web counter
LEXO PA REKLAMA!

SHKARKO APP

App Store
Google Play

E fundit!

x

Veliaj si kavje, që çifti Sadushi-Xhafaj po e përdorin për t'i kërcitur dhëmbët Ramës

6 Nëntor 2025, 14:21, Aktualitet CNA


Shpallja e vendimit të Gjykatës Kushtetuese, sefte u shoqërua me fishekzjarret e shtrenjta që u plasën përtej dritareve të ambienteve, ku kryebashkiaku qëndron me masë sigurie.

Kur avokatucët e lëshuar studiove nga Sokol Sadushi pështynin mbi gjithë ata që Sadushi, (dhe jo Erion Veliaj), paracaktonte si kundërshtarë të tij, Rama orientonte përqendrimin e sulmeve kundër dekretit të Presidentit.

Në këtë gjullurdi, ku secili zgjidhte jo temën, por kë kishte inat e meqë i ra rasti e sulmonte, Erion Veliaj nuk ishte protagonist.

Erion Veliaj është lënë në burg nga Gjykata e Lartë e Sokol Sadushit.

Ndryshe nga 81% e shqiptarëve, (mes tyre ka me siguri shumë që ankimojnë masën në regjim paraburgimi si Veliaj), Sokol Sadushi zgjodhi që Erion Veliajt t'ia certifikonte masën e sigurisë me burg me vendim të Gjykatës së Lartë.

Sokol Sadushin nuk e ha meraku për Erion Veliajn!

Kur orientoi Fatmir Xhafajn dhe avokatët e Veliajt drejt depozitimit të ankimimit kundër shkarkimit në Gjykatën Kushtetuese dhe jo atë Administrative, Sokol Sadushi nuk po mendonte për hallin e Erion Veliajt.

Gjykata Administrative është sjellë rregullisht si vasale e Sokol Sadushit. Në rastin e konfliktit me Naureda Llagamin, Sokol Sadushi e shkroi vetë vendimin e asaj gjykate kundër Llagamit.

Sokol Sadushi e ka dhe e shpall si krenari profesionale ndikimin mbi Gjykatën Administrative. Sadushi nuk ndalet pa e treguar me gisht sa herë që e bën.

Atëherë pse vendimin e Këshillit të Ministrave e devijoi drejt Gjykatës Kushtetuese?

Një vendim i Gjykatës Administrative do të mund të përfundonte në rast ankimimi, në Gjykatën e Sadushit të Lartë. Te Gjykata që e la në burg Veliajn! Te tavolina e Sokol Sadushit, pra!

Do t'i takonte prapë Sadushit që ta linte të shkarkuar Veliajn siç e la në burg? Me shumë gjasë po. Sadushi ka lindur ditën e skuthave dhe kjo ditë është ditë e preferuar, që shumë si Sadushi zgjedhin të dalin në dritë.

Njohësi i termit "forum shopping", kur shkruan ankimimet kundër Llagamit, përdori skemën "forum shopping" kur orientoi avokatët e Erion Veliajt drejt Gjykatës Kushtetuese.

Sokol Sadushin nuk e ha meraku për Erion Veliajn. Nuk i dhimbset fare Erioni! Aq më pak i dhimbset Fatmir Xhafajt.

Na rezulton se në betejën për vendimin e Këshillit të Ministrave, Sokol Sadushi u investua maksimalisht me çdo mjet dhe premtim për karrierë, me çdo gatishmëri për çdo hall të secilit anëtar të Gjykatës Kushtetuese që do të votonte për atë tekst që do të shkruante Sadushi. "Për gjithë jetën"!

Dispozita që u përdor për shkarkimin e Erion Veliajt tanimë është bërë qesharake nga vendimi i pesë lolove të Sadushit në Gjykatën Kushtetuese. Pak gjasa ka që ajo dispozitë të përdoret ndonjëherë sërish. Qëkur është miratuar i ra rasti të përdoret veç për Veliajn. Një herë në 20 vjet!

Kurse dyshja Sadushi-Xhafaj, me konfliktin Rama-Veliaj, ishin thjesht duke matur forcat.

Janë thjesht duke i treguar Ramës që kontrollojnë sistemin.

Që kanë në dorë edhe burgun e Ramës nëse vjen dita.

Nuk po luanin kaq fort për Veliajn!

Erion Veliaj është thjesht një kavje e shëndetshme, e denjë për testet e dyshes Sadushi-Xhafaj, që shijuan edhe fishekzjarret. Ndryshimi është që Veliaj fishekzjarret i pa nga ana tjetër e dritares./CNA





Lajmet e fundit nga