web counter
LEXO PA REKLAMA!

SHKARKO APP

App Store
Google Play

Përdorimi i Gjykatës së Lartë nga Sadushi si oxhaku i shtëpisë së vet

6 Nëntor 2025, 15:09, Aktualitet CNA

Përdorimi i Gjykatës së Lartë nga Sadushi si oxhaku i

Gjykata e Lartë është përdorur publikisht, të paktën 3 herë vetëm brenda këtij viti, si koperturë e makinacioneve të Sokol Sadushit.

U përdor si koperturë e falsifikimit, që Sokol Sadushi i bëri votimit dhe procesverbalit të përzgjedhjes së kandidaturave për një post në Gjykatën Kushtetuese, emërtesë e Gjykatës së Lartë. Në atë rast nga regjistrimet audio kuptohej qartë që vendimi ishte marrë nga Sadushi, kurse anëtarët e komisionit teknik ishin thjesht zëdhënës të tij.

Ai vendim u takonte anëtarëve të Gjykatës së Lartë, jo komisionit teknik dhe në audio dëgjoheshin edhe kontestime të skualifikimit të votës për Naureda Llagamin.

Por dokumentet e prodhuara nuk reflektonin votë kundër. Duhet të bëhet e qartë që dokumentacionet, përfshirë procesverbalin e votimit të anëtarëve, janë dokumente që prodhohen më pas. Pa kamera dhe pa audio.

Anëtarët që aty për aty kontestuan vlerësimin si të pavlefshme të fletës, rrugës kanë ndërruar mendje, apo dokumentet nuk përmbajnë fare të dhëna për kontestimin e shpalljes së pavlefshme të asaj vote?

Zonja Llagami e ka ankimuar vendimmarrjen në Gjykatën Kushtetuese, por ky është hetim për SPAK-un e jo çështje administrative nga ato që Sadushi preferon t’i zgjidhë në Gjykatën Kushtetuese.

Mbetet që në këtë rast, Sokol Sadushi foli, zgjodhi, kontestoi dhe vulosi në emër të Gjykatës së Lartë. Askush nuk i doli kundër!

 

Rasti i dytë është ai kur Sokol Sadushi hartoi, publikoi në media dhe i ushtroi presion publikisht Gjykatës Administrative, që Llagami të humbte gjyqin. Nuk ka dyshime që është Sadushi që i ka shkruar edhe vendimin gjyqtares së Gjykatës Administrative.

Ai vendim shkruan praktikisht që vendimi i Sadushit për skualifikimin e Llagamit, është i paankimueshëm.

Ka vendim të paankimueshëm? Apo nuk ka asnjë përveç atyre që shkruan Sadushi?

Çështja shqyrtohet shumë shpejt në Gjykatën Kushtetuese dhe mbase atje Sadushi do të shkruajë ndryshe dhe e konsideron të ankimueshëm, vetëm në Gjykatën Kushtetuese çdo letër që prodhon vetë, por mbetet fakti që Sadushi edhe në atë rast e përdori Gjykatën e Lartë si pronën e tij. Kurse presioni i ushtruar publikisht është temë për SPAK-un e jo për gjykatën popullore që shkon pas berihajit të “agjenturës” së Sadushit në media.

Rasti i tretë lidhet me prononcime të Sokol Sadushit mbi një projekt të një Kodi të ri Penal. Në çdo tryezë ku diskutohet ai projekt, Sokol Sadushi gënjen publikisht. Bile është sistematik në gënjeshtrat e veta.

Përtej arsyetimit që kush gënjen publikisht nuk e ka problem të falsifikojë kur është në zyrë të vet, Sadushi edhe kur gënjen, gënjen në emër të Gjykatës së Lartë.

Dhe asnjëri nga anëtarët e Gjykatës së Lartë nuk prononcohen. As anëtari që ka marrë pjesë në konsultimet e projekt-kodit të ri Penal.

Pse ndodh kjo?

Pse Sokol Sa-dush-i përdor rregullisht Gjykatën e Lartë si mall të dyqanit të vet dhe të tjerët heshtin?

Sadushi i ka vënë në rresht apo të gjithë anëtarëve të tjerë u leverdis që të fshihen pas Sadushit?

Për momentin duket sikur po fshihen të gjithë pas Gjykatës së Sadushit që shqyrton vetëm 19% të çështjeve penale dhe 26% të çështjeve administrative, të cilat i përzgjedh kriteri "Sadushi e di se si"./CNA





Lajmet e fundit nga