E vërteta e tarifës së fryrë 29 euro/ton mbetje në inceneratorin e Tiranës

3 Gusht 2024, 20:01, Aktualitet CNA

E vërteta e tarifës së fryrë 29 euro/ton mbetje në

Inceneratori i Tiranës, burimi CNA

SPAK mbylli dje hetimet për dosjen e parë të inceneratorit të Tiranës, ku janë marrë të pandehur 12 persona. (Lexo këtu)

Një nga faktet e evidentuara në njoftimin e SPAK-ut ishte edhe fryrja e tarifës së mbetjeve 29 euro/ton për mbetjet.

Bashkia e Tiranës dhe bashkitë e tjera të qarkut Tiranë paguajnë 29 euro/ton mbetje, ndërkohë që inceneratori nuk ekziston.

CNA ka raportuar se kjo tarifë është shumë e lartë, krahasuar me tarifën 12 euro/ton që paguan inceneratori i Fierit. (Lexo këtu)

Inceneratori i Tiranës, burimi CNA

Të njëjtën gjë ka theksuar edhe SPAK-u të premten, i cili është shprehur se anëtarët e komisionit të dhënies së koncesionit i morën kostot të gatshme nga studimi i fizibilitetit të kompanisë koncesionare “Integrated Energy BV”, pa kryer asnjë verifikim në lidhje me vërtetësinë e tyre. (Lexo këtu)

Sipas SPAK-ut, rezultojnë të dhëna fiktive të vendosura në studimin e fizibilitetit, të cilët kanë rritur fiktivisht tarifën e depozitimit të mbetjeve nga Njësitë e Qeverisjeve Vendore, 29 euro/ton.

Duke mos marrë në konsideratë të gjitha të ardhurat reale, anëtarët e komisionit vendosën tarifën e caktuar nga kompania koncesionare “Integrated Energy BV”.

SPAK

“Nga aktet e administruara rezultojnë të dhëna fiktive të vendosura në studimin e fizibilitetit, të cilët kanë rritur fiktivisht tarifën e depozitimit të mbetjeve nga Njësitë e Qeverisjeve Vendore, 29 Euro/ton.

Në studimin e fizibilitetit të përgatitur nga Komisioni i Dhënies së Koncesionit, nuk janë marrë në konsideratë të gjitha të ardhurat reale që do të përfitonte shoqëria koncesionare. Këto të ardhura, të cilat nuk janë përfshirë, ndikojnë negativisht në buxhetin e shtetit, pasi nëse do të ishin përllogaritur, atëherë vlera e tarifës që do të duhej të paguanin Njësitë e Qeverisjes Vendore, do të ishte më e ulët. Komisioni i Dhënies së Koncesionit nuk ka përfshirë të ardhurat që do të përfitonte shoqëria koncesionare nga palët e treta për depozitimin e mbetjeve inerte, duke i shkaktuar dëm buxhetit të shtetit. Nëse do të ishin përllogaritur të ardhurat që shoqëria koncesionare do të përfitonte nga palët e treta, si zë të ardhurash në studimin e fizibilitetit, atëherë do të ishte ulur pjesa e mbulimit që do të kryhej nga shteti”, thuhet në njoftimin e SPAK-ut.

Ky fakt është evidentuar edhe në raportin e KLSH-së, në shkurt të vitit 2022. (Lexo këtu)

KLSH deklaronte se që prej vitit 2018 është paguar tarifa 29 euro/ton mbetje urbane për incenerimin e mbetjeve për një shërbim ende të pakryer, duke qenë se inceneratori ende nuk ka përfunduar.

“Aktualisht, çmimi i paguar 29 euro/ton nuk është çmimi real i shërbimit që kryhet, pasi kjo tarifë përfshin edhe incenerimin e mbetjeve proces i cili nuk është kryer deri më sot”, theksohej në raport.

Raporti i KLSH-së në 2022-shin

Një tjetër fakt që përmendte KLSH-ja ishte edhe mosdakordësia e bashkive të qarkut të Tiranës për tarifën e mbetjeve. (Lexo këtu)

Dakordësinë për këtë projekt e ka dhënë vetëm Bashkia e Tiranës, e drejtuar nga Erion Veliaj.

Dakordësimi i Bashkisë Tiranë për tarifën e mbetjeve, firmosur nga Erion Veliaj

Ndaj edhe Kontrolli i Lartë të Shtetit deklaronte se bashkive i ishin shtuar kosto financiare pa miratimin e tyre.

“Mungesa e dakortësisë me shkrim e bashkive të tjera të Qarkut Tiranë, përveç Bashkisë Tiranë, provokon në të ardhmen kosto financiare për këto bashki, mos përfshirja e të cilave mbi këtë argument do të sjellë mungesë efektiviteti për realizimin e projektit të Incineratorit të Tiranës”, nënvizonte raporti.

Pavarësisht se shifra është e fryrë në mënyrë abuzive, kryebashkiaku i Tiranës, Erion Veliaj, është justifikuar me pretendimin se e ka ulur çmimin e mbetjeve. (Lexo këtu)

Kryebashkiaku i Tiranës, Erion Veliaj

Ai ka thënë disa herë në daljet e tij se në vitin 2014 PD ka propozuar që mbetjet të paguhen 38 euro/ton dhe se Bashkia e Tiranës e ka bërë 29 euro/ton.

Por dokumentet e publikuara nga drejtuesi i PD-së për Tiranën, Belind Këlliçi rrëzuan tezën e tij. Sipas dokumenteve, tarifa për depozitimin e mbetjeve e propozuar nga PD-ja ishte 12 euro/ton dhe Veliaj e ka rritur me 2.5 herë më shumë sesa ishte propozuar. (Lexo këtu)

Tashmë, për tarifën e fryrë të mbetjeve ka folur edhe SPAK-u, i cili ka dërguar në gjykatë 12 persona, dhe ka thelluar hetimet për dosjen e dytë të inceneratorit të Tiranës./ CNA