web counter
LEXO PA REKLAMA!

SHKARKO APP

App Store
Google Play

Eurodeputeti “grusht” në fytyrë propagandës së Veliajt/ Schieder për CNA: SPAK, rol vendimtar në luftën kundër korrupsionit

19 Shkurt 2026, 14:31, Aktualitet CNA
Eurodeputeti “grusht” në fytyrë propagandës së
Foto ilustruese, Erion Veliaj dhe Andreas Schieder

Një skemë e mirëfilltë e dezinformimit dhe tentativës për të manipuluar opinionin publik përmes emrave të zyrtarëve të lartë të Bashkimit Europian është pasqyruar këtë të enjte nga CNA.

Gjithçka nisi me një shkrim të publikuar në portalin "EU Reporter", i cili tentonte të ngrinte një alibi ndërkombëtare për kryebashkiakun e Tiranës, Erion Veliaj, duke e paraqitur arrestimin e tij për korrupsion dhe pastrim parash si një "persekutim politik".

Ky shkrim pretendonte se mbajtja në paraburgim e Veliajt ishte një shkelje e rëndë e shtetit të së drejtës dhe se institucionet ndërkombëtare kishin "shqetësime serioze" për metodat e përdorura nga SPAK. 

Në këtë narrativë të ndërtuar, propaganda u përpoq të keqpërdorte edhe emrin e raportuesit për Shqipërinë në Parlamentin Europian, Andreas Schieder, duke interpretuar thirrjet e tij për drejtësi dhe të disa europarlamentarëve të tjerë si kritika ndaj organit të akuzës. Por faktet tregojnë një të vërtetë tjetër.  

Pas interesimit të drejtpërdrejtë të CNA pranë "EU Reporter", vetë portali ka mbajtur një qëndrim distancues, duke bërë me dije se shkrimi ishte kontribut i një gazetari të jashtëm dhe nuk përfaqësonte linjën editoriale të tyre, duke hequr përgjegjësinë nga pretendimet që tentonin të mbronin Veliajt.

Goditja përfundimtare për këtë skemë erdhi përmes një komunikimi ekskluziv zyrtar që zyra e Andreas Schieder i ka dërguar CNA.

Në përgjigjen e tij, Schieder i jep një mbështetje pa rezerva strukturës speciale, duke deklaruar se:

“SPAK po luan një rol vendimtar në luftën kundër korrupsionit në Shqipëri dhe tregon se qeveria shqiptare po e merr këtë detyrë shumë seriozisht. Puna e tyre është thelbësore për një qasje konsekuente në përmbushjen e reformave të kërkuara për para-anëtarësim. Megjithatë, ne duhet të sigurohemi që hetimet e nevojshme të pasohen nga procese të shpejta", thotë Schieder për CNA-në.

Eurodeputeti “grusht” në fytyrë propagandës së
Komunikimi ekskluziv zyrtar që zyra e Andreas Schieder i ka dërguar CNA

Duket qartë se kërkesa e tij për "procese të shpejta" është keqinterpretuar qëllimisht nga makineria e PR-it të Veliajt. Schieder kërkon që hetimet e nevojshme të mos zvarriten, por të ndiqen nga gjykime të shpejta e me efikasitet, ndërkohë SPAK i ka mbyllur hetimet në kohë për Veliajn dhe manovrat procedurale kanë qenë pikërisht të kryebashkiakut, i cili  prej 7 muajsh bllokoi seancat gjyqësore, nga frika për t’u përballur me drejtësinë.

Tashmë është në dorë të GJKKO për marrjen e një vendimi për kryebashkiakun, pasi SPAK e kreu detyrën me hetimet serioze të kryera dhe dosjen voluminoze prej 60 mijë faqesh.

Ky qëndrim i Schieder përputhet plotësisht edhe me draft-raportin e fundit të Parlamentit Europian për vitin 2025, ku theksohet se korrupsioni mbetet një shqetësim serioz dhe kërkohet me ngulm forcimi i dënimeve, sidomos për nivelet e larta drejtuese.

Faktet e zbardhura nga CNA për dezinformimet e kryera nga Veliaj, dëshmojnë se rruga e Shqipërisë drejt BE-së kalon përmes drejtësisë së SPAK-ut dhe jo përmes shkrimeve të porositura nga Veliaj që tentojnë të përdorin mediat ndërkombëtare dhe Brukselin zyrtar si mburojë për korrupsionin./ CNA

 





Lajmet e fundit nga