“Sulmoi” komisioneren e Vettingut se është e PD/ Bëmat e bashkëshortes së Denar Bibës

14 Dhjetor 2020, 13:23, Vetingu CNA

Bashkëshortja e ish nënkryetarit të Komisionit Qëndor të Zgjedhjeve, Denar Biba, pasi ka zvarritur hetimet e Komisionit të Pvararur të Kualifikimit, duke iu vënë dhe kushte, i ka paditur këta të fundit në Kolegjin e Posaçëm, të Apelimit.

Me vendim të KPK, Elona Kana është përjashtuar nga sistemi i drejtësisë për 15 vite, por edhe pse e rehatuar nga Qeveria në një post publik, ajo nuk heq dorë nga sistemi i drejtësisë.
Me 21 Dhjetor 2020, Kolegji i Posaçëm i Apelimit, i përbërë nga Ina Rama, kryesuese, Rezarta Schuetz, relatore dhe anëtarë, Albana Shtylla, Ardian Hajdari dhe Natasha Mulaj, do të gjykojë ankimin e paraqitur nga subjekti i rivlerësimit Elona Kana, kundër vendimit nr. 233, datë 03.02.2020 të Komisionit të Pavarur të Kualifikimit.

Dorëheqja e dyshimtë
Elona Kana e cila ka mbajtur pozicionin e këshilltares ligjore në Gjykatën e Lartë, ndërkohë që po hetohej nga Vettingu ka paraqitur dorëheqjen pranë Këshillit të Lartë Gjyqësor edhe nga funksionin që mbante por edhe nga ndjekja e studimeve në Shkollën e Magjistraturës. Arsyeja e dorëheqjes asnjëherë nuk është saktësuar.

KLGJ nuk e miratoi dorëheqjen e depozituar me pretendimin se ?në kushtet kur Elona Kana ka ndërprerë marrëdhënien juridike të punësimit si ndihmëse ligjore/këshilltare ligjore (jomagjistrate) në Gjykatën e Lartë në datën 1.10.2018, pra, përpara krijimit të Këshillit të Lartë Gjyqësor (datë 12.12.2018), si dhe kur për përfundimin e kësaj marrëdhënieje është shprehur organi publik që ka vijuar të ushtrojë kompetencat e organit të emërtesës për këtë kategori të punësuarish deri në krijimin e Këshillit, ky i fundit nuk ka detyrimin dhe as mund të shprehet për këtë çështje, tashmë ligjërisht të mbyllur.?

Ndërsa KPK, argumentoi se, viti i parë i shkollimit teorik dhe praktika apo stazhi në vitin e dytë të Shkollës së Magjistraturës janë veprimtari të kryera për shkak të statusit, ex officio si këshilltar ligjor, që Elona Kana gëzonte.

Por, pas dorëheqjes së Kanës nga Shkolla e Magjistraturës dhe për shkak se nuk gëzonte statusin e këshilltares ligjore të Gjykatës së Lartë, në një kohë që procesi i rivlerësimit nuk kishte përfunduar, KPK e ka vlerësuar si tërheqje nga detyra dhe heqje dorë nga procesi i vetingut.
Dorëheqja e Elona Kanës u komentua nga mediat si tentativë për ti shpëtuar hetimeve të Vettingut, pasi nuk justifikonte pasurinë.

Në këtë situatë, me 3 shkurt 2020, ku Kana nuk ishte e pranishme, KPK dha vendimin për përjashtimin nga drejtësia për 15 vitet e ardhshme. 10 ditë pas ndërprerjes me dorëheqje procesin e vetingut, Qeveria që ta emërojë Elona Kanën, në detyrën e anëtares së Komisionit Kombëtar Rregullator të Sektorit të Furnizimit me Ujë dhe Largimit e Përpunimit të Ujërave të Ndotura, për periudhën e mbetur të mandatit.

?Sulmi? ndaj komisioneres së Vettingut
Me datë 10 korrik 2019, KPK, ka përfunduar hetimin administrativ për subjektin e rivlerësimit Elona Kana dhe i ka njoftuar kësja të fundit barrën e provës. Më pas, trupi gjykues i përbërë, nga Suela Zhegu kryesuese, Xhensila Pine relatore dhe anëtar Olsi Komici, ka pranuar një kërkesë të Kanas për shtyrjen e afatit me të paktën 20 ditë për sigurimin e provave dhe pas administrimit të tyre, caktuan seancën dëgjimore me datë 2 tetor 2019. Por, ish-këshilltarja e Gjykatës së Lartë, Elona Kana ka kërkuar gjatë seancës dëgjimore përjashtimin e relatores Xhensila Pine me pretendimin se ishte e propozuar nga PD dhe ishte e njëanshme, për shkak të qëndrimit të bashkëshortit të saj, Denar Biba në zgjedhjet e 30 qershorit.

Kana e lidhi ndikimin politik me funksionin e bashkëshortit të saj, pasi Denar Biba në atë kohë ishte nënkryetar i Komisionit Qendror të Zgjedhjeve. Gjithashtu, Kana është shprehur se kishte ndjesi, se nuk ishin marrë parasysh provat dhe dokumentet e dorëzuara në lidhje me udhëtimet e punës si dhe të ardhurat e saj. Në këto rrethana pretendonte se nuk mund të vazhdonte gjykimi nëse më parë nuk ishte njohur me qëndrimin e KPK-së pas dorëzimit të provave dhe dokumenteve të reja, të cilat i duheshin për organizimin e një mbrojtjeje efektive. Por, KPK, vendosi ta shkarkonte, pavarësisht qëndrimit të saj dhe tashmë topi ka kaluar në fushën e KPA-së, e cila duhet të vendosë për fatin e të shpërblyerës së Qeverisë, në lidhje me aktivizimin e saj në sistemin e drejtësisë./CNA.al