Kryemadhi zbulon paktin për “Zgjedhoren”/ Rama duhet të shpallte zgjedhjet e parakohshme në janar

20 Janar 2020, 22:37, Politikë CNA

Kryetarja e Lëvizjes Socialiste për Integrim, Monika Kryemadhi zbuloi se edhe para uljes së opozitës në tryezë me mazhorancën ishte dakordësuar që Reforma Zgjedhore të miratohej në muajin dhjetor.

Ajo pretendon se kryeministri Edi Rama shpalli gjendjen e jashtëzakonshme deri në mars vetëm për të mos e miratuar.

“Mos harroni që Rama kërkon të shtyjë dhe të fitojë sekonda. Shpalli gjendjen e emergjencës deri në mars. Reforma Zgjedhore duhej të ishte miratuar në dhjetor, sepse kështu ishte dakordësimi edhe me SHBA, edhe me BE, por duke shpallur gjendjen e emergjencës Parlamenti nuk mund të miratojë kode zgjedhore, ky ka qenë justifikimi nga ata. Ne si opozitë mbarojmë të gjitha detyrimet tona, sepse deri tani ky njeri mbante peng vendin me justifikimet që opozita nuk bëhet pjesë”, u shpreh Kryemadhi në emisionin ?5 pyetje nga Babaramo?

Kryetarja e LSI-së tregoi se ishte dakordësuar për sistem mazhoritar të pastër sepse pretendon se ky sistem nuk e dëmton LSI-në si parti të tretë.

“Fare, nuk na dëmton, se do të kalojë me dy raunde. Fiton më shumë me mazhoritar, partia e tretë edhe partia e katërt. Në kushtet kur jemi sot, është më mirë që njerëzit të jenë drejtpërdrejt të lidhur me deputetin. Mua më intereson me lista të hapura, se duhet të bëjë matematikë, llogari politike edhe morale. Dhe do të ndodhë që nëpër listat e kryetarëve të partive, në 100 emra do të vësh biznesmenë, dhe 2-3 të fortë, dhe listat i kryesojnë këta 12- 13 veta. Nëse nuk dekriminalizohet procesi zgjedhor, ndërroje sistemin sa të duash”, tha ajo.

Një tjetër çështje për të cilën duket se kanë pasur rënë dakord partitë kryesore në vend, janë zgjedhjet e parakohshme. Kryemadhi deklaroi se zgjedhjet e parakohshme duhet të shpalleshin në janar dhe të mbaheshin në fund të prillit.

“Ai duhet të shpallte zgjedhjet në janar, t’i bënte në fund të prillit, para samitit të Zagrebit, prandaj duhet të bëhej kaq shpejt Reforma Zgjedhore, për t’u testuar në zgjedhje. Që Rama të tregonte që Shqipëria e do BE-në. Edhe ne si opozitë themi që integrimi për të qenë pjesë e BE është e vetmja mundësi për të ecur përpara”, tha Kryemadhi./ CNA.al