermerin e godinës së Presidentit, i cili duke mos vijuar lojën e Sokol Sadushit, iu drejtua vetë Gjykatës Kushtetuese me kërkesë për vendimmarrje.

Gjykata Kushtetuese u vërtit plot 10 muaj si "parfumi" nëpër të mbathura, përpara se të merrte në shqyrtim kërkesën e Presidentit. Pasi kishin shkurtuar mandatin e Holta Zaçes, ‘qyqarët’ e tjerë u detyruan të shkurtonin edhe mandatet e vetes. Sadushi qetësoi secilin prej tyre me premtime karriere.

Kështu, Sonila Bejtës, sipas vendimit të Gjykates Kushtetuese të tetorit 2025, i paskësh mbaruar mandati që në prill të vitit 2025. Presidenti e kishte bërë kërkesën në janar të këtij viti. Mandati i Bejtës përfundonte (sipas tyre) në prill, por ata e lanë ta shqyrtonin kërkesën në tetor.

Këta janë Gjykatësit tanë kushtetues!

Kushtetutën dine t'a lexojnë, por kanë vetëm pak problem, që të kuptojnë si lexohet kalendari.

Bejtës, sipas këtyre kalendarxhinjve të tetorit, i ka mbaruar mandati në prill 2025. Elsa Toskës, i kanë llogaritur se i ka mbaruar mandati në vitin 2025, pasi Elsa kishte ikur në drejtim të paditur. Holta Zaçaj vazhdon pret zëvendësuesin, megjithëse sipas Kushtetueses mandati i saj mbaroi në mars 2025.

Për këtë karrige, Sadushi falsifikoi dokumentat zyrtare të Kushtetueses, duke shpallur humbëse Naureda Llagamin. Në vend të saj, nisi Asim Vokshin, që pas 3 viteve në detyrë, braktisi edhe ky një mandat 9 vjeçar. U mërzit në Gjykatën e Lartë? Pse Asim Vokshi e shkurtoi me 6 vite mandatin e vetes në Gjykatën e Lartë?

Mandati i Ilir Toskës sipas Kushtetueses llogaritet të përfundojë në shkurt 2028. Kjo do të thotë që ai do të qëndrojë në detyrë 3 vjet më pak se sa mandati 9-vjeçar. Toska del me minus 3 vjet nga mandati. Xhaferllari sipas Kushtetueses duhet të largohet nga detyra në tetor 2027, i hiqet një vit nga mandati. Papajorgji, sipas vendimit të Kushtetueses, largohet nga detyra në dhjetor 2027. Pra minus 1 vit nga mandati. Marjana Semini do përfundojë detyrën në janar 2031, që do të thotë 11 muaj para kohëzgjatjes normale të mandatit të saj, pra minus 11 muaj. Ibrahimi sipas Gjykatës Kushtetuese do ta mbyllë mandatin në nëntor 2030, pra minus 11 muaj. Sandër Beci përfundon mandatin në vitin 2028.

Nëse arrijmë në fund dhe bëjmë një kalendar, atëherë në Gjykatën Kushtetuese aktuale:

3 mandate përfundojnë në vitin 2025, 2 mandate në vitin 2027, 2 mandate në vitin 2028, 1 mandat në vitin 2030, 1 mandat në vitin 2031.

Ky është kalendari i miratuar së fundmi nga Gjykata Kushtetuese.

Për momentin, asnjë mandat nuk mbaron në 2029, kur i mbaron mandati Sadushit në Gjykatën e Lartë.

Por edhe kalendari ndryshon! Varet si e lexon./CNA





Lajmet e fundit nga