web counter
LEXO PA REKLAMA!

SHKARKO APP

App Store
Google Play

E fundit!

x

"Korrupsioni po minon shtetin"/ Topalli: Projektligjet e sotme janë e kundërta e asaj që kërkon integrimi

19 Shkurt 2026, 14:30, Aktualitet CNA

"Korrupsioni po minon shtetin"/ Topalli: Projektligjet e sotme

Deputetja e Partisë Demokratike, Jozefina Topalli, u shpreh gjatë fjalës së saj në Kuvend se korrupsioni është armiku më i madh i shqiptarëve. Topalli tha gjithashtu se kjo qeverisje po minon shtetin dhe procesin e integrimit në Bashkimin Europian.

Deputetja shtoi ndër të tjera se vetë projektligjet e përfshira në rendin e ditës së seancës së sotme, janë e kundërta e asaj që kërkon procesi i integrimit.

“Armiku më i madh i Shqipërisë është korrupsioni. Armiku më i madh i Shqipërisë është ai, i cili për hir të karriges minon procesin e integrimit. Shqipëria do të kishte qenë krejt tjetër në procesin e integrimit, nëse kryetari juaj në 2013-ën nuk do kishte refuzuar votimin e tri ligjeve të famshme që i kërkonte Brukseli.

Dëgjova se ato që ishin përpara nuk kishin futur Shqipërinë në asnjë tryezë. Është e pabesueshme në fakt të dëgjosh fraza të tilla. Kush e futi Shqipërinë në NATO? Kush i liberalizoi vizat e shqiptarëve? Kush firmosi stabilizim-asocimin? Kush e futi Shqipërinë në Këshillin e Europës? Kush e futi Shqipërinë në OSBE? Është një histori përpjekjesh titanike në fakt, për të reformuar çdo gjë, së pari në mendjen tonë dhe pastaj në realitetin shqiptar, institucionet shqiptare, jetën politike, ekonomike, shtetërore të vendit. Ka ca vite që nuk punohet më për shtetin, punohet vetëm për pushtetin.

A mund të më thoni ju mua, pse ne Shqipëria vetëm kemi hapur kapitujt, ndërkohë që Mali i Zi i ka mbyllur ato apo po i mbyll ato? Mali i Zi ka mbyllur shumë kapituj. Pse ai është para nesh dhe ne jemi mbrapa? Cila është ajo arsye që ne jemi kaq mbrapa Malit të Zi, kur ne ishim aq para Malit të Zi?

Ja do t'jua them unë. Kohët e fundit dhe kjo është arsyeja kryesore në fakt, shumë media flasin për Shqipërinë dhe flasin kryesisht për problemin e korrupsionit. Po korrupsioni nuk është thjesht vjedhje. Korrupsioni është minimi i shtetit dhe pa shtet harrojeni se ka integrim. Po pa shtet nuk ka një jetë as ekonomike, as politike. Ju doni të bëni reformën në shërbimin e jashtëm. Fjali e bukur edhe kjo. Po do t'ju lutesha për një gjë. Ka mundësi që nga përfaqësitë tuaja nëpër botë të hiqni motrat e vëllezërit e grupeve kriminale që keni futur aty? Fillojeni, kjo gjë nuk ka nevojë për ndryshime ligjore. Edhe në njëfarë mënyre, ne e pastrojmë të paktën fasadën, meqenëse ju punoni shumë me fasadën. Vetë dita e sotme dhe të gjitha projektet që ju keni futur në rendin e ditës, në kalendarin dhe në programin e parlamentit, janë e kundërta e asaj që kërkon procesi i integrimit”, tha Topalli ndër të tjera në seancë plenare. /CNA





Lajmet e fundit nga