Breshëri shkatërroi të mbjellat/ Fermerët apel për ndihmë qeverisë: Dëme të parikuperueshme

24 Qershor 2024, 19:20, Aktualitet CNA

Breshëri shkatërroi të mbjellat/ Fermerët apel për

Bresheri

Reshjet e shiut dhe breshërit kanë përfshirë pasditen e djeshme zonën e Kolonjës, duke sjellë dëme të konsiderueshme në prodhimet bujqësore në disa prej fshatrave të kësaj bashkie. Më tepër se 1 orë reshje kanë shkatërruar totalisht prodhimet bujqësore dhe frutikulturën e fshatit Rehovë, Starje, Prodan, Taç dhe Gjonç. Një situatë kaotike e cila ka sjellë shqetësim të fermerëve të zonës, të cilët aktualisht kanë pësuar dëme të mëdha në prodhimet që kultivuan prej muajit Mars e deri më sot.

Fermerët tregojnë se çfarë ndodhi pasditen e djeshme në Kolonjë, me shiun dhe breshërin që ishte i vrullshëm dhe ka shkatërruar të gjithë prodhimin, duke nisur nga gruri e misri, e deri tek frutorët si molla, dardha, e qershia.

Breshëri shkatërroi të mbjellat/ Fermerët apel për

"Dje ishte një katastrofë në fshatin Rehovë, në frutikulturë, pemëtari, të gjitha i çoi në zero. Puna e Mars, Prill, Maj, Qershor shkoi dëm e gjitha. Më e keqja është se në këtë vend e në këtë kohë nuk mbillen prapë të tjera. Sa hyn në prodhim, të gjitha janë bërë copë. Gjysëm ore ra dhe e çoi të gjithë përtokë. Ne kemi hapur një bujtinë dhe kopshtin për këtë e kam bërë, të gjitha bio. Deri tani s'kanë ardhur për të verifikuar, mbase vijnë më vonë. Po merremi me pastrimin që ta kthejmë në funksion bujtinën."

Breshëri shkatërroi të mbjellat/ Fermerët apel për

Për fermerët e fshatit Rehovë, asgjë nga prodhimet e shkatërruara nuk mund të ripërtërihet. Ata presin ndihmë nga shteti për t'i kompesuar dhe për ti siguruar, pasi për fermeret çdo gjë është e shumëzuar me zero.

"Breshëri dje nisi në orën 16:30-17:00 dhe bëri dëme të konsiderueshme sidomos në sektorin e bujqësisë. Ja ku janë dëmet në bimën e fasules që nuk ripërtërihet më, në domatet, në piperka, presh, dhe në grurë që është sektori i parë i bujqësisë. Breshëri zgjati rreth 1 orë e gjysëm këtu në Rehovë, me vrull e kokërr të madhe e prishi çdo gjë. Që në pemët frutorë, rrush, mollë, dardha, të gjitha me rradhë, shumë dëme, në qershi, lajthi. Dëmet janë të parikuperueshme, presim ndihmën nga shteti për bujqësinë, të na sigurojë shteti për atë që tani është shumëzuar me zero. Bashkia ka ardhur, ka rregulluar rrugët sepse hapi përrenjtë. Ju jeni të parët që po vini e po shihni gjendjen në Rehovë të Kolonjës."

Administratori i kësaj zone, Altin Zoto, tregon situatën e reshjeve dhe dëmet e konsiderueshme në bujqësi. Ai thotë se bashkia ka ndërhyrë në rrugët që janë dëmtuar nga dalja e përrenjve, për të rregulluar qarkullimin e banorëve, ndërsa në terren ndodhen grupe punë që po shkojnë në çdo fshat për të verifikuar dëmet e shkaktuara nga breshëri.

Breshëri shkatërroi të mbjellat/ Fermerët apel për

"Reshjet e shiut dhe të breshërit filluan rreth orës 4 pasdite dhe mbajtën rreth 1 orë e 15 minuta pa pushim. Kanë bërë dëme shumë të mëdha në rrugë fshatrash, lumenj kanë dalë nga shtrati dhe kanë bërë shumë dëme në pemëtari. Mund ti shumëzojmë me zero sepse i ka shkatërruar të gjitha pemët përfundimisht. Ka bërë dëme kudo, në misër, grurë, thekër. Rehova pati shumë dëme, më paa të treja lagjet e Starjes dhe Taçi. Pati kudo, dhe në Selenicë, Gjonç e Prodan. Ne si institucion i bashkisë kemi ngritur një grup pune nga bujqësia dhe po shkojnë fshat më fshat për të verifikuar dëmet. Janë në terren, kemi shpërndarë edhe fadromat e bashkisë në rrugët që janë dëmtuar që të bëjnë kalimin e banorëve. Nuk kemi dëme në njerëz, kafshë, janë vetëm dëme materiale."

Sipërfaqe të mëdha me toka bujqësore, pemëtari e frutikulturë janë prekur nga reshjet e dendura të shiut e të breshërit, kryesisht në zonën e rrëzë malit të Gramozit. Fermerët tashmë janë me sytë nga qeveria dhe shteti, pasi kjo fatkeqësi natyrore ka dëmtuar të gjithë prodhimin e tyre duke e bërë të parikuperueshëm. Bashkia e Kolonjës ka vijuar punën me inspektimin në terren ndërsa do të shihet në vazhdim masat që do të merren nga pushteti qëndror për këta fermerë./ CNA