Kreu i SPAK-ut, Braho takim në Bruksel/ Fokusi tek antikorrupsioni dhe drejtësia në Shqipëri

25 Shkurt 2026, 09:15, Aktualitet CNA

Kreu i SPAK-ut, Klodjan Braho, është thirrur më 3 mars në Bruksel në një takim ku diskutohen çështjet e drejtësisë dhe antikorrupsionit në vendin tonë.

Në agjendën e miratuar të martën pasdite nga ambasadorët e 27 shteteve anëtare thuhet se takimi i 7-të i Komitetit të Drejtësisë dhe Sigurisë do të përqendrohet në reformat kritike të integrimit, konkretisht në sigurimin e pavarësinë se Gjyqësorit, sundimin e ligjit, si dhe veprimet konkrete kundër korrupsionit dhe krimit të organizuar. Në materialin paraprak theksohet gjithashtu se Shqipëria duhet që të vijojë përpjekjet e saj për të forcuar zbatimin e ligjit, përafrimin e politikave të vizave dhe menaxhimin e emigracionit të paligjshëm.

Rezultatet operacionale kërkohen gjithashtu në luftën kundër krimit të organizuar, trafikimit të drogës, veçanërisht kundër kultivimit të kanabisit, dhe për të parandaluar pastrimin e parave. Prokurori i Përgjithshëm, Olsian Çela, pritet të jetë gjithashtu i pranishëm në këtë takim.

Ky takim shihet si një test provë për rezultatet konkrete që zyrtarët shqiptarë do të paraqesin përpara se shtetet anëtare të BE-së të vendosin nëse do t'i japin dritën jeshile raportit paraprak IBAR për Shqipërinë që ka të bëjë me zbatimin e kritereve të kapitujve 23-24 që përfshijnë pavarësinë e Gjyqësorit, një raport pa aprovimin e të cilit nuk nis procesi i mbylljes së grupkapitujve të negociatave të pranimit.

Sipas zyrtarëve europianë, roli i SPAK-ut dhe GJKKO-së dhe pavarësia e tyre në hetimin, ndjekjen penale dhe gjykimin e rasteve komplekse të korrupsionit dhe krimit të organizuar është një gur themeli i reformës në drejtësi të vitit 2016. BE-ja mbështet dhe promovon konsolidimin e vazhdueshëm të kësaj reforme si një pjesë integrale e negociatave të pranimit të Shqipërisë.

SPAK-u ka kontribuuar në përpjekjet e përgjithshme të Shqipërisë për të siguruar një historik të besueshëm kundër korrupsionit dhe krimit të organizuar, si dhe përfshirjen e zyrtarëve politikë të nivelit të lartë në këto akte.

Gjithashtu kërkohet të rritet efektiviteti i verifikimit të deklaratave të pasurisë të paraqitura periodikisht nga zyrtarët shtetërorë. Komisioni Europian gjithashtu kujton nevojën për të adresuar rekomandimet e pazgjidhura të GRECO-s. Komisioni Europian inkurajon krijimin sa më shpejt të jetë e mundur të një Observatori Kombëtar të Drogave, i cili duhet që të jetë plotësisht funksional dhe i pajisur me burime të mjaftueshme financiare.