Dokumente-Skandal/ Noterja falsifikon firmën e qytetares në kontratën e dhurimit

26 Tetor 2021, 08:24, Aktualitet CNA

Sistemi i drejtësisë në vendin tonë, nuk çalon vetëm nga gjykatat dhe prokuroritë, të cilat janë vënë gjithnjë në shënjestër, por edhe nga noteria.

Në Shqipëri, Noteri në vend që të ligjërojë një dokument e falsifikon.

Një denoncim ka mbërritur në CNA.al, ku një qytetare ka rrëfyer se si i është falsifikuar firma për të dhuruar një pronë.

Qytetarja, e cila për shkak të hetimeve kërkon të mos identifikohet me emër dhe mbiemër por vetëm me iniciale R.I, rrëfen se noterja Diana Kamberi ka falsifikuar firmën e saj duke nënshkruar një kontratë dhurimi.

Gjithçka ka ndodhur në vitin 2012 dhe denoncuesja e ka kuptuar në vitin 2021.

?Unë në vitin 2012, nuk kam qenë në Shqipëri, kam qenë në Itali, ku po merrja kujdes shëndetësor. Këtë e vërtetoj edhe me epikrizën por edhe me të dhënat e sistemit TIMS. Vonë kam kuptuar se më është falsifikuar firma nga noterja Diana Kamberi dhe për këtë kam bërë denoncim në sektorin e krimeve ekonomike në Polici dhe tashmë çështja ka kaluar në Prokurorinë e Tiranës, tek prokurorja Anisa Qilimi?, ka rrëfyer ajo për CNA.al.

Duke iu referuar denoncimit të qytetares, por edhe dokumentave të vëna në dispozicion prej saj, të cilat do t?i sjellim më poshtë, ne kontaktuam me shkrim, noteren Diana Kamberi për të kërkuar versionin e saj.

Kamberi nuk ka kthyer përgjigje, por gjithsesi e mirëpresim ende edhe versionin e saj në lidhje me këtë denoncim-skandal.

Pasi, sipas dokumentave është falsifikuar firma e qytetares, ndërkohë që ajo nuk ka qenë fare në Shqipëri.

Kontrata e dhurimit mban datën 13 Korrik 2012, ndërkohë që e njëjta datë rezulton edhe tek epikriza e denoncueses, lëshuar nga një institucion shëndetësor në Lombardi.

Edhe në të dhënat e sistemit TIMS, lëshuar nga Drejtoria e Policisë së Shtetit, rezulton se denoncuesja ka dalë nga Porti i Durrësit me datë 03.05.2012 ora 13.19 dhe ka hyrë në territorin shqiptar me datë 27.08.2012, ora 8.02 minuta po nga Porti i Durrësit.

Këmbanat në këtë rast nuk bien vetëm për Prokurorinë që t’i japë vëmendjen e duhur kësaj çështjeje por edhe për Ministrinë e Drejtësisë, që të çlirojë sistemin e noterëve nga korrupsioni./CNA.al