LEXO PA REKLAMA!

SHKARKO APP

A po plas flluska e hapjes së dosjeve? AIDSSH: Do bëhet "verifikim rast pas rasti" nëse duhet të hapen

22 Nëntor 2022, 19:20, Aktualitet Elvi FUNDO
A po plas flluska e hapjes së dosjeve? AIDSSH: Do bëhet
Foto montazh, hapja e dosjeve

Në një intervistë për A2 CNN, anëtari i bordit të Autoritetit, Skënder Vrioni, shpjegoi se si e ka parashikuar Autoriteti përgjegjës funksionimin e atij që duhet të ishte mekanizëm ligjor.

Pas një debati ku palët u kacafytën, u ndanë, u përçanë dhe u shanë, po i afrohemi afatit të hyrjes në fuqi të ligjit.

“Së fundmi është edhe ky target grupi i qytetarëve, ai neni i shumëpërfolur që edhe ata do të kenë akses në dokumentet e Sigurimit të Shtetit sipas objekti të tyre dhe sipas objektit ne do të verifikojmë si autoritet nëse kërkesa e tyre është në përpjesëtim të drejtë me autoritetin për t’i dhënë informacionin. Pra rast pas rasti do të shohim”, u shpreh Vrioni.

Ajo që thotë Vrioni përkthehet: “nëse duam do verifikojmë, nëse nuk duam nuk na detyron asgjë.”

A po plas flluska e hapjes së dosjeve? AIDSSH: Do bëhet
Skënder Vrioni, foto ilustruese

Anëtari i Bordit të Autoritetit të Dosjeve, Skëndër Vrioni u përpoq të shpjegojë se në të gjitha rastet, kërkesat e qytetarëve duhet të marrin aprovimin e kolegëve të tjerë për t’u legjitimuar dhe për të marrë “dritën jeshile”. Praktikisht "informoi" që çështja nuk qenka veç në dorë të Zotit Vrioni. Sipas Vrionit dosja jo në gjithë rastet do të vihet në dispozicion e plotë.

Ligji nuk paska dhënë dritë jeshile, por vetëm portokalli! Butoni i dritës jeshile qenka i parregulluar nga ligji sa kohë që zgjidhja do u jepka rast pas rasti, në vartësi të rastit.

“Në çdo rast, dokumentacioni që do të marrë qytetari duke përjashtuar subjektet regresive, gjyqtar, hetues, prokuror, anëtar të Sigurimit të Shtetit, por edhe bashkëpunëtorë, për këto të dhënat do të jenë të paanonimatizuara, ndërsa dokumentacioni që do t’u vihet në dispozicion subjekteve kërkuese do të jetë i anonimanizuar për personat e tretë”, shtoi ai.

Nuk kuptohet nga e nxjerr Autoriteti këtë "rregullimin" e mbajtjes sekret të ca pjesëve të dosjes.

Nëse procesi i qenka lënë në dorë rastit si “mbret” i botës, pa asnjë referencë në dispozita ligjore apo procedura, është e qartë që vetëm në rastet kur shefat e anëtarëve të Autoritetit do të miratojnë verifikimin, do të ketë verifikim.

A po plas flluska e hapjes së dosjeve? AIDSSH: Do bëhet
Foto ilustruese

CNA.al edhe më parë ka paralajmëruar dështimin e një procesi i cili që në krye të herës ngjau më shumë demagogjik sesa që synonte vërtetë transparencën mbi të vërtetën e dosjeve.

Ajo që paralajmërohet ështe refuzimi masiv i kërkesave për verifikim, pra mos-hapja e dosjeve.

Aksioni politik në parlament u duk sikur u ndez pas shkresës që vetë Autoriteti i Dosjeve i përcolli Kuvendit ku i shprehte shqetësimin lidhur me një rast që shkonte drejt një emri, atij të ish-Presidentit.

Në fund të muajit Korrik, Autoriteti do të pohonte se, ish-presidenti figuronte në arkivën e ish-Sigurimit por për ta nuk ishte e mundur ta riverifikonin sepse ligji i ndalonte. Motivi ishte një pengesë ligjore që lidhej me verifikime të hershme të ish-Presidentit dhe pajisjes me një certifikatë të mëparshme pastërtie.

Pyetjes nëse do të mundet që pas hyrjes në fuqi të ligjit, kryetari i Partisë së Lirisë të riverifikohet, zoti Vrioni nuk i jep dot përgjigje me shpjegimet që ka dhënë. As ligji nuk e ka garantuar me dispozita procedure dhe jo vetëm.

A po plas flluska e hapjes së dosjeve? AIDSSH: Do bëhet
Foto i ilustruese

Ndryshimet ligjore të kërkuara nga Autoriteti së bashku me disa retushime të grupit Alibeaj, pritet të hyjnë në fuqi në datën 3 dhjetor.

Sipas asaj që deklaron zoti Vrioni, mbetet në dorë të Autoritetit që të vlerësoje riverifikimin e atyre personave që më parë kanë pasur një certifikatë pastërtie, mes të cilëve edhe Ilir Meta. Por vetëm pasi dikush ta kërkojë riverifikimin.

“Ju thashë që tani në këtë kontekst nuk mund të vihemi në lëvizje vetë, por do të viheni në lëvizje me institucionet publike apo kushtetuese. Të heqim edhe thashethemet dhe hamendësimet që të paktën funksionarët e lartë të jenë njerëz me integritet. Ka ardhur koha për t’u bërë sa më shpejt kjo procedurë, ky katarsis”, përfundoi Vrioni.

Pra sipas Zotit Vrioni megjithëse ndryshimet u kërkuam nga Autoriteti sepse ju kish rezultuar dokumentacion kompromentues për ish-Presidentin, pas hyrjes në fuqi të amendamenteve të kërkuara nga Autoriteti, Autoriteti do presë që dikush apo ndonjë institucion të kërkojë riverifikimin e Ilir Metës! Ndryshe nuk e riverifikoka dot!

Tallja e heronjve të opozitës dhe eksponentëve të mazhorancës me ligjin për gjasme hapjen e dosjeve sapo ka filluar të zbardhet.

Me një ligj pa asnjë dispozitë proceduriale, pa afate shqyrtimi dhe pa asnje kriter të mirëpërcaktuar, sapo kuptuam që jo vetëm për të tjerë, por edhe për ish-Presidentin, askush nuk siguron që do ketë hapje të dosjeve.

Autoriteti që shpjegoi hallin në Korrik e shkruajti edhe amendamentet për zgjidhjen e hallit që në Korrik, po na thotë që kur të vijë Dhjetori dhe amendamentet të hyjnë në fuqi siç i kishin shkruar ata vetë në Korrik, nuk do veprojë dot të zgjidhë hallin!

Por mundet që të verifikojë rastin nëse dikush do ja kërkojë zyrtarisht!

Dhe kur Autoriteti nuk zgjidhka dot pa kërkesë hallin që vetë ai prezantoi e që lidhej me ish-Presidentin, vështirë se do zgjidhen halle të të tjerëve për të tjerë!/ CNA.al

 

Lajmet e fundit nga