Busti i Llazar Fundos në Korçë/ Kreu i Shoqatës “Rilindja e Voskopojës”: Zai, intelektual i kalibrit europian

30 Nëntor 2025, 15:16, Aktualitet CNA

Busti i Llazar Fundos në Korçë/ Kreu i Shoqatës

Kreu i Shoqatës “Rilindja e Voskopojës”, Vangjush Nikolicari ka folur për vendosjen e bustit të intelektualit Llazar Zai Fundo në Korçë. Përmes një postimi në rrjetet sociale, Nikolicari shprehet se ndër aktivitetet e kësaj javë në Korçë, veçon dy evenimente, që lidhen me Voskopojën, një prej tyre vendosja e bustit të Zai Fundos në pedonalen e Korçës.

Nikolicari e ka cilësuar Fundon si një intelektual, poliglot dhe politolog të kalibrit europian. Ai shton më tej se Zai Fundo bashkë me miqtë e tij hartuan Manifestin e Ventotenesë "Për një Europë të lirë dhe të bashkuar" e cila shërbeu si baza e ndërtimit të mevonshëm të Bashkimit të sotëm Europian. Ai shkruan se intelektuali Zai Fundo u torturua në mënyrë ç'njerëzore dhe u vra me urdhër të Enver Hoxhës.

Kreu i shoqatës uron që bashkia e Korçës të vazhdojë me vlerësimin e figurave apo familjeve të shquara voskopojare dhe korçare si dhe thekson se ka ardhur koha e krijimit të muzeut të historisë së ndritshme të Voskopojës. Kujtojmë se Llazar Zai Fundo vjen nga një familje voskopojare.

Postimi i plotë:

Këtë javë kishte shumë aktivitete në Korçë me rastin e festave të 28- 29 Nëntorit. Une dua të veçoj dy evenimente, që kanë lidhje me Voskopojën. E para: Vendosja në qendër të Voskopojës e memorialit me emblemën e familjes "Sina", kontribut i Ambasadës së Hungarisë në Shqipëri si dhe e disa filantropëve hungarezë në bashkëpunim me Bashkinë Korçë . Familja "Sina" është pa dyshim, familja më e njohur, më e sukseshme dhe më dinjitoze voskopojare. Sinat kontribuuan në ngritjen e tre akademive: "Akademisë së Re" të Voskopojës , Akademisë së Budapestit dhe Akademisë së Athinës , gjjithashtu ata dhanë kontributet e tyre dhe për shumë investime të tjera të rëndësishme në disa qytete e kryeqytete të Europës.

E dyta: Vendosja e bustit të Llazar Fundos( Zai Fundo) në pedonalen e Korçës. Zai ishte një intelektual, poliglot dhe politolog i kalibrit europian. Ai lindi në një familje të dëgjuar tregëtarësh me origjinë nga Voskopoja. Një ishanëtar i Kominternit, që më pas akuzoi Stalinin dhe krimet e tij. I internuar nga fashistët në ishullin famëkeq Ventotene, ku së bashku me shokët e tij Muzafer Pipa, Stavro Skendo, Altiero Spinelli, Sandra Pertini, etj, hartuan Manifestin e Ventotenese “Për një Europë të lirë dhe të bashkuar" e cila shërbeu si baza e ndërtimit të mëvonshëm të Bashkimit të sotëm Europian. U torturua në mënyrë ç'njerëzore dhe u vra me urdhër të Enver Hoxhës me inicie të Stalinit nështator 1944. Fan Noli , kur mori vesh ekzekutimin e Zai Fundos do të shprehej "Ç'i mbetet Shqipërisë po i prishëm njerëz të tjerë, të mëdhenj si Fundo". Uroj që Bashkia Korçë të vazhdojë me vlerësimin e figurave apo familjeve të shquara voskopojare dhe korçare si dhe po i kujtoj përsëri se ka ardhur koha e krijimit në Voskopojë të muzeut të historisë së ndritshme të Voskopojës, ku dhe shoqata jonë"Rilindja e Voskopojës 1929" është e gatshme të japë kontributin e saj me dokumenta, libra, fotografi etj, nga arkivat personale të familjeve voskopojare. /CNA