LEXO PA REKLAMA!

SHKARKO APP

E fundit!

x

Nga synimet tek problematikat e Durrësit/ Ardian Muka flet për garën e 6 marsit, mesazh qytetarëve

13 Shkurt 2022, 16:29, Politikë CNA
Nga synimet tek problematikat e Durrësit/ Ardian Muka flet për

Ardian Muka, me profesion inxhinier urbanist do të jetë kandidati i koalicionit ?Shtëpia e Lirisë? në qytetin e Durrësit për zgjedhjet e pjesshme të 6 marsit.

Në një intervistë për CNA.al, Muka foli për synimet dhe prioritetet e tij, duke nxjerrë në pah edhe problematikat që ka Durrësi.

Ai tha se mos pasja e një plani vendor, sipas tij lë mundësi për abuzim, ndërsa aprovimin për të kaluar portin e qytetit të Durrësit, në një port jahtesh me një vendim sa hap e mbyll sytë, pa transparencë dhe një studim fizibiliteti ai e konsideron si një turp.

Më tej, Muka shton për CNA.al nëse do të marrë besimin e qytetarëve, gjëja e parë që do të bëjë është të vendosë piketat për atë çfarë qyteti ka nevojë.

Intervista e plotë e kandidatit të Durrësit Ardian Muka:

Zoti Muka, ju jeni një kandidat që keni dalë nga vota e anëtarëve demokratë. Si i vlerësoni në gjykimin tuaj primaret?

Primaret janë maksimumi i demokracisë, ku e gjithë anëtarësia arrin të shprehet me votën e saj për atë që ata mendojnë se është figura më e mirë për ti udhëhequr në garën për bashki. Është një revolucion, që si përherë në vendin tonë e sjell PD dhe e sjell vizioni i liderit legjendar zotit Berisha, që megjithëse 77 vjeçar sheh më larg se disa lidera të tjerë, si atyre që i ka pasur dhe udhëhequr brenda partisë së tij ashtu edhe liderët e opozitës. Pra është maksimumi i demokracisë. Duhet të shtrihet edhe më tej, duhet të shtrihet edhe në zgjedhjet politike natyrisht dhe duhet të jetë edhe në një spekter më të gjerë.

Në gjykimin tim të mos bllokohet thjesht nga anëtarësia por ajo të hapet si votim edhe nga votuesit e thjeshtë të qytetit, natyrisht simpantizantët por ajo të jetë e hapur edhe për qytetarët.

Ju tashmë e keni nisur fushatën elektorale. Ku do të jetë fokusi juaj?

Qyteti im, qyteti i Durrësit ka shumë problematika. Problematika që kanë ardhur nga keqadministrimi, problematika që kanë ardhur nga korrupsioni, nga injoranca në drejtimin e këtij qyteti. Ajo që unë do të thoja një nga shtyllat kryesore, nga ku duhet filluar dhe ku unë do ngul këmbë me forcë është miratimi i planit të përgjithshëm vendor . Durrësi sot që flasim është i vetmoi qytet në republikën e Shqipërisë i cili nuk ka një plan vendor, megjithëse nga viti 2015 Këshilli Bashkiak ka miratuar fondin, ka dhënë detyrën e ekzekutimit të këtij plani urbanistik dhe duhet të mbaronte në fund të vitit 2016.

Jemi në vitin 2022, akoma qyteti jonë nuk ka një plan të përgjithshëm vendor, duke lënë mundësi të abuzohet me lojrat e vogla të shtetit, natyrisht edhe me lojrat e mëdha, ku natyrisht akti i fundit dhe i turpshëm është aprovimi për të kaluar portin e qytetit të Durrësit, në një port jahtesh me një vendim sa hap e mbyll sytë, pa krijuar transparencë me publikun, pa bërë një studim fizibiliteti, thjesht dhe vetëm për qëllime elektorale.

Unë nuk jam kundër jam për zhvillimin e qytetit edhe në një port turistik, edhe aty ku është por jo në këto kushte. Jo që qytetit ti vidhet porti ditën për diell, qytetarëve tu vidhet një pasuri, jam për atë që ajo pronë ti ngelet shqiptarëve dhe jo atyre që janë regjistruar në kompanitë offshore. Tu ngelet shqiptarëve që ata të kenë mundësi të krijojnë një fond publik investimesh, ku të gjithë  bashkë të jenë aksioner të asaj që natyra na ka falur dhe brezat e qytetarëve durrsak kanë bërë për portin e Durrësit.

A mendoni se do dëmtoheni nga përçarja e PD dhe kandidati i zotit Basha?

Në këtë pikë, natyrisht ka një betejë brenda vetes, por që unë kam shumë shpresë që demokratët e Durrësit do ta kuptojnë që deri në momentin e fundit ata janë keqpërdorur nga politika e Tiranës, nga kjo përçarje që ka ndodhur natyrisht të shtyrë nga deputeti Basha dhe do bëhen pjesë e asaj çfarë është vizioni për zhvillimin e qytetit dhe nga ana tjetër do kuptojnë që shumica e PD nuk është meatë që i ka ngelur vula por qytetarët janë aty ku lufta ndërmjet opozitës dhe pozitës është bërë reale dhe nuk është bërë e tradhtuar. Thënë këtë, natyrisht mendoj që do ketë një pjesë votash, por që do jenë minimale që do shkojnë në krahun e kandidatit të nxjerrë nga zoti Basha por ajo që është e rëndësishmë është që qytetarët durrsakë do të dinë të bëjnë aleancën e duhur me ndryshimin që do mbahet në datën 6 mars në Durrës dhe jo vetëm.

Durrësi prej kohësh është drejtuar nga socialistët, a mendoni se në 6 mars do ndryshojnë ?faqe??

Qytetarët durrsak e kanë treguar shpesh herë që kur pushteti i ka parë ata nga lart me arrogancë, duke i injoruar ata, durrsakët i kanë kthyer monedhën me votën e tyre kundër.

Shembulli më i qartë është ai i vitit 2005 kur në Durrës u bë një rezultat sensacional për atë kohë, sepse megjithëse qeveria e majtë me arrogancën e saj, me influencat që ushtronte në proceset e votimit, në mënyrën se si zhvillohej edhe gara elektorale, qyteti i Durrësit bëri një rezultat sensacional 8 me 0 në favor të opozitës. Sikurëse pas një viti e gjysëm kur mendohej që gjasat do bënte përsëri të njëjtin rezultat në qytetin e Durrësi, durrsakët votuan kundër projektit që u paraqit në atë kohë nga e djathta dhe ja dhanë të drejtën për të administruar qytetin të majtës.

Thënë këtë, unë kam shumë besim që atë se çfarë duan bashkëqytetarët e mi, nga Ishmi në Romanat, do të shprehen me  votë në datën 6 mars për ndryshimin e shumë kërkuar. 22 vite janë shumë, për jetën e një njeriu normal, por kjo nuk ka lidhje se janë udhëhequr nga e majta apo do udhëhiqeshin nga e djathta. Unë them se qytetarët durrsakë janë udhëhequr pa zemër, pa vizion, janë udhëhequr thjesht për interesa të ngushta individuale, për fatin tonë të keq.

Nëse do të arrini të zgjidheni nga qytetarët e Durrësit, ju do të keni në dispozicion për të drejtuar qytetin vetëm një vit e gjysëm, deri në mbajtjen e zgjedhjeve të ardhshme. Çfarë do bëni ju gjatë kësaj kohe për qytetin tuaj?

Natyrisht që precedentin në një vit e gjysëm mund të bësh shumë gjëra.

Ne do vendosim në rradhë të parë piketat për atë çfarë qyteti ka nevojë, do përcaktojmë kush do jetë vizioni i qytetit. Atë çfarë zoti na ka falur, pozitën gjeografike, detin, trashëgiminë kulturore neve duhet ti kthejmë në benefite për qytetarët.

Një vit e gjysëm mund të jenë pak por me dëshirën e mirë dhe me dashurinë  për qytetin mund të bëhen shumë gjëra. Është një hap, një investim. Unë besoj që qytetarët edhe më mbrapa, nëse do besojnë në projektin tonë do ta vazhdojnë ta aprovojnë zhvillimin e mëtejshëm të këtij projekti edhe në fazë të dytë.

Një mesazh për qytetarët?

Unë qytetarët dhe demomokratët do shohin Ardin, do shohin durrsakun, do shohin atë opozitarin i cili ka luftuar për shumë kauza qytetare, do shohin Ardin specialist që i dhimbset qyteti, do shohin babain i cili do që i biri të jetojë në qytetin e tij. Unë nuk premtoj mrekulli, unë u premtoj mirësi bashkëqytetarëve të mi./E.K-CNA.al

Lajmet e fundit nga