E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Liturgjia Hyjnore/ Mesazhi i Fortlumturisë së Tij, Joanit: Nëse nuk është zemra e pastër, nuk mund të dallohet prezenca e Perëndisë

30 Nëntor 2025, 10:27, Aktualitet CNA

Kryepiskopi i Tiranës, Durrësit dhe gjithë Shqipërisë ka drejtuar Liturgjinë Hyjnore në Katedralen “Ngjallja e Krishtit”. Fortlumturia e Tij tha se sot kujtohet një nga apostujt e Zotit, Jezu Krisht dhe një martir i madh, Shën Andrea. Kryepiskopi Joan theksoi se duke lexuar jetët e shenjtorëve, vetë ne modelohemi sipas tyre.

Më tej gjatë predikimit, Fortlumturia e Tij u shpreh se nëse një person nuk ka zemrën e pastër, nuk mund ta dallojë asnjëherë prezencën e Perëndisë dhe Zotit.

Fortlumturia e tij tha më tej se bota sot, që është në një errësirë shpirtërore ku shumë vlera janë humbur, ka nevojë për vlerat shumë të mëdha të Ungjillit dhe përhapjen e tyre.

“Sot jemi mbledhur për të kujtuar një nga apostujt e Zotit tonë, Jezu Krishtit dhe një martiri të madh, Shën Andrea. Kisha mblidhej cdo ditë për të kujtuar shenjtorët e saj. Kështu ka filluar dhe kalendari kishtar. I kujtojmë çdo vit se ata u modeluan duke pasur parasysh Krishtin dhe ne duke lexuar jetët e tyre, do modelohemi sipas tyre. Jetët e shenjtorëve nuk janë thjesht biografi por shumë më tepër dhe më e thellë. Duke lexuar jetët e shenjtorëve, mund të kemi mundësi të jemi në kontakt me dimensionet e botës tjetër. Duke i kujtuar jetët e tyre ne mund të ndjejmë fuqinë e hirit të Shpirtit të Shenjtë. Të shohësh Zotin nuk mjafton të kesh një mendje të ndritur. Nëse nuk është zemra e pastër, nuk mund të dallosh prezencën e Perëndisë.

Një besim i madh nuk mjafton vetëm të pranosh së ka një Perëndi. Duhet ta përhapim këtë lajm të Zotit. Duhet ta përhapim Ungjillin kudo. Besimi qëndron në zemër për drejtësinë, por nga goja del rrëfimi për shpëtimin. Një besim i vërtetë nuk mund të jetë dot nëse nuk ka vepra. Një besim pa vepra është një besim i vdekur. Nëse jeta dhe fjalët e tyre nuk pasqyrojnë këtë besim, atëherë ky besim është i vdekur. Prandaj apostujt e përhapën me fuqi aq të madhe Ungjillin sepse e besuan, e donin Zotin dhe u ndriçuan nga hiri i Shpirtit të Shenjtë. Edhe sot bota ka nevojë për këtë lajm. Në këtë errësirë shpirtërore, ku shumë vlera janë humbur, dashuria pothuajse ka humbur fare, miqësitë pothuajse nuk ekzistojnë, ka nevojë për këtë mesazh e këto vlera shumë të mëdha të Ungjillit që i besojnë pa u trembur nga asgjë. Nëse nuk ka paqe dhe gëzim sot është sepse shtohet e keqja. Dhe kjo mund të mundet vetëm me dritën e Ungjillit”, tha Kryepiskopi Joan. /CNA