Kush e prodhoi "fake news"-in për ekstradimin e Arben Ahmetajt?

17 Nëntor 2025, 15:36, Aktualitet CNA

Sot është prodhuar një lajm, çuditërisht një "fake news", në ditën kur zhvillohet dhe shtyhet gjyqi i Erion Veliajt.

Lajmi u publikua fillmisht nga "Report TV" dhe më pas u shpërnda me shpejtësi në mediat e tjera.

Janë të shpeshta lajmet që ndodhin rastësisht dhe pikërisht në datat ku zhvillohet ndonjë seancë për Veliajn.

E njëjta gjë ndodhi të premten e 31 tetorit kur Veliaj raportonte në Gjykatën Kushtetuese, mediat që i mbajnë ison kryebashkiakut shpërthyen lajmin e zëvendëskryeministres Belinda Balluku në SPAK.

I njëjti skenar ndodh dhe sot. Ndërsa zhvillohej gjyqi për Veliajn, prodhohet një lajm, një kërkesë për ekstradim për Arben Ahmetajn.

CNA bëri një kërkim në faqen zyrtare të Ministrisë së Drejtësisë dhe pamë që nuk kishte asnjë njoftim në lidhje me këtë çështje, po ashtu iu drejtuam dhe Ministrisë së Drejtësisë ku burime zyrtare konfirmuan se nuk ka një kërkesë të tillë të tanishme.

Sipas verifikimeve të bëra, kërkesa për ekstradim është bërë në vitin 2023 dhe kërkesa për ekstradim bëhet vetëm një herë.

Pse u prodhua ky "fake news" sot pikërisht në ditën e gjyqit të Erion Veliajt?

Kush e prodhoi? Pasi u shpërnda të gjitha mediat, edhe ne fillimisht ramë pre e kësaj gracke.

Një lajm i pavërtetë, që merr rëndësi shumë të madhe për të tërhequr vëmendjen nga një gjyq shumë i rëndësishëm.

Dhe, ajo që tashmë duket është që Erion Veliaj shtyn dhe shtyn seancat pa fund, nuk shkon të përballet me akuzat, ndërkohë që ka katër muaj që i kanë shkuar akuzat në gjykatë.

Brenda katër muajsh me bashkëpunimin e tij dhe të avokatëve, gjyqi mund të kishte mbaruar, por vazhdon i shtyn.

Pikërisht kur lajmi i parë duhet të jetë pse shtyhen gjyqet për Veliajn, shpërthen një "fake news".

Dhe ngelet në hije lajmi që Erion Veliaj kërkon shtyrjen e gjyqeve. Nga ana tjetër, del dhe na thotë publikisht se është pa akuzë, mbahet peng në burg, ndaj tij s'ka drejtësi, etj.

Kur në fakt gjyqi është zhvilluar sot dhe vëmendjen nuk e ka gjyqi i tij, por ai e humbet vëmendjen sepse "pa dashje" dalin "fake news"-e.

Një herë për Arben Ahmetajn, një herë për një rast tjetër, një herë për një tjetër arsye.

Kështu do të ndodhë edhe kur të jetë një gjyq tjetër për Veliajn, pasi qëllimi i vetëm është që të mos shpërndahet lajmi dhe qytetarët të mos e marrin vesh që nuk është zhvilluar gjyqi dhe Erion Veliaj ka bërë shtyrjen e tij të radhës.

Dhe për këtë lehtësisht shpiken "fake news"-e të ndryshme./ CNA