E fundit!

11:31 Aktualitet

Tri dekada në polici/ Kush është drejtori i ri që pritet të marrë komandën për Tiranën

Adriatik Tafçiu, i renditur i pari në procesin e vlerësimi...

Sllovenia e ndëshkoi Haradinajn në emër të NATO-s, për shkak të Kumanovës

18 Qershor 2015, 17:18, Opinione CNA

Nga Kastriot MYFTARAJ

Sllovenia nuk i meriton aspak ato fjalë të këqija që janë thënë për të në Kosovë këto ditë, me rastin e ndalimit që iu bë Ramush Haradinajt në Lubljanë, për shkak të një urdhër arrestimi ndërkombëtar të vjetër serb. Me këtë rast në Kosovë po thuhen fjalët më të këqija ndaj Sllovenisë dhe sllovenëve, duke i etiketuar sllovenët si më serbë se serbët. Sllovenia nuk i meriton aspak këto etiketime. Sllovenia ka një qëndrim koherent pro shqiptarëve të Kosovës, që në kohën kur Sllovenia ishte ende një republikë jugosllave. Sllovenia ishte e para nga republikat jugosllave, e cila në prill 1989 tërhoqi nga Kosova kontigjentin e saj policor, të dërguar atje në kuadër të regjimit ushtarak-policor që ishte vendosur në Kosovë, me rastin e protestave ndaj ndryshimeve që Serbia bëri në statusin kushtetues të Kosovës. Në 1999 Sllovenia mbështeti luftën e NATO-s kundër Serbisë, si dhe i dha liri UÇK-së që të kryente veprimtari në territorin e saj për mbledhje të ndihmave financiare dhe të çdo lloji tjetër, rekrutim të vullnetarëve, përdorim të aeroporteve të saj për udhëtim të njerëzve të UÇK etj.
Sllovenia ishte i pari shtet i dalë nga Jugosllavia që e njohu pavarësinë e Kosovës, i pari shtet i dalë nga Jugosllavia që vendosi marrëdhënie diplomatike me Kosovën, si dhe i pari shtet i dalë nga Jugosllavia që hapi ambasadën e tij në Prishtinë. Të gjitha këto gjëra Sllovenia i bëri shumë shpejt pas shpalljes së pavarësisë së Kosovës, në harkun kohor që nga 5 marsi 2008 në 15 maj 2008. Vetëm rreth gjysma e vendeve që kanë njohur pavarësinë e Kosovës kanë vendosur marrëdhënie diplomatike me të. Njohja pa vendosjen e marrëdhënieve diplomatike është fiksion diplomatik.
Sllovenia, e cila në qershor 1999, kur NATO hyri në Kosovë, nuk ishte ende vend anëtar i aleancës, u bë një nga vendet e para joanëtare që dërgoi një kontigjent ushtarak në KFOR, që në shtator 1999. Kontigjenti slloven i KFOR, i cili që nga ajo kohë ka qenë në numër dukshëm të madh në raport me përmasat e këtij vendi (312 ushtarë) nuk ka pasur asnjë kritikë nga shqiptarët e Kosovës për sjelljen e tij. Sllovenia është sot një nga 31 vendet kontribuese në KFOR. Sjellja e Sllovenisë ndaj Ramush Haradinajt këto ditë nuk është aspak koherente me sjelljen e këtij vendi ndaj shqiptarëve të Kosovës. Kuptohet se diçka tjetër e ka shkaktuar sjelljen e Sllovenisë.
Nuk është rastësi që incidenti me Haradinajn në Slloveni ndodhi pas ngjarjes së Kumanovës, ku një grup i armatosur i shqiptarëve të Kosovws, shumë të afërt me Haradinajn shkuan si klientë të shërbimeve të fshehta maqedone, për të aktruar sipas një skenari lufte të shërbimeve të fshehta maqedone. Por njerëzve të Haradinajt nuk iu doli ashtu si iu kishin premtuar, se maqedonët, për interesat e tyre, kishin edhe një skenar tjetër, një Plan B, me shumë të vrarë. Partia e Haradinajt ishte e vetmja që i mbrojti zyrtarisht, me të madhe, shqiptarët e Kosovës të vrarë dhe të arrestuar në Kumanovë, duke u vetëzbuluar si shtabi politik i tyre.
NATO sigurisht është shumë e ndjeshme ndaj lojërave të tilla me luftë në Ballkan, aq më tepër sot kur është në vazhdim një luftë në Ukrainë. Postulati gjeostrategjik i NATO-s ka qenë që të mos ketë luftëra paralele, se janë të pamenaxhueshme. Kuptohet se një luftë në Ballkan, në kohën që është në vazhdim lufta në Ukrainë, i intereson vetëm Rusisë. Gruevskit i interesonte lufta e Kumanovës për shkaqe të politikës së brendshme. Trajtimi i Haradinajt në Slloveni është ndëshkimi paralajmërues i NATO-s për Haradinajn.